4
1 Go yau adigo kagu,
‘Go kunōve! Manakae neta geya sinumiseguta be sopagu geya sikabikaoneyeta? Nakae bei sidigo kadi,
“Moe Yauwe geya isowoduwoita yaim.”
Neta nakae, bei manakaegu?’
2 E tuwo Yauwe idigo kana,
‘Moe kaga nimam goi?’
‘Aituko’, kaegu.
3 Yauwe idigo kana,
‘Kwalisobūye isou poyapoya goi.’
Tuwo moitamo akalisobuye isou poyapoya goi imalamoteta! Agite, asiya. 4 Go Yauwe idigo kana,
‘Nimam kubisisōbu yuyuna kuyōisi.’
Tuwo moitamo abisisobu yuyuna ayoisi, ayoisikavate, e nimagu goi imalakaituko. 5 Yauwe idigo kana,
‘Moe nakae kuguinūwe bei sinumisa bego Yau Yauwe, tubumiyao Eberamo, Aisake be Yakobo idi Yaubada bogina asowóduwo yaim.’
6 E aiyuwoina Yauwe ibobwaramna idigo kana,
‘Nimam kubasisīu am kwama sinaena goi kasikasim kubasikōne.’
Tuwo moitamo nimagu guna kwama sinaena goi abasisiu, kasikasigu abasikone. Go nimagu abuyagi, agite. Iyaa! Nimaguyana sakavaina mana vísiya, e itapopoina!
7 Yauwe idigo kana,
‘Nimamyana kubasisīumna am kwama sinaena goi kasikasim kubasikonemnēi.’
Tuwo moitamo nimaguyana abasisiumna guna kwama sinaena goi kasikasigu abasikonemnei. Go nimagu abuyagi, agite. Iyaa! Sakavaiguyana bogina idedevinamna sakavaigu madabokina nakae! 8 Yauwe nava ibobóbwara idigo kana,
‘Neta moitamo Isileli tubunao geya sinumisemta be nakae aba kinana vakuumgoina geya sikamoitamoeta, nakona moe aba kinana aiyuwoinayana kuguuinuwe bei sikamoitamoe. 9 Go neta aba kinanayadi aiyuwo geya sikamoitamoedita be nakae sopam geya sikabikaoneyeta, e kūna sákala Nairi goi bwae kutēge. Ikavava, kūna poyapoya sayasayaina goi kwaliulāgi bei poyapoyayana goi imalaikaika.’
10 Go yau adigo kagu,
‘Tomoya, yau koroto geya bóbwara ana tokatanaki geya. Geya tayaamo tuta nakae itoboinegu. Boi nimatu geya; nakae ame tuta geya. Yau im pákwana kuvaadigoigu go, moe nakae geya itoboineguta. Yau sopagu maegu simoumou.’
11 Go kina Yauwe idigo kana,
‘Go nakona avatau tomota sopadi imadagidi? Avatau tomota geya sibobóbwara imadagidi o avatau kidi taiyadi patupatudi o ma matadi be matadi kebokeboidi imadagidi? Moe Yau Yauwe ae? 12 Tauna ame tuta kom tuwo kutaoyāmo kūna go, Yau toinigu sopam bei avaite be nakae avatulukoim manakaem kubóbwara.’
13 Go yau adigo kagu,
‘Go Tomoya, akawanoi yaim bego ituli ta tomota kuetune ina.’
14 E Yauwe bogina iegamogamogu yaigu goi, tuwo idigo kana,
‘Go manakae siyam Eroni guma Livai? Bogina ayagoi kina bóbwara ana tokatanaki. Ame tuta tauyana bogina imamaima bei ivalobodem. Tutayana igitem, bei iuyáwana. 15 Tauyana kulatuwōko manakaena ibóbwara go, Yau toinigu sopana be sopam bei avaitedi be nakae ami taiyuwokova avatulukoimi kaga latuwogu koguinuwe. 16 Go tauyana bei im tobóbwara tomota yaidi ame nakae: Kina bei sopam nakae go, kom kueyaubada nakae tauyana yaina. 17 Moe aitukoyana nimam goi kuyoisiikavate kunāve be aba kinanayadi kuguinuwēdi.’
