1 Olundi oYesu yagereire abeegibe olugero ati, “Wabbairewo omusaiza omusuni eyabbaire nʼomulabiriri wʼebyobusunibye ogubabbaire bakoba bati mbu adubuuda ebintu bya musuni. 2 Kale omusuni oyo nʼayeta omulabiririwe nʼamukoba ati, ‘Ebyo ebinkuwuliireku biri bitya? Onsonzolere ebikwata oku byokulabirirakwo olwakubba toyezya okusigala ngʼomulabiriri wʼebintu byange.’

3 “Awo omulabiriri ni yeebuulya omu mwoyogwe ati, ‘Atyanu niki ekinakola? Omusengwa wange ali kuntoolaku omulimo. Mbulamu kadi amaani agalima, kaisi ngʼensoni ginkwata okusabirirya. 4 Atyanu mmaite ekinakola, kaisi abantu beezye okunsangaalira omu bisito byabwe owebabba nga bambingire oku mulimo.’

5 “Kale nʼayeta buli eyabbaire nʼeibbanja lya musengwawe. Awo nʼabuulya eyasookere ati, ‘Omusengwa wange akubanza niki?’ 6 Iye nʼairamu ati, ‘Ambanza amafuta gʼemizaituuni ebidoomoolo*16:6 Omu Luyonaani bati, Bbatuusi. Ebbatuusi yaabbangamu elita kumpi 40. 200.’ Omulabiriri nʼamukoba ati, ‘Aale okwate endagaanoyo yeenu kaisi otyame mangu era ocuuse bibbe ebidomoolo 100.’

7 “Awo nʼabuulya eyairireku ati, ‘Kaisi iwe akubanza niki?’ iye oyo nʼairamu ati, ‘Ambanza engaano ensawo 100.’ Oyo yena nʼamukoba ati, ‘Aale wena okwate endagaano eiyo yeenu, era iwe ocuuse gibbe ensawo 80.’

8 “Awo omusengwawe nʼasiima omulabiririwe oyo omulyaki olwʼekikole ekyamalabuki ekyo ekyokwetegekera. Kiri kiti, abantu abataikirirya omu Kibbumba ibo balabukirabuki omu nkolagana yaabwe okukiraku ibo abantu abamwikiririryamu. 9 Kale mbakobera nti mukolesyenge obusuni bwʼoku kyalo okwesalira emikago, kaisi oolwo obusuni obwo owebwalibba nga tibukaali bugasa, oKibbumba yalibasangaalira omwigulu omu kifo kyʼemirembe nʼemirembe.

10 “Omuntu oyo iye omwesigwa omu kityayi, abba ayezya okubba mwesigwa nʼomu kinene; era nʼoyo iye atabba omwesigwa omu kityai, era abba timwesigwa nʼomu kinene. 11 Aale owemubba timuli beesigwa omu busuni obwʼoku kyalo, naani eyalibesiga omu busuni budi obunanyerenyeere obwʼomwigulu? 12 Era owemubbanga nenca timuli beesigwa omu bya bandi, naani eyalibawa ebyanywe okubwanywe?

13 “Mpaawo muweererya ayezya okuweererya abasengwa ababiri. Kiri kiti ali nʼokulaga okutaka kunene eeri omoiza okukiraku eeri ogondi; ooba yalyesibira oku moiza, nʼatala ogondi. Kale tikyezyeka okubba nʼoKibbumba aamo nʼempiiya bombi nga basengwabo.”16:13 Mat 6:24

14 Awo aBafalisaayo ababbairewo owebawuliire ebyo, ni basekerera oYesu olwakubba ibo babbaire bayayaanira eino empiiya. 15 Neye iye nʼabakoba ati, “Inywe abananyere mwetuuca okubba abasa omu maiso gʼabantu, neye iye oKibbumba amaite emyoyo gyanywe. Ikyo ekintu abantu ekibasisija bati kikulu ino, tete iye oKibbumba akitwala ngʼekyomuliko omu maisoge.”

