10
Yeisu ina vatulúkwana vaisobu manuna
(Madiu 19:1-12)
1 E amoko goi Yeisu itaoya, mana tovatotowanayao amo asayana sikalave go, sina sákala Iyoridani goi sisaidámana sina bomatu dadavina, e sinonoina Yudiya ana dadava manuna. Go boda gagaina aiyuwoina sitaligógana simamaima Tauyana yaina. Tuwo, nakae ina sinapu aiyuwoina ivatuulukoidi. 2 Ivatuulukoidi go, kidi Parisi sima bego Yeisu sikatutao, sidigo kadi,
‘Manakae? Ida lovina goi koroto mana tagona monena ivaisobuye gea geya?’
3 E Yeisu idigo kana,
‘Mosese ava lovina boi tubudao ivinidi vaisobu manuna?’
4 ‘Mosese itagona neta koroto latuwona monena ivaisobuye, e ana katae igini. Ikavava, monenayana ivini, ivaisobuye’, † Atu 24:1-4; Mad 5:31. Parisi kaedi.
5 E kina go Yeisu idigo kana,
‘Imi dabakasa pasina moe lovinayana Mosese iginigini manumi. 6 Go boi nimatu tuta ana kaba vatowo goi, e moe nakae geya. Gínina Kimaasabaina kana,
“Yaubada tomota iwodugudi; tomotayadi koroto be vavina iwodugudi.
Aba Vatowo 1:27, 5:2
7 E tauna moe pasina koroto tamana be sinana yaidi itumasaba go, monena taiyao situyuwo 8 tauna adi taiyuwokova wowodi tayamo.Ӡ 1Ko 6:16; Epe 5:31.
Aba Vatowo 2:24
Tauna geya tuwaina kada tauyadi tomota adi taiyuwo, go sem ame tuta tauyadi wowodi tayamo. 9 Tauna avatauwa neta Yaubada nai goi ivatuyuwedi, e tomota taabu sivatumaasabēdi.’
10 Niga vada goi Yeisu mana tovatotowanayao sikaaiyaka, e ina tovatotowanayao silumadádana ina bóbwara vaisobu manuna. 11 Tauyana idigo kana,
‘Ava koroto neta monena ivaisobuyebeso bego inaidámana ituli ta vavina yaina, e bogina iroerata.† Mal 2:14-16; Mad 5:32; Luk 16:18; 1Ko 7:10-11. 12 Ago vavina neta monena ivaisobuyebeso bego inaidámana ituli ta koroto yaina, e bogina iroerata.’
Yeisu gogómana ikaipaakuyedi tetelina
(Madiu 19:13-15; Luke 18:15-17)
13 Niga tomota maniyedi natudiyao giyaidi siimemedi Yeisu yaina goi bego ibisikonedi ikaipakuyedi. Go kidi ina tovatotowanayaoyadi sitaoya sibowoidi kadi,
‘Taabu kononōina Yeisu yaina.’
14 Go kina Yeisu igitedi, gamona igoyo, idigo kana,
‘Gogomanayadi taabu kosanaabodēdi, go sem kotagonēdi sima yaigu. Tomota nuwotookaidi ame tauyadi nakae Yaubada ina kalibúbuna sinaena goi bei sisiu. 15 Ame moitamo, tauna ame alatuuwokoimi konōve: Avatauwa komi neta Yaubada ina kalibúbuna kouuyaone gogómana nakae, e itoboinemi alibubunayana sinaena goi kosiu.’† Mad 18:3.
16 Tuwo gogomanayadi ivayavaudi go, dabadi iyoisidi, e ikaipakuyedi.
Toesaesa ina lumadádana yawoina vata manuna
(Madiu 19:16-30; Luke 18:18-30)
17 Niga Yeisu itaoya bego ina go, koroto tayamo ilokoina ima Yeisu matana goi aena ivatugúyala, idigo kana,
‘Tovatulúkwana, kom todedevim. Ava guinuwa aguuinuwe bei yawoigu vata ababane?’
18 E kina go Yeisuyana idigo kana,
‘Kaga unana bego kuvayokoigu yau todedevigu? Tayamo anetava todedevina go, moe Yaubada. 19 Yaubada ina lovina bogina kuyaagoidi ae? Idigo kana,
“Taabu kokaaumāta; taabu korooerāta; taabu kovaaināwana; taabu kotalavaita polapōla; taabu koovāobuna; tamamiyao be sinamiyao kowowooinēdi.” ’† Mad 15:4; Mak 7:10; Epe 6:2.
Tateta 20:12-16; Atukeda 5:16-20
20 ‘Tovatulúkwana, moe lovinayadi madabokiidi lavayana yau boi gómana go, ima ame tuta, bogina akabikaaonedi’, korotoyana kaena.
