13
Vatulúkwana botomoya ana kasala manuna
1 E Yauwe ilatuwokoigu idigo kana,
2 ‘Botomoya koroto liliudi kukimasabēdi yau umagu.†Yoy 3:13; Luk 2:23. Tomota idi botomoyayao liliudi be yoguyogu idi botomoyayao liliudi moe yau guna kaba lovina.’
3 E ana tomotayadi alatuwokoidi adigo kagu,
‘Maliyalina ame tanuwokavāte. Ame Itipita goi tasowóduwo. Boi komi da Itipita idi pakonayao go, ame ataligeimi. Moitamo. Yauwe ina togaga goi ikabida Itipita goi imeda. Ame maliyalinayana goi beredi mana isti taabu takakāika. 4 Ame tuta tukówana Abib‡Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana (Abv 12:18). goi Itipita bei takalave.
5 E Yauwe bei inaveda kidi Kenani tubunao, Eta tubunao, Emori tubunao, Ivai tubunao be nakae Iyebusi tubunao idi poyapoya goi. Boi tubudao yaidi Yauwe ikatotule bego ivinidi. Poyapoyayana maaliina be lobooinina. E tutayana inaveda tana poyapoyayana goi, tala tamo tamo tukówana ame Abib goi ame tapwaroro ana sinapuyana taguuinūwe. 6 Sinapuyana ame nakae: Maliyalina ana badabada ainima aiyuwo goi beredi pokaka takakāika go, maliyalina ainima aiyuwoina goi uyáwana aikanina taodūgu Yauwe yaina. 7 Beredi pokaka maliyalina ainima aiyuwo goi takakāika. Taabu beredi mana isti yaida goi ikaaiyāka, e nakae ida kaba lovina goi isti geya. 8 Amo tutayana natudao koroto talatuwokoidi kada,
“Ame sinapuyana takabikaone unana boi Yauwe ina vaita goi kai Itipita goi kasowóduwo.”
9 Ame sinapuyana aba kinana tayamo o aba nuwokavata tayamo yaida nimada goi o dabada goi‡Nimada goi o dabada goi: Moe nakae mógula tomota nukotoda goi tasiko go, adi paisewa tayamo moe aba nuwokavata. Kugite Atu 6:8 be Mad 23:5. tasiko bego Yauwe ina Katukeda sopada goi ikaaiyaka. Aba nuwokavatayana pasina Yauwe nimana toogagaina goi ikabida be Itipita goi imeda bei konuwokavāte. 10 Tauna tala tamo tamo ame lovinayana takabikaonevatāe.
11 E Yauwe bei inaveda Kenani tubunao idi poyapoya goi nakae boi ikatótula kita be nakae tubudao yaida. Tutayana poyapoyayana ivinida, 12 ida botomoyayao koroto liliudi be nakae ida yoguyoguyao idi botomoyayao bolamo liliudi bei takimasabēdi Yauwe umana. Botomoyayadi moe Yauwe ina kaba lovina.†Tat 34:19-20; Luk 2:23. 13 E ida ase adi botomoyayao bolamo lami ana kasala goi tatatetēdi go, neta geya tatatetedita, e nukotodi takiguyalīdi. Go ida botomoyayao koroto, e liliudi tatatetēdi. 14 E tutayana natudao silumadadeda kadi, “Moe sinapuyana kaga ana yagoina?” e kita kada,
“Boi Itipita goi kai da Itipita idi pakonayao go, Yauwe ina togaga gagaina goi ikabima, Itipita goi imema. 15 E boi Itipita goi Pero dabana ikasa, tauna geya italigeimeta bei kasowóduwo, tauna Yauwe ima da Itipita idi botomoyayao koroto be yoguyogu bolamo ikaumatedi. Moe pasina kita ida yoguyoguyao bolamo liliudi takasaledi Yauwe yaina go, ida botomoyayao koroto tatatetedi.”
16 Ame aba kinana yaida nimada o dabada goi tasikosiko bego tanuwokavate Yauwe manakaena nimana toogagaina goi ikabida, Itipita goi imeda.’
Isileli tubunao adi yava tetelina
(Tateta 13:17—15:21)
Isileli tubunao sinonoina Négwasa Kayakayaina goi tetelina
17 E tutayana tomotayama kina Pero italigeima, e Yaubada ivakedema kana go, geya da Palisiti idi kenao goi geya. Ame yomana go, ina nuwonúwana kana,
‘Govila bei yaviya sibabane, e simatoita. Novala bei nuwodi sikatuvilavila go, sikaluvila sina Itipita.’
18 Tuwo ivakedema kana enao yoyowo goi kavanibisi kana Négwasa Kayakayaina goi. E mama katubayasi yaviya manuna Itipita goi kasowóduwo katukotuko. 19 E yau ana Iyosepa luluna akabi anave. Boi Iyosepa Isileli natunao ilatuwokoidi kana,
‘Moitamo Yaubada bei iwo ivaitemi go, ame tuta kokatōtula yaigu bego tutayana Yaubada ikabimi, e lulugu kokabidi konavedi Kenani goi kovaliwogedi.’†Abv 50:25; Iys 24:32; Gui 7:15-16.
20 E tuwo Sukota goi kataoya, kana Etam goi katunagu. Moe yoyowo kikina. 21 E kina go Yauweyana ivakumgooiyema enao ivakedema. Maliyalina goi Tauyana gaota taaoyaina sinaena ivakedema. Go sabamgo goi Tauyana yeu sabeninimina taaoyaina sinaena ivakedema bei imavadema, e bei itoboinema maliyalina be sabamgo kaaketoiya. 22 Gaota taoyainayana maliyalina goi, e yeu taoyainayana sabamgo goi, aiyuwokova geya sikalavemeta.†Yoy 14:14.
‡13:4 Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana (Abv 12:18).
‡13:9 Nimada goi o dabada goi: Moe nakae mógula tomota nukotoda goi tasiko go, adi paisewa tayamo moe aba nuwokavata. Kugite Atu 6:8 be Mad 23:5.
†13:12 Tat 34:19-20; Luk 2:23.
†13:19 Abv 50:25; Iys 24:32; Gui 7:15-16.
†13:22 Yoy 14:14.