1 Kale nasalirewo okutaira eeyo, kaisi tikyabazweramu kunakuwala tete. 2 Aale nze singa mbazweraku ni munakuwala, naani abba eyansangaalya nga tiniinywe abemba nnakuwairye? 3 Era ekyagirire ni mbawandiikira ntyo, natakire nti owenaabba njirire eeyo, tinasuna eeyo bantu kunnakuwalya, ibo abandibbaire nga bansangaalya. Era nabbaire nʼobukakafu nti mba musangaali singa nywenanywena mubba basangaali. 4 Ekyo kityo olwakubba nabawandikiire ebbaluwa eyo nga ndi omu kunakuwala okwʼamaani, era nga nʼomwoyo gwange gwizwire enima, era nga nkunga amaliga mangi. Neye okubawandiikira, tikyabbaire kubanakuwalya, wazira natakire kubalaga nti mbataka ino.

5 Atyanu owekibba kiti waliwo eyanakuwairye omwinaye, omuntu oyo tiyanakuwairye ninze zenkani, neye owemba timbeyere, yanakuwairye ino niinywe nywenanywena.2:5 1Ko 5:1-2 6 Ikyo ekibonerezo abantu abakira obungi ekibamutekereku kimumala. 7 Wazira atyanu inywe, musaaniire kumusoniya nʼokumwiryamu maani, olwakubba enima edemba nʼemubitiriraku nʼazweramu nakimo omu kwikirirya. 8 Nʼolwekyo mbegairira, mumulage muti mumutaka. 9 Era inywe nabawandikiire ebbaluwa eyo nga mbagezesya kutaka kumanya nga mwabba bagondi mu buli kintu ekimbakoba. 10 Era singa musoniya omuntu yenayena, nze zena mmusoniya. Era oKurisito nga niiye omujulizi wange, owekibba kiti dala waliwo ekintu kyonakyona ekyetaaga okusoniya, nkisoniyire okulwanywe. 11 Nze nkolere ekyo, kaisi oSitaani tasuna akakisa okutusendasenda, olwakubba tumaite enkwegye.

12 Atyanu owenaabire omu kibuga e Tulowaasi okulaabba eeri abantu aMawuliro aMasa aga Kurisito, oMusengwa oYesu yabbaire anjiguliirewo enzira okulaabbayo. 13 Neye omwoyo gwange tigwawumwire, olwakubba tinayajiiryeyo owoluganda oTito. Kale naseebwire-buseebuli abantu baayo, ni njiza mwitwale lyʼe Makedooniya.2:12-13 Bik 20:1

14 Wazira twebalya oKibbumba Iye atwezyesya buliijo okuwangula olwakubba ekintu ekimo nʼoKurisito era oKibbumba oyo atukolesya okusaalaania buli wantu aMawuliro aMasa agakwata oku Kurisito igo agali ooti mafuta agakaloosa. 15 Ekyo kityo olwakubba owetulaabba aMawuliro aMasa tubba ooti luvululu oluzwa omu kyokuwaayo oKurisito ekyawaawo eeri oKibbumba, era ni lutuuka kwabo abalokoka, nʼabo abaaba okujigirika. 16 Atyanu owetulaabba aMawuliro ago eeri abo abaaba okujigirika, kwibo gabba ooti kivundi kya lumbe ekibaleetera okufa nʼokujigirika. Neye aMawuliro ago eeri abo abalokoka, gabba ooti luvululu oluleeta obwomi. Aale kale naani atuukana nʼokukola omulimo ogwo? 17 Iswe tituli ooti bantu abakira obungi*2:17 Ooba, Abantu abandi. abemumaite, abalaabba ekibono kya Kibbumba nga beenooneryamu byobusuni. Wazira iswe omu Kurisito tutumula mazima omu maiso ga Kibbumba, ngʼabantu abatume okuzwa eeri oKibbumba.