23
Lovina kotu manuna
1 E Yauwe tuwaina kana,
‘Taabu talavaita polapola kosaanunūi. Taabu toogoyoina ina pola goi koovavāite bei kotalavaita polapola.†Tat 20:16; Vin 19:11-12; Atu 5:20.
2 Taabu boda gagaina idi guinuwa goyogoyoidi goi kosiiukōidi. Neta kotu goi boda sipola latuwodi kotuyana sibugoyai, e taabu kotalavaita polapōla bego kovaitedi. 3 Neta tookaina siekotuye go, tokainayana kogite nukotomi igoyo, taabu tokainayana pola goi koovavāite ina kaiyakomou pasina.†Vin 19:15.
4 Neta imi kaleya ina bulumakau o ina ase ina kali goi isowóduwo iketoiya besobeso go, kobabane, e kokābi kokaluvilemnēi toni yoguyogu yaina goi.†Atu 22:1-4. 5 Neta imi kaleya ina ase ikapusi kónana moumoudi ikaavaledi pasina, e taabu aseyana kookalāve, go sem imi kaleya kovāite, e aseyana kobutāoe.
6 E tookaidi yaimi goi mami kivavasa adi kotu goi kotakīnona.†Vin 19:15; Atu 16:19. 7 E taabu kotalavaita polapōla. Tomota tutubeso be nakae tokibóbwata imi kotu goi taabu kotaagonēdi sikamakámasa. Moitamo. Avatauwa komi yaimi nakae koguinuwe, geya anuwotaoimita. 8 Kotu goi neta tomota tayamo mani ivinimi bego kopola, maniyana taabu kokabikābi. Maniyana pasina geya itoboinemita kogitedoko nako bóbwara moitamo go, nako pola. Aiyuwoina moe sinapuyana goi tokibóbwata ina talavaita mooitamoina kobugoyai. 9 Tomalatonikasa taabu koyogeedegēde.†Tat 22:21; Vin 19:33-34; Atu 24:17-18, 27:19. Komi bogina koyagoi tomalatonikasa adi lotówana nakonakae. Moitamo. Boi komi tomalatonikasa nakae Itipita goi.’
Lovina waiwasi manuna
10 E Yauwe tuwaina kana,
‘Tala ainima tayamo sinaedi imi poyapoya goi kobāgula be nakae kodibayōya.†Vin 25:1-7. 11 Go tala ainima aiyuwoina goi, e poyapoyayana iwaiwasi, taabu koobagūli. Niga neta amo poyapoyayana goi awoinu itabo, tookaidi yaimi goi kotagonēdi sina sikabi, avadi. Go kaga tokaidiyadi geya sikabiyeta, e woiwoi kotagonēdi sina sikani. Ame nakae koguinūwe imi oine tanuidi manudi be nakae imi kalova oribe tanuidi manudi. 12 Maliyalina ainima tayamo goi koopaisēwa go, maliyalina ainima aiyuwoina goi kowaiwāsi bei imi bulumakauyao be imi aseyao itoboinedi siwaiwasi, nakae imi pakonayao sibíbina yaimi be nakae tomalatonikasa itoboinedi siwaiwasi.†Tat 20:9-11, 31:15, 34:21, 35:2; Vin 23:3; Atu 5:13-14.
13 E kaga liliuna bogina alatuwokoimi, e konōve. Go ituli ta yaubadava yoidi taabu koduuduwēdi. Nakae taabu tauyadi yoidi sopami goi sisowōduwo.’
Lovina áika gagaidi manudi
14 E Yauwe tuwaina kana,
‘E tala tayamo sinaena uyáwana aikanidi gagaidi yaigu bei sivato kowodugukoidi.†Tat 5:1, 34:23. 15 Aikayana vakuumgoina moe Beredi Pokaka Aikanina kowodūgu. Maliyalina ainima aiyuwo beredi pokaka kokakāika tukówana Abib‡Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana. Abv 12:18. goi nakae bogina alatuwokoimi. Amo tukowanayana sinaena Itipita goi kosowóduwo. Go taabu nima kaka komamāima matagu goi, go sem mami vininabeso kōma kosakulūlu yaigu.†Tat 12:14-20; Vin 23:6-8; Yoy 28:17-25.
16 Keuwokumgo Aikanina kowodūgu. Amo aikaniyana goi dibayoya keuwokumgoina kokāsale yaigu.†aVin 23:15-21; Yoy 28:26-31. Aikayana sivatonina moe Lolágata Aikanina kowodūgu tala ana kaba lukavava goi tutayana távina ikavava.†bVin 23:39-43; Atu 16:13. 17 Sivato tala tayamo goi komi koroto kōma kosowōduwo Yau Yauwe imi Tomoya matagu goi.
18 E, neta yoguyogu kokaumate, kogabu bego kokasale yaigu, e taabu yoguyoguyana ikaikaina beredi mana isti taiyao kokaasalēdi. Neta yoguyogu tayamo bego kogabu kokasale yaigu, sabalina taabu koyatoyāto bego itomo kokasale. 19 Imi dibayoya keuwokumgoina dedevina toina imi poyapoya goi komēdi Yau Yauwe imi Yaubada guna Kaba Kaiyaka goi.†Atu 26:2; Tat 34:26; Atu 14:21.
Neta goti bonatuna kovaipolu, taabu sinana nununa bwaena goi kovaaipōlu.’†Atu 14:21.