21 E kina go Yeisu idobala korotoyana idumaakavate go, imatakoiye, e idigo kana,
‘Go tayamo guinuwa kukiseeyeseye. Kūna konam liliudi kwaigimonēdi go, maisadi kwabīdi, kūna tookaidi yaidi goi kwaiguyauyēdi, e yábana goi bei kom mam esaesa. Kwaiguyauyedi ikavava, kūma kusabokuuliyēgu.’
22 E kina go korotoyana nukotona taitáiya iuyoi Yeisu ina livala pasina, tuwo mana nuwomou ina. Bogina kuyagoi. Tauyana konana badabadaidi go, nukotona iyoi.
23 E Yeisu imatavilavila go, ina tovatotowanayao ilatuwokoidi idigo kana,
‘Kidi madi esaesa idi siu Yaubada ina kalibúbuna goi moumou isaki.’
24 E kidi go ina tovatotowanayaoyadi ina livala pasidi nukotodi siwowówana. E Yeisu aiyuwoina ilatuwokoidi idigo kana,
‘Natugowo, Yaubada ina kalibúbuna ana siu moumou isaki. 25 Kameri yoguyogu gagaina, tauna geya itoboineyeta siláluma taporaina goi isiu ae? Ago toesaesa nakae. Bego Yaubada ina kalibúbuna sinaena goi sisiu go, geya itoboinedita, geya toina.’
26 E tauyadi nukotodi siwówana gagaina toina ina livala pasidi, tauna taudiva sibobóbwara kadi,
‘Iyaa! Neta toesaesa geya itoboinedita yábana goi sisiu, avatau itoboine ana yava ibabane?’‡ Kidi Diyuu sinuwonúwana esaesa moe aba kinana bego Yaubada toesaesa iuyaone. Tauna esaesayana moe Yaubada ina yabobona tauyana yaina. Avatauwa neta Yaubada iyabobonedi, e nakae bei iyavedi. Neta toesaesa geya itoboinedita sisiu, nakona geya vatau tayaamo itoboine isiu. Moe pasina Yeisu ina tovatotowanayao nuwodi siwówana.
27 Yeisu iipotedi go, idigo kana,
‘Tomota yaidi goi moe geya itoboineyeta, go sem Yaubada yaina goi itoboine. Moitamo. Yaubada yaina goi kaga liliuna sikakapu.’
28 Go kina Pita idigo kana,
‘Go kai bei manakaema? Kai kaga liliuna yaima bogina kakalavedi go, kama kasabokuuliyem.’
29 Yeisu idigo kana,
‘Moitamo kaga liliuna bogina kokalavedi go, ame alatuuwokoimi konōve: Avatau neta ina vada o senao o niunao o sinana o tamana o natunao o ina kaba lovina ikalavedi yau pasigu be nakae Vala Dedevina pasina, 30 e ame tuta goi ana katumapu ivakaigaga toina bei ibabane. Nakae vada, senao, niunao, sinanao, natunao be aba lovina go, moe mou taiyao bei ibabanedi. Ago tuta imamaima yawoina vata bei ibabane. 31 E badabadaidi ame tuta toolagaidi go, nava bei tauyadi toosobudi. Badabadaidi ame tuta toosobudi go, nava bei tauyadi toolagaidi.’† Mad 20:16; Luk 13:30.
Yeisu ina kámasa ana talavaita aitonina
(Madiu 20:17-19; Luke 18:31-34)
32 E Yeisu mana tovatotowanayao situko sinonoina Yerusalema manuna go, enao goi Yeisu ivakumgo inonoina. Kidi ina tovatotowanayaoyadi siyagoi Yeisu latuwona ina Yerusalema, tauna nukotodi siwówana. Ego boda Yeisu mlina sisabookuliye simatoita. E enao goi sinonoina go, Yeisu ina tovatotowanayao yawou aiyuwo aiyuwoina aditava iduduwedi sima, ilatuwokoidi kaga kaga bei siisowóduwo yaina. 33 Idigo kana,
‘Konovēgu. Ame tuta tatukotuko Yerusalema manuna go, maeko goi tomota tayamo bei itaoya Tomalatomota inuwotuluye Tonúwala Gagaidi be nakae Yaubada ina Katukeda ana tovatulukwanayao nimadi goi, gobe Tauyana sitakino ámasa goi. Sitakino ikavava, Tauyana bei sikabi, Totuyoyowo nimadi goi siyato. 34 Ago kidi Totuyoyowoyadi bei sivaponuponuye, sigiwoli, sidabi be nakae sikaumate go, maliyalina aitonina goi bei itaoyamna.’
Yemesa be Iyoni idi kawanoi tetelina
(Madiu 20:20-28)
35 E Sebedi natunao, Yemesa be Iyoni, sima Yeisu yaina sidigo kadi,
‘Tovatulúkwana, latuwoma bego kaga kakawanoiye yaim, e kom kuguinuwe manuma.’
