9
Liuna ainimaina:
Yoguyogu adi kámasa
Yoguyogu adi kámasa
1 E Yauwe ilatuwokoigu idigo kana,
‘Kūna Pero kulatuwōko kudīgo kam,
“Yauwe kai Iberiu ima Yaubada ibóbwara ame nakae idigo kana,
‘Guna bodao kutaligēidi bei sima sisakululu Yau yaigu. 2 Go neta kom kwatae go, kuvagagaledi, 3 e am dodōkana. Yau Yauwe imi yoguyoguyao ali sinaena bei amtulidi vísiya toogagaina toina goi. Yoguyoguyadi ame nakae: Imi osiyao, imi aseyao, imi kameriyao, imi bulumakauyao be imi sipiyao. 4 Ago Yau Yauwe guna guinuwa goi Isileli tubunao idi yoguyoguyao akimasabedi ituli, da Itipita idi yoguyoguyao ituli, e bei kidi Isileli tubunaoyadi goi geya kada tayaamo yoguyogu bei itagau geya.’ ” ’
5 E visiyayana ana tuta Yauwe iupe idigo kana,
‘Itomo Yau Yauwe ame visiyayana Itipita goi bei aguinuwe.’
6 E tuwo moitamo vanuwo itomo Yauweyana nakae iguinuwe. Da Itipita idi yoguyoguyao badabadaidi imtulidi sikámasa go, kai Isileli tubunao ima yoguyoguyao goi geya kada tayaamo ikámasa geya. 7 E Pero ina topaisewayao ietunedi sina Isileli tubunao ima yoguyoguyaoyadi sigitedi nakona sikámasa o geya. Go sinonoina, sigite, geya kada tayaamo ikámasa geya. Sigite ikavava, sikaluvilamna sina Pero silatuwoko go, Pero nava idaabakasa, tuwo tomotayadi geya italigeimeta.
Liuna ainima tayamoina:
Silekau imalakaukau, e tomota goi imalararawa
Silekau imalakaukau, e tomota goi imalararawa
8 E Yauwe Eroni be yau ilatuwokoima idigo kana,
‘Kōna nimami goi silekau kotavayāili. Ikavava, kōna Pero matana goi, e kom, Mosese, kwalalagāsi ituko ina yábana dadavina. 9 Silekauyana bei imalakaukau, e Itipita ana madabokina ivatum. Ivatum, rarawa bei sisowóduwo tomota be yoguyogu yaidi goi simalapotu.’
10 Tuwo moitamo kana silekau nimama goi katavayaili. Ikavava, kana Pero matana goi kataoya go, silekauyana akalalagasi itasapasapa, e rarawa sisowóduwo tomota be yoguyogu yaidi goi simalapotu.†Nuw 16:2. 11 E da Itipita idi tomemeyavayadi adi rarawa pasidi geya itoboinedita matagu goi sitaoya. Bogina kuyagoi. Kidi nakae da Itipita madabokidi madi rarawa go, sikawoiva.
