2
OKurisito oku musalabba
1 Atyanu boluganda, owenaizire egimuli okulaabba amawuliro agʼekyama kya Kibbumba, tinakoleserye bibono ebyobukugu ebigosi ooba ebiraga biti ndi nʼamalabuki mangi. 2 Ekyo kityo olwakubba owenabbaire na inywe eeyo nasalirewo okutayegesya oku bintu ebindi byonabyona, okutoolaku ebikwata oku Yesu oKurisito ogubasukireku amafuta era ogubakomereire oku musalabba. 3 Kale owenabbaire na inywe eeyo, nabbaire munafu nga mbona tinsaanira era nga ntukuta ino olwʼokutya.2:3 Bik 18:9 4 Era omu ntumula yange nʼomu kulaabba kwange egimuli, tikwabbaire kwʼebibono ebyobumanyi ebyamalabuki agʼobuntu era ebisendasenda, neye byabbaire bibono ebiraga biti oMwoyo wa Kibbumba akola nʼamaani. 5 Kale nakolere ntyo kaisi okwikirirya kwanywe tikwasinzirira ku malabuki ga bantu-buntu, neye ku maani ga Kibbumba.
Amalabuki agazwa eeri oKibbumba
6 Waire nga mbakobeire ntyo neye abakulu omu mwoyo ibo tubakobera Mawuliro agamalabuki agazwa eeri oKibbumba, nga timalabuki agʼabuntu-obuntu, waire agʼabafugi bʼoku kyalo abaaba okujigirika. 7 Neye tubakobera ku Mawuliro agʼekyama kya Kibbumba, ago ageyabisire oku bʼemirembe egyabitire. Era ago oKibbumba yasalirewo nʼagategeka ira ngʼakaali okubbumba ekyalo, ati niigo aMawuliro agalitusunisya ekitiisya kyaiswe. 8 Era mpaawo kadi moiza oku bafugi abʼoku kyalo kunu eyagategeire, olwakubba singa bagategeire, tibandikomereire oMusengwa oYesu owʼekitiisya oku musalabba. 9 Neye ngʼowebakiwandiikire bati:
“Ebyo abantu bonabona ebibatabonangaku,
era ebibatawulirangaku,
era omuntu kadi moiza ebyataseegangaku ati byezya okubbaawo,
niibyo oKibbumba ebiyategekeire abo abamutaka.”2:9 Isa 64:4
10 Neye iswe, oKibbumba yatumanyikisirye amawuliro agʼekyama ekyo ngʼakolesya oMwoyowe. Ekyo kityo olwakubba oMwoyo anoonererya buli kintu, nʼebyo ebibise oKibbumba ebiyategekere. 11 Aale mpaawo omuntu amanya ebiseego bya muntu ogondi, okutoolaku omwoyo gwa muntu oyo onyere niigwo ogubimanya. Nʼomu ngeri enanyere eyo mpaawo muntu amanya oKibbumba ebyaseega okutoolaku oMwoyo wa Kibbumba onyere. 12 Atyanu iswe oKibbumba tiyatuwaire mwoyo oyo abba omu bantu abaseega ebyʼoku kyalo, neye yatuwaire Mwoyowe oyo eyazwire egyali, kaisi tutegeere ebyo oKibbumba ebyatugabira obwereere.
13 Nʼolwekyo ebibono ebitubakobera titukolesya malabuki ga bantu-obuntu. Neye tubakobera biibyo oMwoyo wa Kibbumba ebyatukobera, era amazima oMwoyo oyo agatuwa tugasonzolera abo abakolera oku bya Mwoyo wa Kibbumba. 14 Neye omuntu abula oMwoyo wa Kibbumba, tayezya okwikirirya ebya Mwoyo nago, olwakubba abibona ngʼebyʼobusirusiru, era tayezya okubitegeera. Ekyo kityo olwakubba omuntu aali nʼoMwoyo wa Kibbumba niiye abyekalikica era nʼabitegeera kusani. 15 Iye aali nʼoMwoyo wa Kibbumba yeekalikica byonabyona era nʼabitegeera, neye iye abula oMwoyo nago tayezya okwekalikica nʼategeera enseega ya muntu aali nʼoMwoyo. 16 Ekyo kituuce era ngʼowebakiwandiikire bati:
“Naani amaite oMusengwa ebyaseega kaisi amulaabbire?”
Neye iswe tuseega oku bintu ngʼoKurisito owabiseegaku.2:16 Isa 40:13