EBBALUWA ESOOKA OPAWULO EGIYAWANDIKIIRE
ABʼE SESALONIKA
Enyanjula
Ebbaluwa eenu esooka eeri abʼe Sesalonika, omutume oPawulo niiye eyawandikiire abaikirirya abʼomu kibuga ekyʼe Sesalonika (1:1). Era eri ooti niiyo ebbaluwa oPawulo egiyasookere okuwandiika omu bbaluwagye gyonagyona. Yagiwandiikire mu mwanka gwa 51 nga bamalire okubyala oKurisito. Ekanisa eyo eyʼomu Sesalonika, oPawulo onyere niiye eyagitandiikire oweyabbaire omu lugendolwe olwokubiri (Bik 17:1-10). Ekanisa eenu yabbairemu aBayudaaya era nʼaBayonaani bangi. Yagiwandikiire ebbaluwa eenu ngʼali Kolinso.
OPawulo oweyamalire okutandiika ekanisa omu Sesalonika, tiyeezyerye okubbaayo eibbanga eriwanvu, nʼolwekyo yabaweereirye ebbaluwa eenu kwiryamu baikirirya baayo maani. Ebbaluwa eenu erimu ebyokwegaku bingi era eri nʼebyokulungamya ebirambike nakusani ebiraga engeri oMukurisitaayo egyali nʼokubbaamu. Ekimo kwebyo ebyateekaku amaani niikyo ekyokwira kwa Kurisito, olwakubba abaikirirya abʼe Sesalonika bali ooti babbaire bataka ino ekyokwega ekyo. Nʼolwekyo, oPawulo yakikoleserye okwiryamu aBakurisitaayo amaani okubba omu bwomi oKibbumba obwasiima (5:6-8).
Engeri egibyecaanamu
1. Obusugirye eeri ekanisa nʼokwebalya oKibbumba okulwabwe (1).
2. OPawulo asonzola enkolaye era nʼamawuliro oTemuseewo ageyamutwaliire (2-3).
3. OPawulo awa ebyokulungamya engeri aBakurisitaayo egibali nʼokubbaamu nga bakuumiriire okwira kwa Yesu (4:1–5:15).
4. Ebibono ebisembayo (5:16-28).
1
Obusugirye
1 Nze oPawulo nʼoSiruvaano nʼoTemuseewo, tuwandiikira abʼekanisa eri omu kibuga ekyʼe Sesalonika, era abantu ba Kibbumba oItewaiswe nʼoMusengwa oYesu Kurisito. Tubasugiirye nga tubatakirya ekisa nʼeidembe ebizwa egiri oKibbumba, byeyongere okubba na inywe.1:1 Bik 17:1
Okwikirirya kwʼabʼe Sesalonika
2 Bulijo twebalya oKibbumba okulwanywe nywenanywena, era titugonerya okubasabira eeri oKibbumba. 3 Era nga tuli omu maiso ga Kibbumba era oItewaiswe, tumukobera ngʼowemulaga okwikirirya kwanywe omu Yesu nʼokutaka kwanywe eeri oKibbumba, mwebyo ebimukola. Era tumukobera ngʼowemulaga eisuubi lyanywe eritatiika omu kwira kwa Musengwa waiswe oYesu Kurisito.
4 Aboluganda omu Kurisito, tumaite ngʼoKibbumba abataka, era yabalonderemu mubbe babe, 5 olwakubba owetwabakobeire aMawuliro aMasa, tigabbaire mu bibono-bubono, wazira gabbairemu amaani ga Mwoyo oMweru, iye ngʼabawa okukakasira nakimo muti ebitukoba byʼamazima. Mumaite kusani ino ngʼowetwebityanga nga tuli mwinywe. Twebityanga kusani lwa kutaka kugasa niinywe, titwabakaisya obwomi bwa kwikirirya oYesu.
6 Nywena mwasengereirye empisa gyaiswe nʼegya Musengwa waiswe, olwakubba newankubbaire nga babagadirye olwʼekibono kya Kibbumba, neye mwaikiriirye aMawuliro ga Musengwa nʼeisangaalo erizwa omu Mwoyo oMweru.1:6 Bik 17:5-9 7 Mutyo ni mubba kyokuboneraku eeri abaikirirya bonabona abʼomu kyalo kyanywe, omu kitundu kya Makedooniya nʼomwAkaya. 8 Ekyo kityo olwakubba mwasalaanirye ekibono kya Kibbumba, timu Makedooniya nʼomwAkaya mwonkani, neye nʼomu bitundu bingi ino bategeire ngʼowemwikirirya oMusengwa oKibbumba. Kale iswe tikitwetaagisya kubbaaku nʼekitutumula. 9 Abantu abanyere balonsya ngʼowemwasiimire ino nga twizire e waanywe, ni muzwa oku bifaananyi, ni mwira eeri oKibbumba omutuuce era onyere obwomi mumuweereryenge. 10 Era balonsya ngʼowemukuumiriire oMwanawe okwira ngʼazwa omwigulu, oguyazuukizire, nga niiye oYesu atulamya obusungu bwa Kibbumba obwaba okwiza.