12 E Yauwe Pero dabana ikaukase, e geya inovemeta nakae Yauwe boi bogina ilatuwokoigu.
Liuna ainima aiyuwoina:
Kúwana kasakasaina isou Itipita ikaigoyai
Kúwana kasakasaina isou Itipita ikaigoyai
13 E Yauwe ilatuwokoigu idigo kana,
‘Nobuyana giyaina kutāoya kūna Pero matana goi kulatuwōko kudīgo kam,
“Yauwe kai Iberiu ima Yaubada ibóbwara ame nakae, idigo kana, ‘Guna bodao kutaligēidi bei sima sisakululu Yau yaigu. 14 Ame tutayana goi guna liuna liliudi bei aetunedi siwo kom, im pakonayao be nakae da Itipita madabokimi yaimi, e bei koyagoi bego geya kada vatau tayaamo poyapoya ana madabokina goi Yau nakae. 15 Boi nimatu ima ame tuta itoboinegu bego nimagu abisisobu kom be nakae im bodao vísiya goi asapimi bei madabokimi poyapoya ame goi atauwemi. 16 Go ame pasina atagonem maa yawoim: Latuwogu guna togaga avatulukoim go, aiyuwoina bei valegu inúnuwo ina poyapoya ana madabokina goi.†Rom 9:17. 17 Go mam kamanamana guna bodao nava geya kutaligeidita. 18 Go am dodōkana! Itomo ame niyalayana nakae kúwana kasakasaidi guregurewa igoyo toina nakae bei aetune iwo. Ame kuwanayana geya tayaamo tuta tomota Itipita goi sigite boi Itipita igimisowóduwo go, ima ame tuta geya. 19 Tauna ame tuta vala kuetūne im bodao liliudi yaidi bego idi yoguyoguyao simedi idi vada goi sikaiyaka, e bei dedevidi. Tomota liliudi be nakae yoguyogu liliudi neta moetala goi sikaaiyaka, bei kuwanayana isou isamatedi sikámasa.’ ” ’
20 E kidi go Pero ina pakonayao yaidi goi avatauwa neta Yauwe ina livala sitaaimamine, e idi topaisewayao be nakae idi yoguyoguyao sisiyaedi sinavedi vada goi sikaiyaka dedevidi. 21 Go avatauwa neta Yauwe ina livala geya sinoveyeta, e idi pakonayao be nakae idi yoguyoguyao sikalavedi moetala goi sikaiyaka.
22 E Yauwe ilatuwokoigu idigo kana,
‘Nimam kuyosāle yábana kuvasakikināko bei kúwana kasakasaidi sisou sima kaga liliuna Itipita ana madabokina goi sibugoyaidi. Nakae tomota, yoguyogu be tánuwo.’
23 E tuwo moitamo guna kaituko ayosale yábana avasakikinako. E kina go Yauwe kúwana kasakasaidi ma palapalaidi be nakae ma kavilidi ietunedi sisou sina Itipita goi. 24 E kúwana kasakasaidi be nakae ma kavilina sisousou, e igoyo toina nakae geya tayaamo tuta tomota Itipita goi sigite. Boi Itipita igimisowóduwo ima ame tuta nakae geya.†Nuw 16:21. 25 E kuwanayadi sisou kaga liliuna Itipita ana madabokina goi sisamatedi, tomota be nakae yoguyogu. Nakae kaga liliuna tánuwo goi be nakae alova liliudi, madabokina sisamatematedi. 26 Go asa Goseni goi kai Isileli tubunao kakaaiyaka go, ame asayana kúwana kasakasaidi geya sisouta geya.
27 E tuwo Pero vala ietune ima Eroni be yau iduduwema kana. Kana, ilatuwokoima idigo kana,
‘Ame tuta bogina agoyo. Kina Yauwe tokibóbwata go, yau be nakae da Itipita liliuma toogoyoima. 28 Tauna kokawanōi Yauwe yaina. Ina palapala be ina kúwana kasakasaidi bogina tuwo, oma ikai. Bei ataligeimi kona. Moitamo toina. Geya tuwaina ameko goi kokaiyāka.’
29 E adigo kagu,
‘Tutayana im kasa ame goi asowóduwo, nimagu bei akatulagasidi akawanoi Yauwe yaina. Palapala mainao bei sisayata be kúwana kasakasaidi geya tuwaina sisou, e bei kuyagoi bego poyapoya ana madabokina moe Yauwe ina kaba lovina. 30 Go kom mam pakonayao, e bogina ayagoimi bego nava Yauwe Yaubada geya komatoiteyeta.’
31 Ego ebulu saleoina bogina ididi, bali bogina sikéuwo go, kuwanayana isou isamaumauidi, tauna sigoyo bogina. 32 Go witi nava geya sididita, tauna geya isamaumauidita.
33 E tuwo ataoya, Pero akalave, ina kasa goi asowóduwo, abala ana nimagu akatulagasidi Yauwe yaina akawanoi. Tuwo palapala be kúwana kasakasaidi sisayata, nakae kúwana geya tuwaina isou poyapoya goi. 34 E tutayana Pero igite bego kúwana, kúwana kasakasaidi be palapala sisayata, aiyuwoina igoyomna, e kina mana pakonayao taiyao dabadi sikasa. 35 Tuwo Pero dabana ikasa, kai Isileli tubunao geya italigeimeta bei kasowóduwo nakae boi Yauwe bogina ilatuwokoigu bei siguinuwe.