EBBALUWA ESOOKA
OYOKAANA
EGIYAWANDIIKIRE
Enyanjula
Ebbaluwa ya Yokaana esooka, omutume oYokaana niiye eyagiwandiikire akati wʼomwanka 50-100 nga bamalire okubyala oKurisito. OYokaana yawandiikire ebbaluwa eenu eeri baikirirya bonabona. OYokaana tiyeetoolayo nga niiye omuwandiiki, neye empandiika omu bbaluwa eenu era kumpi efaanana nʼempandiika eeri omu kitabo aMawuliro aMasa ngʼoYokaana oweyagawandiikire. Nʼekindi, ensuula esooka omu bbaluwa eenu eraga eti, omuwandiiki yaboineku obwomi era nʼokuzuukira kwa Kurisito (1:1-3). Nʼolwekyo abantu abakira obungi baikikirirya bati oYokaana niiye yawandiikire ekitabo kyʼaMawuliro aMasa, nʼebbaluwa eisatu egiriku eriinalye, era bati yagiwandiikire ngʼali mwEfeeso.
Ekigendererwa kya Yokaana omu kuwandiika ebbaluwa eenu, kyabbaire kutaka kukubiriza baikirirya babbe nʼenkolagana ensa akati waabwe nʼoKibbumba aamo nʼoMwanawe oYesu Kurisito. OYokaana yawandiikire ebbaluwa eenu, omu kiseera ekanisa oweyabbaire nʼobugosi okuzwa eeri ekibbula kyʼabantu abebeeta bati “Bagonositiki.” Abantu abo babbaire baikirirya bati, oYesu yabbaire nakimo Kibbumba neye bati tiyabbaire dala muntu aali nʼomubiri oguli nʼeisaaye ngʼali oku kyalo. Nʼolwekyo oYokaana awandiika ekikwata kwiye okubba omujulizi eyaboineku nʼamaiso obwomi bwa Yesu, era ati engalogye gyakwaite oku Yesu (1:1-3).
Engeri egibyecaanamu
1. Okwanjula 1:1-4.
2. OKibbumba kitangaala 1:5–3:10.
3. Ekiragiro kyʼokutakangananga 3:11–5:12.
4. Ebibono ebisembayo 5:13-21.
1
EKibono ekyʼobwomi
1 Mbawandiikira ku yooyo ogubeeta oKibono iye onanzwa wʼobwomi. Iye oyo nago eyabbairewo okuzwera nakimo eira omu kubbumba ekyalo. Era oyo iswe banu ogutwawulisisiryeku, era ni tumubonaku nʼamaiso gaiswe, era ni tumwekalikica era nʼokumukwataku ni tumukwataku nʼengalo gyaiswe.1:1 Yok 1:1 Ekikoba kiti oyo, iswe banu ogutulaabba. 2 Era oyo iye nago onsulo wa bwomi oweyaikire oku kyalo kunu, twamuboine era iswe tumwijululaku era gutuli kulaabba egimuli tuti iye niiye agaba obwomi obutawaawo. Cooka iye enyumaku eedi, yeebbeeranga giri Iteeye, neye yairire nʼaiza yeeragisya egituli.1:2 Yok 1:14 3 Kale tulaabba egimuli ku yoodi ogutwaboineku era ogutwawulisisiryeku, kaisi oolwo nywena mwezye okubba nʼenkolagana na iswe nga swena owetuli naiyo nʼoKibbumba iye oItewaiswe aamo naye nago oMwanawe oYesu Kurisito. 4 Era ebyo tubibawandiikira kaisi oolwo eisangaalo lyaiswe*1:4 Ooba, Lyanywe. libbe mu bwizulye.
OKibbumba ayaka ooti kitangaala
5 Kale obukwenda owetwawuliire okuzwa egiri oYesu Kurisito, era obutulaabba egimuli niibwo bunu buti: OKibbumba ayaka ooti kitangaala era egyabba tiwabbakuuwo kandikiirya kadi katyayi kati. 6 Nʼolwekyo singa owetukoba tuti tuli nʼenkolagana aamo nʼoKibbumba kaisi tete ni twira kukolanga bikole ebibbibibbi ebiraga endikiirya, awo-so tubba babbeyi, era tubba titukolera ku mazima ga Kibbumba. 7 Neye owetutambulira omu kitangaala ooti kiikyo oKibbumba ekyayaka, mwiswe tubba tulimu nʼenkolagana eyaiswe aamo, era eisaaye lya Yesu iye oMwanawe, iryo lyaba nga litunaabyaku nabuli kibbikibbi.
8 Nʼolwekyo, singa owetukoba tuti tubula ekibbikibbi omu myoyo gyaiswe, tubba tubbeyesya, era nga tubulamu nʼamazima. 9 Neye owetubbutula tuti tuli nʼekibbikibbi, iye oKibbumba mwesigwa era iye tiyeekubbira era atusoniya, era nʼatusuuca abakenene okuzwa omu byʼobutali butuukirirye. 10 Era singa owetukoba tuti titukolangaku ekikole ekibbikibbi, tubba tusuucirye oKibbumba mubbeyi, era nga nʼekibonokye kibula omu bwomi bwaiswe.