1 Kale mubonere ku ninze, nga zena owembonera oku Kurisito.11:1 1Ko 4:16; Baf 3:17

2 Atyanu, mbasiima olwakubba mwewukirya buliijo ebintu byonabyona ngʼowenabeegeserye era ni mukwata nʼenjegesya kusani nakimo ngʼowenabeegeserye. 3 Neye ntaka mutegeere muti oKurisito niiye omutwe gwa buli musaiza, era omusaiza niiye omutwe gwa mukaliwe, era oKibbumba niiye omutwe gwa Kurisito. 4 Kale omusaiza yenayena owaasaba oKibbumba, ooba owaatuuca oku bantu obukwenda obuzwa eeri oKibbumba ngʼabwikireku omutwegwe, aswaza omutwegwe. 5 Neye omukali yenayena owaatabwikaku omutwegwe ngʼasaba oKibbumba, ooba ngʼatuuca oku bantu obukwenda obuzwa eeri oKibbumba, aswaza oibaaye. Ekyo kityo olwakubba omukali oyo abbeera nakimo ooti amo amweireku*11:5 Okumwaku omukali enziiri, kaabbanga kamanyiciryo ka kuswaza mukali oyo. enziiri. 6 Kale omukali owaatabwikaku omutwegwe, ali nʼokumwaku enziirigye. Neye olwakubba omukali owamwaku enziirigye, ooba owagipyekulaku kiswaza, ali nʼokubwikangaku omutwegwe.

7 Neye omusaiza iye tasaaniire okubwikaku omutwegwe ngʼasaba oKibbumba, olwakubba omusaiza bamubbumbire mu kifaananyi kya Kibbumba era niiye alaga ekitiisya kya Kibbumba. Wazira omukali iye alaga kitiisya kya musaiza.11:7 Nta 1:26-27 8 Ekyo kityo olwakubba oKibbumba tiyabbumbire omusaiza ngʼamutoola mu mukali, neye omukali niiye oguyabbumbire ngʼamutoola omu musaiza.11:8 Nta 2:18-23 9 Era omusaiza tibamubbumbiire mukali, neye omukali niiye ogubabbumbiire omusaiza.

10 Nʼolwekyo era nʼolwʼabamalaika okumanya, omukali asaaniire okubwikangaku omutwegwe ngʼakamanyiciryo akalaga kati oibaaye amufuga. 11 Waire nga kityo, neye era omu Musengwa, omukali taliwo kululwe yenkani neye lwokubba omusaiza aliwo, era nʼomusaiza taliwo kululwe yenkani neye lwʼokubba omukali aliwo. 12 Ekyo kityo olwakubba ngʼomukali eyasookere owebamubbumbire kuzwa mu musaiza, atyanu buli musaiza, azwa mu mukali. Neye era buli kimo kizwa eeri Kibbumba.

13 Aale inywe abananyere musalewo, kibba kisa omukali okusaba oKibbumba nga tabwikireku omutwegwe? 14 Olwo inywe timukimaite muti tikyobuntu era kiswaza omusaiza owaabbaaku enziiri empaavu oku mutwe? 15 Neye tete omukali iye owaabba nʼenziiri empaavu oku mutwe kibba kitiisya kyʼomukali oyo. Ekyo kityo olwakubba enziiri bagimuwaire gyʼokubwika ku mutwegwe. 16 Neye omuntu yenayena owaabba ngʼataka okunjakanisya omu nsonga eyo, ekimmukobera kiri kiti, iswe waire abʼekanisa ya Kibbumba tubula nkola gendi egitukolesya omu kusinza.

17 Neye atyanu ebikwata oku nsonga eenu timbasiima, olwakubba owemukumbaana tibibba bisa, neye bibba bibbibibbi. 18 Era ekisookera nakimo, mpulira mbu inywe owemukumbaana okusinza ngʼekanisa, mugabukanamu. Era ekyo zena nkiikiriryakuumu. 19 Ekyo kityo olwakubba okugabukanamu kuteekwa kubbaawo mwinywe kaisi abatuukana mwinywe bamanyikane.

20 Inywe atyanu owemukumbaana okusinza, ekyo ekimulya tikiinulo kya Musengwa. 21 Ekyo kityo olwakubba inywe owemubba mulya, buli muntu alya kyokulyakye. Era abamo bazwawo nʼenzala, nʼabandi nga ibo bateemeire. 22 Olwo mukola mutyo olwakubba mudamba bisito ebyokuliirangamu nʼokunywerangamu? Ooba munyooma bʼekanisa ya Kibbumba abanaanywe, era nʼokuswaza abo abadamba ebyokulya? Mbakobe niki? Olwo mbasiime olwʼekyo? Kadi, tinabasiime.

23 Ekyo kityo olwakubba oMusengwa oYesu ebintu ebiyanjegeserye zena niibyo ebinabeegeserye inywe. Nabakobere nti oMusengwa oYesu, omu kiire kidi ekibamuliriiremu olukwe, yatoire omugaati, 24 ni yeebalya oKibbumba, kaisi nʼaguvunavunamu, era nʼakoba ati, “Gunu niigwo omubiri gwange ogumpaayo okulwanywe. Mukolenge kinu olwa kunjewukirya.” 25 Ekiinulo owekyawoire, nʼabawa ekikopo ekyʼenviinyo omu ngeri enanyere eyo, ngʼakoba ati, “Ekikopo kinu niiryo eisaaye lyange erikakasa endagaano eya Kibbumba empyaka. Mukolenge ekyo, era buli owemwakinywangaku, mukinywengeku olwʼokunjewukirya ninze.”11:25 Kuz 24:6-8; Yer 31:31-34 26 Ekyo kityo olwakubba buli owemulya oku mugaati ogwo, era buli owemunywa oku kikopo ekyo, mubba mulaabba eeri abantu amazima agʼokufa okwa Musengwa oYesu paka oluyaliirira.

27 Nʼolwekyo buli alya oku mugaati ogwo, ooba anywa oku kikopo ekyʼenviinyo ekyo ekya Musengwa oYesu omu ngeri etesaaniire, oyo yalibba abbengere omusango oku mubiri nʼokwisaaye lya Musengwa oYesu. 28 Kale atyanu omuntu asookenge kwekebera, kaisi nʼalya oku mugaati ogwo era kaisi nʼanywa oku kikopo kyʼenviinyo ekyo. 29 Ekyo kityo olwakubba singa abantu tibabona amakulu agʼomubiri gwa Musengwa oYesu owebabba balya omugaati ogwo era nga banywa oku kikopo ekyʼenviinyo ekyo, beereetaku musango. 30 Kagira mwinywe mulimu bangi abalwaire nʼabanafu omu mibiri, era bangi abafiire. 31 Neye singa tusooka ni twekebera, oKibbumba tiyanditusaliire omusango. 32 Neye oMusengwa oKibbumba owatusalira omusango atugolola, kaisi oku nkomerero omusango tigwatusingira aamo nʼekyalo.

33 Kale boluganda, owemukumbaananga aamo okulya, mukuumanganenge. 34 Era singa wabbaawo enzala ogweruma, asookenge kulya ngʼakaali ali ika, kaisi owemukumbaana aamo nandi kibazweramu Kibbumba kubasalira musango. Ebindi bidi ebimwampandiikireku, nalibakobera ekyokukola nga njizire.