Lovina idi poyapoya ana kaba lovina manuna
20 E Yauwe tuwaina kana,
‘Konōve. Yau guna anerose bei aetune iwo ivakumgoiyemi†Mal 3:1; Mad 11:10. bego imi ketoiya goi irugwausimi be nakae imemi asa tayamo goi bogina akatuubayasi manumi. 21 Mami dodókana Tauyana niyana konōve. Taabu sopana kokapiipilāve. Bogina koyagoi. Imi kapipilovayana bei geya inuwotaoidita. Yau akaaiyaka tauyana yaina,‡Yau akaaiyaka tauyana yaina: Isileli tubunao niyadi goi kadi, ‘Yau yoigu ikaaiyaka yaimi.’ Go kidi niyadi goi you moe ana yagoina nakae tauyana. Tauna ame tomwanayana ilatuwokoida lobutuyana be Yauwe sivavasa. tauna tauyana guna katumapu nakae. 22 Neta guna aneroseyana sopana kokabikaonedoko be koguinuwe nakae bogina alatuwokoimi, e komi imi kaleyayao Yau nakae guna kaleyayao. Avatau bego ivayaviya komi yaimi, e Yau nakae avayaviya tauyana yaina. 23 Moitamo. Guna aneroseyana bei ivakedemi kona kidi Emori tubunao, Eta tubunao, Perisi tubunao, Kenani tubunao, Ivai tubunao be nakae Iyebusi tubunao idi poyapoya goi. Amo tauyadi bei amtulidi. 24 Taabu aemi kovaatugūyala idi yaubadayao yaidi goi. Taabu mami wowoina kokabikaonēdi. Taabu idi sinapu kovatotoowonēdi. Go sem kovasobusobuyedokōidi be nakae idi dídiya aba sakululu kokauvisivisīdi.†Tat 34:13.
25 Kosakulūlu Yau Yauwe imi Yaubada yaigu go, avami be ami bwae bei avamamailidi go, imi katówana bei akabidi akalavedi. 26 Vevina yaimi goi geya tayaamo bei ikogúyala o ikágala geya. Yawoimi bei akimamanavedi.
27 Yau bei avakumgoiyemi imi kaleyayao akatumatoisidi gagaina. Tutayana kovalobodedi, bei nuwodi akiwowonidi, e bei sisiyaemi. 28 Bwanou‡Bwanou: Isileli tubunao kadi, ‘Bwanou.’ Go ana yagoina nakona da Itipita. Tuta maanawena da Itipita sinonoina Kenani goi sivayaviya, tauna kidi Kenani goi bogina sineneta unana Isileli tubunao sivakumgo sina da Kenani idi kasa sivayaviya go, sitogaga. bei aetunedi sivakumgoiyemi sina bei Ivai tubunao, Kenani tubunao be nakae Eta tubunao sivatapiyedi sisiya. 29 Go tala tayamo goi geya avatapiyedita, govila bei poyapoya ikágala be nakae woiwoi sisusáila badabada sisaki, e sikanimi. 30 Giyaina be giyaina avatapiyedi ana kadókana komi kosusáila nakae itoboinemi poyapoyayana kokabi imi kaba lovina. 31 Imi poyapoyayana ana túwana bei ayatoidi ame nakae: Négwasa Kayakayaina ina da Palisiti idi négwasa.‡Da Palisiti idi négwasa: Ame tuta negwasayana dimdim siduduwe kadi, ‘Mediterranean.’ Aiyuwoina yoyowo goi ina sákala Yuparetisi goi. Toni kasa bei nimami goi ayatoidi bego itoboinemi kotogagasavedi. 32 Go taabu toni kasayadi be nakae idi yaubadayao kokanasiiukōidi. 33 Taabu kotaagonēdi poyapoyayana goi sikaaiyaka, govila bei kidi pasidi kogoyo yaigu. Neta idi yaubadayao yaidi kosakululu, moe nakae ami síkwana kowodugu yaimi.’
†23:1 Tat 20:16; Vin 19:11-12; Atu 5:20.
†23:3 Vin 19:15.
†23:4 Atu 22:1-4.
†23:6 Vin 19:15; Atu 16:19.
†23:9 Tat 22:21; Vin 19:33-34; Atu 24:17-18, 27:19.
†23:10 Vin 25:1-7.
†23:12 Tat 20:9-11, 31:15, 34:21, 35:2; Vin 23:3; Atu 5:13-14.
‡23:15 Abib: Ame kidi Isileli tubunao adi tala ana tukówana vakuumgoina. Ame tukowanayana ivatowo Mats sinaena go, ikavava Eipuru nauyayana. Abv 12:18.
†23:15 Tat 12:14-20; Vin 23:6-8; Yoy 28:17-25.
†a23:16 Vin 23:15-21; Yoy 28:26-31.
†b23:16 Vin 23:39-43; Atu 16:13.
†23:19 Atu 26:2; Tat 34:26; Atu 14:21.
†23:19 Atu 14:21.
‡23:21 Yau akaaiyaka tauyana yaina: Isileli tubunao niyadi goi kadi, ‘Yau yoigu ikaaiyaka yaimi.’ Go kidi niyadi goi you moe ana yagoina nakae tauyana. Tauna ame tomwanayana ilatuwokoida lobutuyana be Yauwe sivavasa.
‡23:28 Bwanou: Isileli tubunao kadi, ‘Bwanou.’ Go ana yagoina nakona da Itipita. Tuta maanawena da Itipita sinonoina Kenani goi sivayaviya, tauna kidi Kenani goi bogina sineneta unana Isileli tubunao sivakumgo sina da Kenani idi kasa sivayaviya go, sitogaga.
‡23:31 Da Palisiti idi négwasa: Ame tuta negwasayana dimdim siduduwe kadi, ‘Mediterranean.’