16 Awo oYesu ni yeeyongera okubeegesya ati, “AMateeka ga Musa nʼeBiwandiike bya banaabbi niibyo ebyabbaire omu kukola paka oYokaana oMubatizi oweyaizire. Neye okuzwa oolwo, aMawuliro aMasa agʼobwakabaka bwa Kibbumba niigo agebali kulaabba egimuli, era buli muntu ayazya nʼamaani okubwingiramu.16:16 Mat 11:12-13 17 Neye kyanguku eigulu nʼekyalo okuwaawo, okukiraku akasale akatyayi eino okugotaku oku kanyukuta akamo oku Mateeka ga Musa.16:17 Mat 5:18

18 “Ekikoba kiti, singa omuntu abbinga omukaliwe, kaisi nʼaleeta omukali ogondi, abba abbengere ogwʼobulendi. Era nʼomusaiza atwala omukali oyo ogubabbingire abba abbengere ogwʼobulendi.”16:18 Mat 5:32; 1Ko 7:10-11

19 Awo oYesu nʼabagerera olugero ati, “Wabbairewo omusaiza omusuni, eyazwalanga ebizwalo ebitukuliikiriri ebisa ebyebbeeyi eino, era ngʼasiiba mu bwomi obusa buli lunaku. 20 Neye oku geeti ya musuni oyo babikiryangawo omudoobi omusabiriri, eriinalye bati Lazaalo oyo iye eyabbaire aizwire amabbwa 21 eyegombanga okulya obukunkumukira obwagwanga okuzwa oku menza yʼomusaiza omusuni oyo. Kaisi era tete embwa gyona gyaizanga ni gimukomberera omu mabbwage.

22 “Kale ekiseera kyatuukire, omudoobi oyo nʼafa, era abamalaika ni batwala omwigugwe egiri oIbbulaimu. Oluzwanyuma omusuni yena yafiire era ni bamuliika. 23 Awo ngʼali omu Kiina eKitakoma omu bulumi obungi, nʼalola omwigulu nʼalengerera eyala oIbbulaimu nga bali aamo nʼoLazaalo. 24 Kale nʼamweterera ati, ‘Bbaabba oIbbulaimu, onkwatire ekisa otume oLazaalo atimye empembi yʼolunwerwe omu maizi, kaisi aize ampolyewolyeku olulumi lwange olwakubba ndi omu bulumi bungi omu musyo gunu.’

25 “Neye oIbbulaimu nʼamwiramu ati, ‘Mwana wange, oyewukirye oti owewabbaire ngʼokaali oli mwomi oku kyalo wasunire ebisa ebibyo, ngʼoLazaalo iye ali mu kugada. Kale atyanu oLazaalo yena aanu ali mwisangaalo, wena ngʼoli omu bulumi obunene. 26 Kaisi waire wona tikiikyo, waliwo olukonko lwʼamaani akatiwo na iswe eenu, olwʼokukaisya abo ibo abataka okuzwa eenu okwiza egyoli eeyo, era nʼabataka okuzwa eeyo okwiza egituli.’

27 “Awo omusaiza omusuni nʼamukoba ati, ‘Kale aale nkwegairire bbaabba, otume oLazaalo eeri abantu bʼe ika, 28 olwakubba ndiyo nʼabaganda bange bataanu. Oleke ayabe abalabule tibeebitya ngʼowenakolanga kaisi kibabbeere bona okutaiza eenu omu bulumi obunene bunu.’

29 “Neye iye oIbbulaimu nʼamwiramu ati, ‘Bali nʼamateeka ga Musa nʼebiwandiike bya banaabbi, bawulisisye ebyo.’

30 “Kaisi tete omusaiza omusuni nʼamukoba ati, ‘Bbaabba oIbbulaimu, kadi, neye singa omuntu okuzwa omu bafu ayaba egibali, beenenya.’

31 “Neye oIbbulaimu nʼamukoba ati, ‘Oobanga tibawulira ebya Musa nʼabanaabbi ebibikoba, era batyo tibaikirirye newankubbaire wabbaawo omuntu azuukira.’ ”