45
Iyosepa toinina itaalavaite
tuwowonao yaidi tetelina
tuwowonao yaidi tetelina
1 Tuwo livalayana Iyosepa inove, geya itoboineyeta ina nuwomou itoto ina topaisewayao madabokidi matadi goi, tuwo ilatuwokoidi kana,
‘Madabokimi kosowōduwo!’
Tuwo topaisewayadi sisowóduwo go, kina tuwowonao taiyao sikaaiyaka tutayana Iyosepa toinina italavaite tuwowonao yaidi.†Gui 7:13. 2 Tauyana itáiya gagaina nakae da Itipita moetala goi sikaaiyaka sinove be nakae kidi Pero ina vada goi sinove. 3 E tuwowonao ilatuwokoidi idigo kana,
‘Segowo, yau Iyosepa ami gómana! Manakae? Tamada dedevina?’
Go kidi tuwowonao geya itoboinedita mainao sibóbwara. Atedi iyova gagaina Iyosepa maa yawoina pasina.
4 E Iyosepa aiyuwoina ibobwaramna kana,
‘Segowo, kōbala kōma kikigu.’
Tuwo moitamo sibala sima kikina goi sitáoya go, tauyana idigo kana,
‘Yau ami gómana Iyosepa. Boi kokaigimonegu da Itipita yaidi! 5 Go ame taabu kokaateyōva be nakae taabu toinimi koobowōimi amo imi guinuwayana pasina. Yaubada ietunegu ama ameko bego avakumgoiyemi, e bei kita tomota ayaveda. Tauna taabu komatooitēgu. 6 Moitamo. Ame logayana poyapoya ame goi tala aiyuwo bogina ikaaiyaka go, tala ana badabada ainima tuwaina bei sikaaiyaka. Tauna bágula be dibayoya geya. 7 Yaubada ietunegu avakumgoiyemi bei itoboinegu ayavemi, e bei tubudao poyapoya ame goi sikaiyaka dedevidi.
8 E tauna komi geya koetuneguta, go sem Yaubada ietunegu. Ina nuwonúwana goi yau Pero ivayokoigu yau ina vada ana tolovina be nakae da Itipita madabokidi adi tolovina. 9 Tauna ame tutayana woilīmi kōna tamada kolatuwōko kami,
“Natum Iyosepa idigo kana, ‘Yaubada ina nuwonúwana goi yau Itipita ana madabokina alovinae. Woilīm kusōu kūma yaigu.†Gui 7:14. 10 Kom bei Goseni dadavina goi kwaiyaka, moe Itipita sinaena. Kom be natumowo be tubumowo, im yoguyoguyao be konam madabokidi. 11 Amoko goi bei amatakaavatem. Bogina kuyagoi. Tala ainima nava bei loga ikaaiyaka. Tauna kūma, govila bei kom be osemowo loga kokámasa.’ ”
12 E komi Beniyamina taiyao bogina kogitegu bei koyagoi bego moitamo yau Iyosepa siyami avaadigoimi. 13 Tauna kaga liliuna Itipita sinaena bogina kogite, e kōna tamada kolatuwōko, nakae yau da Itipita liliudi siwowoinegu. Tamada kolatuwōko yau koroto toogagaigu Itipita goi. Ago woilīmi kotūko kōna tamadayana kokābi kosōuye kōme.’
14 Ibóbwara ikavava, Beniyamina ivayavau nukotona goi iyoisi, iyowoi, e taiyao sitáiya. 15 Ikavava, Iyosepa mana táiya tuwowonao iyowoiidi. Iyowoiidi ikavava, taiyao sivatétala.
16 E niga Pero livala inove bego Iyosepa senao bogina sima, e livalayana pasina Pero mana tovakumgoyao taiyao siuyáwana. 17 E tuwo Iyosepayana iduduwe ima idigo kana,
‘Iyosepa, semowo kulatuwokōidi konadi ase goi sivadodoidi. Sivadodoidi ikavava, sikaluvila sina Kenani goi. 18 Amoko goi tamam be osemiyao sikabidi, taiyao sikaluvila sima go, poyapoya dedevina Itipita sinaena avinidi, e bei awoinu dedevidi sikáika.
19 Aiyuwoina kulatuwokōidi kam,
“Ame nakae koguinuwe: Dedeoga ma kaena‡Dedeoga ma kaena: Ame dedeoga gagaina ma kaena nakae tomota itoboinedi sisowoya be nakae konadi sidodoidi. Dedeogayana tupwana maanawena go, bulumakau sibiubiu manukaidi siketoiya. bulumakau sibiubiu Itipita goi kokabīdi, e bei monemiyao be natumiyao itoboinedi sisowoya. Aiyuwoina tamami kokābi kōme. 20 Go geya konuwonuwoneta konami manudi. Bogina koyagoi. Konami dedevidi ameko Itipita goi bei kobabanedi.” ’
21 E tuwo Isileli natunao nakae siguinuwe. Iyosepa dedeoga ma kaena ivinidi nakae Pero ilovina. Nakae adi kinare idi kenao manuna ivinidi. 22 Koroto tamo tamo adi kwama tayamo tayamo ivinidi go, Beniyamina siriba ana badabada 300 be nakae kwama ainima ivini. 23 Ago tamana manuna ase yawou ietunedi sina go, aseyadi goi Itipita konanidi dedevidi ikailagasidi. Aiyuwoina ase bovavina yawou toludi goi witi gagaina be nakae tamana ana kinare ina ketoiya manuna ikailagasidi. 24 E sikatubayasi ikavava, senao ivaduduwedi siketoiya go, Iyosepa idigo kana,
‘Enao goi taabu kokaumaakimāki!’
25 Tuwo Itipita sikalave situko sina Kenani goi sisiu sina tamadi Yakobo 26 silatuwoko sidigo kadi,
‘Tamama, Iyosepa amoni, maa yawoina! Tauyana da Itipita adi tolovina.’
Kidi idi livalayana Yakobo inove go, nukotona iwówana. Ina nuwonúwana kana,
‘Tauyadi sikatubaugu.’
27 Go tutayana kaga liliuna Iyosepa iidigedi tamadi silatuwoko be nakae dedeogayadi Iyosepa ieetunedi igitedi, e iuyáwana. 28 E Isileli idigo kana,
‘O moitamo, imi bóbwara bogina itamyabigu. Natugu Iyosepa woi amoni ma yawoina ikaaiyaka. Bei ana agite, govila bei geya agiteyeta go, akámasa.’
‡45:19 Dedeoga ma kaena: Ame dedeoga gagaina ma kaena nakae tomota itoboinedi sisowoya be nakae konadi sidodoidi. Dedeogayana tupwana maanawena go, bulumakau sibiubiu manukaidi siketoiya.