Mosese ina kaluvilamna Itipita goi tetelina
18 E atáoya akaluvila ana yaogu Iyetoro alatuwoko adigo kagu,
‘Yaogu, kutagonēgu ana Itipita goi bei osegowo agitedi, nakona nava maa yawoidi o geya.’
Iyetoro kana,
‘Mam tuboina kūna.’
19 E Midiyani goi Yauwe ilatuwokoigu idigo kana,
‘Kutāoya kwaluvīla kūna Itipita. Korotoyadi boi bego sikauumatem bogina sikamasa kówasa.’
20 E tuwo moitamo monegu be natugowo akibodebodedi ase goi situlaga. Ikavava, kakaluvila kana Itipita goi. E nimagu goi Yauwe ina kaituko akavale.
21 E Yauwe ilatuwokoigu, idigo kana,
‘Tutayana kusowóduwo Itipita goi, kunuwookavāte guinuwa aba kainaopa liliudi Pero matana goi kuguuinuwedi. Guinuwayadi manudi togaga bogina avinim. Go yau bei Pero ina dabakasa avaituwe, e tomotayadi geya itagonedita. 22 E Pero kulatuwōko kam,
“Yauwe idigo kana, ‘Natugu, guna botomoya, moe kidi Isileli tubunao. 23 Bogina alatuwokoim natuguyana kutaligēi bei ima isakululu Yau yaigu. Go neta geya kutaligeiyeta, e am dodōkana! Kom natum, am botomoya bei akaumate.’ ” ’†Tat 12:29.
24 E kai kanonoina Itipita manuna go, kama tunagu tayamo goi Yauwe ivalobodema, e ipoikíkina bego ikaumategu.‡Ipoikíkina bego ikaumategu: Nakona boi Mosese natuna ibíbina go, sakavaina geya ikupoeta, tauna Yauwe ipoikíkina bego Mosese ikaumate (Abv 17:10). 25 Go Sipora memetu ikabi, natuma sakavaina ikupo. Ikavava, sakavayana ikabi, aegu‡Aegu : Ame livalakaibala Mosese kusina manuna. Tutayana Sipora natuna sakavaina ikupo go, sakavainayana ikabi Mosese kusina goi iyato, moe nakae Mosese sakava ana kúpwana iguinuwe. ibisikone idigo kana,
‘Bego kom yau ikaika goi tanai dókana.’
26 Tuwo Yauwe igite, e iyatoigu. Ego tutayana Sipora kana, ‘Ikaika goi tanai dókana’, ame sakava ana kúpwana idigedige.
27 E boi Yauwe Eroni bogina ilatuwoko idigo kana,
‘Kutāoya kūna yoyowo goi Mosese kuvalobōde.’
Tuwo moitamo Eroni ima Yaubada ina koya goi ivalobodegu, e taiyao kayowóina. 28 Kayowóina ikavava, e alatuwoko Yauwe ina livala liliudi manudi be nakae aba kinana liliudi boi bogina ilatuuwokoigu aguinuwedi manudi. 29 Alatuwoko ikavava, ama taiyuwo kana Itipita goi Isileli tubunao idi tomoyamoya kaduduwedi sima. 30 Sima, kaga liliuna Yauwe boi bogina ilatuuwokoigu Eroni ilatuwokoidi go, aba kinanayadi tomota matadi goi aguinuwedi. 31 Isileli tubunaoyadi sikabikáwana. Tutayana sinove bego Yauwe bogina ivadadedi nakae idi kaiyakomou bogina igite, e aedi sivatugúyala Tauyana yaina sisakululu.
‡4:24 Ipoikíkina bego ikaumategu: Nakona boi Mosese natuna ibíbina go, sakavaina geya ikupoeta, tauna Yauwe ipoikíkina bego Mosese ikaumate (Abv 17:10).
‡4:25 Aegu : Ame livalakaibala Mosese kusina manuna. Tutayana Sipora natuna sakavaina ikupo go, sakavainayana ikabi Mosese kusina goi iyato, moe nakae Mosese sakava ana kúpwana iguinuwe.