19
Sakíusa tetelina
1 Yeisu bogina ima Yeriko goi isiu go, inonoina bego Yerusalema. 2 Go koroto tayamo yoina Sakíusa ikaaiyaka. Tauyana takisi ana togogoyao adi tovakumgo nakae toesaesa tayamo. 3 Tauyana ipooikíkina Yeisu igite bego Tauyana avatau go, kina kaakupina, tauna boda gagaina pasina geya itoboineyeta. 4 Go Yeisu giyakainava bei ivatabale, tauna Sakiusayana ilokoinakumgo ina alova tayamo gagaina imwere bego itoboine Yeisu igite.
5 Tutayana Yeisu ima amoko goi ikandolaga, Sakiusayana igite, ilatuwoko idigo kana,
‘Sakíusa, woilīm kusōu. Ame itoboine kom be yau im vada goi takaiyaka.’
6 Tuwo moitamo woilina isou ima Yeisu mana tovatotowanayao ikabidi sina ina vada goi go, mana uyáwana Yeisu iuyaone. 7 Ago tomota madabokidi sigite Yeisu ina takisi ana togogo ina vada goi, e sikului sidigo kadi,
‘Iyaa! Tauyana ina toogoyoina ina vada goi isiu bego tauyana ina ogaoga.’
8 E Yeisu kidi sikakáika go, Sakiusayana itaoya, Yeisu ilatuwoko idigo kana,
‘Tomoya, kunovēgu! Konagu madabokidi awotaidi dadava tayamo tookaidi avinidi. Ava tomota boi bogina aavaobu, bei amapu go, ana vaituwo sivavasi nakae avini.’
9 E Yeisu idigo kana,
‘Koroto ame Eberamo ina boda tayamo nakae, tauna ame tuta Yaubada ina yava bogina isowóduwo vada ame goi. 10 Ame moitamo. Tomalatomota ima bego tauyadi tosuláiga ame korotoyana nakae ilusaledi be iyavedi.’†Isi 34:11,16; Mad 18:11.
Livalakaibala Yeisu ina kaluvilamna manuna
be nakae ina pakonayao idi guinuwa manuna
be nakae ina pakonayao idi guinuwa manuna
(Madiu 25:14-30)
11 E amo livalayadi tomota siinovedi go, Yeisu livalakaibala tayamo ivatulukoidi unana Yerusalema tupwana yomana be nakae tomotayadi sinuwonúwana bego Yaubada ina kalibúbuna giyakainava isowóduwo be Yeisu mainao ietokalibúbuna. 12 Idi nuwonuwanayana pasina tauna Yeisu idigo kana,
‘Tayamo koroto tomoya go, ina kasa goi ikaaiyaka ikatubayasi bei ina ituli ta dadava tupwana aduwanau goi. Amoko goi tolovina gagaina bei asa ina kalibúbuna iyato tomoyayana nimana goi. Ikavava, bei ikaluvilamna. 13 E ikatubayasi ikavava, ina pakonayao adi badabada yawou iduduwedi sima, tamo tamo mani tayamo‡Mani tayamo: Mani ame moe nakae koroto tayamo ana maisa itoboine ikabi neta ipaisewa tukówana aito. Da Giriki niyadi kadi, ‘Mina.’ Ame nakona siriba. ivinidi go, idigo kana,
“Mani ame kokābi koepaisēwe ana kadókana akaluvilamna ama.”
Ilatuwokoidi ikavava, itaoya ina.
14 E kidi go toni kasayadi tomoya sikaolilive, tuwo tomota maniyedi sikinavedi adi katumapu, e tomoyayana mlina sietunedi sina tolovina gagaina silatuwoko sidigo kadi,
“Geya latuwoma amo tomoyayana ikalibubuma.”
15 Ago tauyana alibúbuna ikabi. Ikavava, ikaluvila ima ina lobutu ana tolokoina ilatuwoko ina pakonayaoyadi iduduwedi sima bego iyagoi tauyadi boi mani ivinidi bogina siepaisewedi gea geya? 16 E ina pákwana vakuumgoina ima idigo kana,
“Tomoya, im mani tayamo ana vaituwo moe yawou.”
17 Tomoyayana idigo kana,
“Moe dedevina! Kom guna pákwana dedevim. Dogoi giyaina goi itoboinegu anumisem, tauna asa yawou yaidi goi bei kuetolovīna.”
18 Ina pákwana aiyuwoina ima kana,
“Tomoya, im mani tayamo ana vaituwo moe ainima mani.”
19 E tomoyayana idigo kana,
“Kom nakae asa ainima yaidi goi bei kuetolovīna.”
20 Ina pákwana aitonina ima idigo kana,
“Tomoya, im mani tayamo boi kuuvinigu goame. Areko goi autube ayato ikaaiyaka dedevina. 21 Bogina kuyagoi. Kom koroto kasakasaim im guinuwa goi. Nakae ituli ta koroto mani manuna ipaisewa go, maniyana kukabi. Ituli ta koroto ibágula go, ina dibayoya kukabi. Tauna amatoitem. Tuwo nakae aguinuwe.”
22 Go tomoyayana idigo kana,
“Toinim im livala goi bei atakinoim, kom guna pákwana goyogoyoim. Bogina kuyaagoigu bego yau koroto kasakasaigu. Ituli ta koroto mani manuna ipaisewa go, yau akabi. Ituli ta koroto ibágula go, ana dibayoya akabi. 23 Go kaga unana mani ana totalamapuyao geya kuvinidita? Neta kuvinidi, e itoboinedi sivaituwedi. Niga akaluvila ama itoboinegu maniyana mana vaituwo akabi.”
