1 Awo oYesu nʼakoba abeegibe ati, “Ninze ekitina kyʼomuzabbibbu ogunanyerenyeere, kaisi oBbaabba niiye omulimi waagwo. 2 Ansalaku buli isaga erindiku eritaneneka neenu nga waasalira*15:2 Waasalira, Ooba, Waayonja. lidi erineneka kaisi lyezye okubala ino. 3 Kale inywe atyanu muli batukulye ooti masaga omulimi agaamalire okusalira olwakubba mwaikiriirye obukwenda obunalaabbire egimuli. 4 Aale musigale nga muli bumo na nze, era zena nga ndi bumo na inywe. Ekyo kityo olwakubba mpaawo isaga erineneka okulwalyo. Liri nʼokubba ku kitina kaisi ni lineneka. Kale nywena timwezya kukola ebikole oKibbumba ebyabasuubiriramu nga timuli bumo na nze.”

5 Awo ni yeeyongera ati, “Ndi ooti kitina kyʼomuzabbibbu, kaisi inywe ni mubba ooti masaga. Kale omuntu owaabba obumo na nze kaisi zena ni mba obumo naye akola ebikole ebisa bingi. Iye oyo abba ooti masaga agali oku muzabbibbu agabala ebineneka ebingi. Era anambula obubbeeri bwange mpaawo ekimwezya okukola. 6 Kale omuntu owaatabba obumo na nze, abba ooti isaga eribamuma eedi era ni liwotoka. Era agatyo niigo agebatoola ni bagamuma omu musyo ni gaya. 7 Neye owemubba obumo na nze, era ni musigala nga mukolera oku bibono ebimbakoba, mwezya okusaba kyonakyona ekimutaka era oKibbumba yakibawanga. 8 Kale owemukola ebikole ebisa ebingi, oBbaabba bamugulumalya era mubba mweragire muti muli beegi bange.”

9 Awo oYesu ni yeeyongera okubakoba ati, “Atyo nakimo ngʼoBbaabba owantakire, zena niiyo engeri egimbatakamu inywe. Mweyongere okubba obumo na nze kaisi neyongere okubataka. 10 Atyanu, singa owemwakwatanga ebimbalagira, zena neyongeranga okubataka. Era kityo nakimo nga zena owenkwatanga ebyo oBbaabba ebyandagira ni yeeyongera okuntaka.”

11 Awo oYesu ni yeeyongera ati, “Mbakobeire ebintu ebyo, kaisi oolwo mubbe nʼeisangaalo eriri ooti lyange erindi nalyo, era mubbe nalyo omu bwizulye. 12 Era ekiragiro kyange niikyo kinu ekiti, mutakanganenge, nga nze owenabatakire.15:12 Yok 13:34; 15:17; 1Yo 3:23; 2Yo 5 13 Mpaawo muntu aali nʼokutaka okukiraku okwʼoyo awaayo obwomibwe olwʼabakaagwabe. 14 Singa musigala nga mukola ebimbalagira mulaga muti muli bakaagwa bange. 15 Nze tinkaali mbeeta baweererya olwakubba omuweererya tamanya omusengwawe ebyakola. Wazira mbeeta bakaagwa bange olwakubba inywe mbakobeire byonabyona oBbaabba ebiyankobeire. 16 Era tiniinywe omwasalirewo okubba beegi bange, neye ninze enabalonderemu inywe era ni mbateekawo okukolanga ebikole ebisa. Kaisi awo oBbaabba ayezye okubawanga buli ekimusaba nga mubita omu liina lyange. 17 Era kinu niikyo ekimbalagira nti mutakanganenge.”

18 Kale awo oYesu ni yeeyongera okukoba ati, “Singa abantu abataikiririrya omu Kibbumba owebabacaawanga, mwewukiryenge muti basookere kucaawa ninze. 19 Kale singa mubbaire bamo kwibo nago bandibbaire babataka nga inywe abaabwe. Kiri kiti, timuli bamo kwibo wazira inywe nabalonderemu okuzwa omu bantu abo. Ekyo niikyo ekigira abo abanjakanisya ni babacaawa. 20 Aale mwewukirye ebibono ebinabakobeire nti, ‘Mpaawo mugalama abba owʼekitiisya okukiraku omusengwawe.’ Owekibba nti nze banjiigaanirye, na inywe nywena balibagadya, era ngʼowekiri nti bakwaite okwegesya kwange, nʼebyanywe byona balibikwata.15:20 Mat 10:24; Luk 6:40; Yok 13:16 21 Ibo baaba okubagadyanga olwakubba inywe muli bange, era olwakubba tibamaite oyo eyantumire. 22 Aale singa tinaizire ni ntumula nabo, oKibbumba tiyandibbaire abalumiriza olwʼekibbikibbi. Neye atyanu babula kyokuwozyeryaku olwʼekibbikibbi kyabwe. 23 Iye ancaawa acaawa nʼoBbaabba yena. 24 Aale singa tibaboine nga nkola ebyamagero ebyo omuntu yenayena ogondi ebyatakolangaku, oKibbumba tiyandibbaire abasalira omusango olwʼekibbikibbi. Neye atyanu baboine ebyamagero ebyo, kaisi era ni basigala nga batucaawa nze nʼoBbaabba. 25 Neye ebyo ibyo byokutuukirirya kibawandiikire omwIteeka lyabwe bati, ‘Bancaawire anambula nsonga.’ ”15:25 Zab 35:19; 69:4

26 Kale oYesu ni yeeyongera ati, “Omubbeeri oweyaliiza oyo ogunalibasindikira ngʼazwa egiri oBbaabba, yalikobera abantu ebinkwataku. Omubbeeri oyo nago yalibba Mwoyo atumula amazima agakwata oku Bbaabba era azwera nakimo egiri oBbaabba. 27 Era nywena muteekwa okukobera abandi ebinkwataku olwakubba mubbaire na nze kuzwera nakimo owenatandiikiire okwegesya.”