EBBALUWA EYOKUBIRI OPAWULO EGIYAWANDIKIIRE
ABʼE SESALONIKA
Enyanjula
Ebbaluwa eyokubiri eeri abʼe Sesalonika, omutume oPawulo niiye eyagiwandikiire abaikirirya abʼomu kibuga kyʼe Sesalonika (1:1). Yawandiikire ebbaluwa eenu mangu nga yankamala okubawandiikira esooka, omu mwanka gwa 51 awo nga bamalire okubyala oKurisito. OPawulo yawandikiire ekanisa yʼabʼe Sesalonika ebbaluwa eenu ngʼakaali ali Kolinso.
Ekanisa eyʼabʼe Sesalonika eteekwa okubba yabbaire efa ku bwomi bwʼebiseera ebisembayo, nʼokwira kwa Kurisito. Abantu abandi babbaire nga tibafaayo okukola emirimo egyokubeemereryawo. OPawulo omu bbaluwagye ginu egiyawandikiire abʼe Sesalonika, yawandiikire ebintu bingi ebikwata oku kwira kwa Kurisito. Era kumpi kitundu kyʼebbaluwa eenu kikwata ku bwomi bwʼoMukurisitaayo omu biseera ebyʼenkomerero. OPawulo agaana abantu okulera engalo. Era akoba ati buli muntu aali nʼokukolerera ekyokulyakye (3:6-10).
Engeri egibyecaanamu
1. Obusugirye eeri ekanisa 1:1-2.
2. OPawulo yeebalya oKibbumba olwʼekanisa 1:3-12.
3. OPawulo atumula oku bwomi bwʼebiseera ebyʼenkomerero 2:1-17.
4. OPawulo agaana abantu okulera engalo era alaabbira abantu okukola (3:1-15).
5. Ebibono ebisembayo (3:16-18).
1
Obusugirye
1 Nze oPawulo, nʼoSiruvaano nʼoTemuseewo, tuwandiikira abʼekanisa eyʼomu Sesalonika, abantu ba Kibbumba oItewaiswe nʼoMusengwa oYesu Kurisito. 1:1 Bik 17:1 2 Tubasugiirye ino nga tubatakirya ekisa nʼeidembe ebizwa eeri oKibbumba oItewaiswe nʼoMusengwa oYesu Kurisito bibbe na inywe.
Okugumya abaikirirya
3 Aboluganda, twebalya oKibbumba buliijo okulwanywe. Ekyo tusaaniire okukikola olwakubba okwikirirya kwanywe omu Yesu kweyongeire ino okukakata, era nʼokutaka buli moiza okwatakamu abainaye kweyongera. 4 Nʼolwekyo twewuuja okulwanywe omu kanisa gya Kibbumba egindi. Twewuuja olwa kuguma nʼolwa kwikirirya oMusengwa oYesu okumuli nakwo nga mubita omu kubayiigaania, nʼokudamba okwa buli ngeri.
5 Okugumira okubagadya ni musigala nga mwikirirya oMusengwa oYesu kiragisya kiti oKibbumba tiyeekubbira omu kusalawokwe, olwakubba oku nkomerero kyalibabbeera okubba nga musaanira obwakabaka bwa Kibbumba obwebabagadirya. 6 Era oKibbumba omu bwenkanyabwe, yalibonereza abo ababagadya, 7 kaisi inywe abebagadya nʼabawa ekiwuumulo aamo na iswe. Ebyo byalibbaawo oMusengwa waiswe oYesu oweyalibonekera ngʼazwa omwigulu, ngʼali nʼabamalaikabe abʼamaani. 8 Omusyo ogulunkuuma gwalibbaayo era nʼabonereza abo abatamaite oKibbumba, nʼabo abagaana okwikirirya aMawuliro aMasa aga Musengwa waiswe oYesu. 9 Balibawa ekibonerezo ekyʼokudamba okwʼemirembe nʼemirembe, ni bababbinga nʼomu maiso ga Musengwa owʼekitiisya eino. 1:9 Isa 2:10
10 Ebyo byalibbaawo ku lunaku oluyaliiziraku okumuwa ekitiisya omu batuukiriryebe. Era bonabona abaikirirya balimubona nga bawuninkiriire olwʼekitiisyakye. Nywena mwalibba aamo nabo, olwakubba mwaikiriirye ebyo ebitwabakobeire.
11 Nʼolwekyo tubasabira nga titugonerya eeri oKibbumba waiswe, ababale ngʼabasaaniire ekyo ekiyabeeteire ekyʼokubba omu bwakabakabwe. Era tusaba tuti, omu bwezyebwe, atuukiriryenge ebintu ebisa byonabyona ebimumaliriire okukola, nʼebyo ebimukola olwa kwikirirya kwanywe. 12 Kaisi oolwo oMusengwa waiswe oYesu asune ekitiisya mwinywe, na inywe oKibbumba abawe ekitiisya mwiye. Ekyo kyalibba kityo olwʼekisa kya Kibbumba waiswe, nʼoMusengwa oYesu Kurisito.