24 Tuwo toyoko sikaaiyaka ilatuwokoidi idigo kana,
“Mani tayamo boi ame tauyana avinivini, e kokābi go, guna pakonayana maana mani yawou kovīni.”
25 Go kidi sidigo kadi,
“Go tomoya, tauyana bogina maana mani yawou.”
26 Go kina tomoyayana idigo kana,
“Ame alatuuwokoimi konōve: Avatauwa neta adi kaiguyau siepaaisewe, e tuwaina bei avinidi. Go avatauwa neta adi kaiguyau geya siepaiseweyeta, e moitamo aiguyauyana bei akuliuye. 27 Go kidi amo guna kaleyayaoyadi geya latuwodi akalibubudi, e kokabīdi komēdi matagu goi kokaumatēdi.” ’
Yeisu ina guinuwa Yerusalema goi tetelina
(19:28—21:38)
Yeisu tokalibúbuna nakae
Yerusalema goi isiusiu tetelina
Yerusalema goi isiusiu tetelina
(Madiu 21:1-11; Maki 11:1-11; Iyoni 12:12-19)
28 Moe livalayadi Yeisu idigedi ikavava, inonoina Yerusalema manuna, ina tovatotowanayao mlina goi siiketoiya.
29 Yeisu kidi sima Betapegi be Betani Oribe Koyaina papanaina goi sivakakana. Go Yeisu ina tovatotowanayao adi taiyuwo ivamoleyedi sina asa goi. 30 Go mainao ilatuwokoidi idigo kana,
‘Kōna asa amo matada goi go, tutayana kosiu, ase bonatuna siikonina bei kobabane. Bonatunayana goi geya vatau tayaamo itulagakone. E kobabane, kotaligēi kōme yau yaigu. 31 Go avatau neta ilumadademi idigo kana, “Kaga unana moe kotaaligei?” e komi kodīgo kami, “Tomoya latuwona iepaisewe.” ’
32 E tuwo adi taiyuwokova sina asayana goi sisiu, ase sibabane nakae Yeisu bogina ilatuwokoidi. 33 E aseyana sitaaligei go, toni ase sidobala tovatotowanayadi sigitedi silumadadedi sidigo kadi,
‘Kaga unana ase kotaaligei?’
34 ‘Tomoya latuwona iepaisewe’, adi taiyuwokova kaedi.
35 Tuwo sikabi sime Yeisu yaina goi go, adi tanigo sivalilividi aseyana toluna goi sisekulidi. Ikavava, Yeisu sivaite itulaga. 36 E inonoina go, tomota adi tanigo sivalilividi enao goi sieveidi. 37 E Yeisu kidi Yerusalema sivakakana go, bogina sima Oribe Koyaina papanaina goi sisousou, e ina tovatotowanayao madabokidi madi uyáwana sivatowo niyadi gagaina goi Yaubada siyapaliye Yeisu ina guinuwa toogagaidi liliudi bogina siigitedi manudi. 38 Idi yapaliyana goi sidigo kadi,
‘Tokalibúbuna Yauwe yoina goi imamaima kaaipakuna!†aMad 23:39; Luk 13:35.
Same 118:26
Tuboina yábana goi bogina ikaaiyaka.
Maeko ee, Yaubada diligaema toina aba taimámina!’†bLuk 2:14.
39 Go kidi Parisi maniyedi boda yaidi goi taiyao sikaaiyaka Yeisu silatuwoko sidigo kadi,
‘Tovatulúkwana, im tovatotowanayao kubowōidi idi bóbwara pasidi.’
40 Kina go Yeisuyana idigo kana,
‘Ame alatuuwokoimi konōve: Neta ame tauyadi situgau, gurewa niyadi gagaina goi bei siyapaliyegu.’
41 Yeisu ibóbwara ikavava, inonoina go, tutayana Yerusalema ivakakana, asayana igite, manuna itáiya 42 idigo kana,
‘Da Yerusalema e, neta komi moitamo tuta ame goi Yaubada ina tuboina ana kenao koyagoi. Ego ame tuta moe Yaubada bogina ivamou yaimi goi. 43 Unana tuta bei imamaima imi kaleyayao sima sikalikobumi be geya vatau tayaamo itoboine isiya. 44 Ago geya koyagoiyeta imi tuta Yaubada ina vadádana manuna. Tauna tomota bei sima sitauwemi. Nakae geya tayaamo gurewa vaapopoina asa goi ikaaiyaka, go sem madabokina sitagaegaekowosidi. Go imi bodao nakae bei simtulidi.’
Yeisu tokaigimona Vada Kimaasabaina goi
ivataapiyedi tetelina
ivataapiyedi tetelina
(Madiu 21:12-13; Maki 11:15-19; Iyoni 2:13-17)
45 Yeisu ima Yerusalema goi isiu go, ina Vada Kimaasabaina ina kali goi isiu ivatowo tokaigimona ivatapiyedi sisiya. 46 Ivataapiyedi go, ilatuwokoidi idigo kana,
‘Gínina Kimaasabaina Yaubada manuna italavaita idigo kana,
“Guna vada moe vada aba kawanoi.”
Aiseya 56:7
Go komi koyatako “tovaináwana idi kaba tamumu.” ’†Yer 7:11.
47 Go maliyalina tamo tamo Vada Kimaasabaina ina kali goi Yeisu isiusiu ivaatulúkwana.†Luk 21:37. E kidi go Tonúwala Gagaidi be Yaubada ina Katukeda ana tovatulukwanayao be tomota adi tomoyamoya sipooikíkina bego Yeisu sikaumate 48 go, geya tayaamo enao sibabane bego siguinuwe. Tomota madabokidi nava ina vatulúkwana nuwodi ikabi, tauna simatoita tomotayadi be siegamogamoguyedi.