36 ‘Kaga latuwomi aguinuwe manumi?’ Yeisu kaena.
37 E tauyadi kadi,
‘Neta kutagonēma bego tutayana im kalibúbuna goi am káeyana kuvagitakoe, latuwoma kai katusobu kébana dedevidi kikim, tayamo kakataim go, tayamo kekelim.’
38 E kina go Yeisu idigo kana,
‘Imi kawanoi ana yagoina komi geya koyagoiyeta. Gedageda keigaina goi bei anim go, manakae? Komi itoboinemi nakae konim, gea geya? Nakae gedageda ivakaigaga bei alotowo go, manakae? Komi itoboinemi nakae kolotowo, gea geya?’† Luk 12:50.
39 ‘Itoboinema’, kaedi.
E kina go Yeisu idigo kana,
‘Moitamo. Keigayana goi bei anim komi bei konim. Aiyuwoina gedagedayana bei alotowo, komi bei kolotowo. 40 Go yau geya agu lovinamo alovina bego avatau kakataigu o kekeligu goi itusobu, go sem aba tusobuyadi Yaubada bogina ikatubayasidi tauyadi kiinavaidi manudi.’
41 Ago tutayana ina tovatotowanayao yawou sinove kaga sediyao Yemesa be Iyoni sikawaanoiye, e siegamogamoguyedi. 42 Tuwo yawou aiyuwo Yeisu iduduwedi sima ilatuwokoidi idigo kana,
‘Bogina koyagoi tauyadi tomota sikiinanedi Totuyoyowo adi tolovinayao siilovina makimaki Totuyoyowoyadi yaidi goi. Nakae toolagaidi idi lovina toogagaina siguuinuwe makimaki tomota yaidi.† Luk 22:25-26. 43 Ago komi yaimi moe nakae geya, go sem avatauwa yaimi goi bego toolagaidi, tauyadi itoboinedi komi ami tovaitayao nakae silovina.† Mad 23:11; Mak 9:35; Luk 22:26. 44 Nakae avatauwa yaimi goi bego toosakidi, tauyadi itoboinedi idi lovina goi komi liliumi yaimi imi pakonayao nakae.† Mak 9:35. 45 Tomalatomota nakae, tauna komi nakae itoboinemi. Tauyana ima geya kada bego tomota sivaite geya, go sem Tauyana ima bego tomota ivaitedi. Yawoina moe tomota adi kaba tateta go, yawoinayana toinina ikasale ámasa goi, tomota liliudi adi katumapu.’
Yeisu tokebo yoina Batimiyo ikideedevine tetelina
(Madiu 20:29-34; Luke 18:35-43)
46 Niga Yeisu mana tovatotowanayao sima Yeriko. Tutayana Yeriko sikalave, boda gagaina taiyao sinonoina go, tokawanoi tayamo ma matakebokeboina enao kikina goi iitusobu iiduduwo; tauyana Timiyo natuna yoina Batimiyo. 47 Tauyana vala inove bego Yeisu guma Nasareta ikaaiyaka. Tuwo iduduwo idigo kana,
‘Yeisu, Devida tubuna, kunuwokapisiyēgu!’
48 Go tomota maniyedi sikaaiyaka tokeboyana siboove kadi,
‘Kom kumaigāu!’
Go kina tokeboyana tuwaina iiduduwo kana,
‘Devida tubuna, kunuwokapisiyēgu!’
49 Tuwo Yeisu itaoya idigo kana,
‘Tauyana kodudūwe ima.’
Tuwo moitamo sina tokeboyana siduduwe sidigo kadi,
‘Tauyana iduuduwem. Tauna kwatepātu go, kutāoya!’
50 E moitamo ana tanigo inisi ikalave go, ikabitaotaoya ima Yeisu yaina goi. 51 Ima, Yeisuyana idigo kana,
‘Kaga go bei avekoim?’
‘Tovatulúkwana toolagaim, bego agita dókana’, tokeboyana kaena.
52 Yeisu idigo kana,
‘Kūna im kasa. Im numisa pasina bogina matam sidedevina.’
Tuwo mainao igita dókana, e ivatowo enao goi Yeisu isabokuliye.
†10:11 Mal 2:14-16; Mad 5:32; Luk 16:18; 1Ko 7:10-11.
†10:19 Mad 15:4; Mak 7:10; Epe 6:2.
‡10:26 Kidi Diyuu sinuwonúwana esaesa moe aba kinana bego Yaubada toesaesa iuyaone. Tauna esaesayana moe Yaubada ina yabobona tauyana yaina. Avatauwa neta Yaubada iyabobonedi, e nakae bei iyavedi. Neta toesaesa geya itoboinedita sisiu, nakona geya vatau tayaamo itoboine isiu. Moe pasina Yeisu ina tovatotowanayao nuwodi siwówana.
†10:43 Mad 23:11; Mak 9:35; Luk 22:26.