33
Yakobo be Iso idi valoboda tetelina
1 E tuwo Yakobo Paniyeli ikalave iketoiya go, ikandobala Iso igite imamaima ina korotoyao poa andedi (400) taiyao. Tuwo natunao ikiwotaidi Reya, Reitiyeli be nakae ina pakonayao adi taiyuwo yaidi. 2 Ina pakonayaoyadi ma natudiyao ilatuwokoidi sivakumgo. Mlidi Reya ma natunao. Reitiyeli ma natuna Iyosepa sivámliya. 3 E Yakoboyana ivakumgo ina tuwowona matana goi aena sivanima sivayuwo ivatuguyalako isakululu. 4 Go Iso ilokoina ina Yakobo ivayavau nukotona goi iyoisi, iyowoi. Tuwo adi taiyuwokova sitáiya. 5 Sitáiya ikavava, Iso imatavilavila vevina be gogómana igitedi, e idigo kana,
‘Ame tauyadi avatauwa?’
‘Yau im pákwana, Yaubada ikanuwoiyegu, e ame natugowo ivinigu’, Yakobo kaena.
6 E Yakobo ina pakonayaoyadi ma natudiyao sima aedi sivatugúyala. 7 Reya nakae ma natunao sima aedi sivatugúyala. Tauyadi mlidi Iyosepa be Reitiyeli sivámliya sima aedi sivatugúyala. 8 E Isoyana idigo kana,
‘Go maine boda madi yoguyogu ababanedi. Moe kaga yoguyoguna?’
‘Guna tomoya, bego kusosalegu’, Yakobo kaena.
9 E Iso idigo kana,
‘Guna gómana, tuwo. Yau guna yoguyoguyao badabadaidi. Moe kom im yoguyoguyao.’
10 Go kina Yakoboyana idigo kana,
‘Geya. Neta kusoosalegu, e guna yabobona kuuyaone. Unana maisim agite moe nakae Yaubada maisina agite go, geya akamaseta, go sem mam nuwotao kuuyaonegu. 11 Tuwowogu, guna yabobona aavinim kwābi unana Yaubada ikanuwoiyegu, e yau guna yoguyoguyao badabadaaidi, tauna bogina yoiyagu.’
Tuwo Yakobo ilumakikine ana kadókana Iso itagona, e yoguyoguyadi ikabidi.
12 E Iso idigo kana,
‘Tao. Yau avakedemi.’
13 Go kina Yakoboyana idigo kana,
‘Guna tomoya, bogina kuyagoi gogómana sineneta be nakae yoguyogu maniyedi ma natudiyao. Tauna geya itoboinedita maliyalina ana madabokina goi siiketoiya, govila bei sikámasa. 14 Tuwo guna tomoya, kom kuvakūmgo go, kai im pakonayao manukaima kavámliya kao Seira goi.’
15 E Isoyana idigo kana,
‘Siyagu, neta moe nakae, guna topaisewa maniyedi sikaiyaka be sivaitem.’
Go Yakobo idigo kana,
‘Moe tuwo. Guna tomoya, bogina kusosalegu. Ame tauna.’
16 E tuwo Iso ina Seira goi. 17 E kina go Yakoboyana geya inoita Seira, go sem ina asa Sukota goi yoyou parai iyowóidi toinina manuna be nakae ina yoguyoguyao manudi. Moe pasina asayana yoina Sukota.‡Sukota: Ame youyana ana yagoina moe yoyou parai.
18 E boi Padani Aram ikalave, e mana dedevina isowóduwo asa Sekem goi; moe Kenani sinaena. Asayana kikina goi ina yoyou parai iyowóidi, e itunagu. 19 Ina yoyouyadi Emori natunao koroto idi poyapoya goi sikaaiyaka. Emoriyana natuna tayamo yoina Sekem. Tuwo Yakobo poyapoyayana igimone siriba ana badabada tayamo andedi (100) goi.†Iys 24:32; Iyo 4:5. 20 Amoko goi dídiya ikabi, ikaudakodako, aba kasala imadagi Yaubada yaina go, aba kasalayana ivayou El Eloe Isileli.‡El Eloe Isileli: Ame youyana ana yagoina moe Yaubada, Isileli ina Yaubada, o ana yagoina moe Isileli ina Yaubada itogaga.