1 Awo oYesu ngʼakaali ali omu Yeekaalu nʼabona abasuni nga bateeka empiiya gyabwe omu kintu kyʼebirabo omu Yeekaalu. 2 Awo era nʼabona nʼonamwandu omudoobi yena ngʼateekamu obumpiiya*21:2 Obumpiiya, omu Luyonaani bati, Leputooni. bubiri, obusembayo okubba obwʼebbeeyi entono nakimo. 3 Kale nʼakoba abeegibe ati, “Mbakobera amazima nti onamwandu omudoobi onu iye ateekeremu kinene ino okukiraku abandi badi bonabona. 4 Ekyo kityo olwakubba ibo ebirabo byabwe batoire ku busuni obubali nabwo, neye onu iye omu budoobibwe ateekeremu kyonakyona ekyabbaire nakyo ekibbaire kyʼokujejera obwomibwe.”

5 Awo abamo oku beegi ba Yesu owebabbaire batumula oku Yeekaalu ngʼowebagyombekere nʼamabbaale amasa, era ngʼowebagitimbire nʼebyokujolija ebigibonekesya nakusani, oYesu nʼakoba ati, 6 “Ebyo ebimubona, ekiseera kyalituuka, owewatalibbeerawo eibbaale kadi limo eryalisigala nga lyombeke oku liinaye. Gonagona baaba kugawumpulyagawo.”

7 Awo abeegi ba Yesu ni bamubuulya bati, “Musomesya, ebyo byalibbaawo di? Era kamanyiciryoki akaliraga kati byatira okubbaawo?” 8 Iye oYesu nʼabairamu ati, “Mwekuume, tiwaabbaawo abagotesyagotesya; olwakubba bangi baliiza nga beeyeta ninze, era nga bakoba bati, ‘Ekiseera kya Kurisito okwira kiri kumpi okutuuka.’ Timubasengereryanga. 9 Owemuwuliranga entalo nʼobwediimo, timutyanga. Ebyo biteekwa okusooka okubbaawo, neye era enkomerero tiyalituukirawo.”

10 Era awo ni yeeyongera okubakobera ati, “Eigwanga lyalirumba eigwanga erindi, nʼobwakabaka bwalirumba obwakabaka obundi. 11 Walibbaawo omusisi owʼamaani, nʼamanzala nʼokawumpuli†21:11Okawumpuli, niibwo obulwaire obwita ino abantu. omu bitundu bingi. Era walibbaawo nʼebitiisirirya nʼobumanyiciryo obwʼamaani okuzwa omwigulu.

12 “Neye ebyo byonabyona nga bikaali okubbaawo, balibakwata era ni babayiigaania. Balibawaayo okubawozesya omu makumbaaniro, nʼokubasiba omu mabbuusu. Era balibatwala omu maiso ga bakabaka nʼagʼabafugi olwʼeriina lyange. 13 Ekyo kyalibazweramu inywe abeegi bange okubatuucaaku aMawuliro aMasa. 14 Neye muli nʼokumanya muti timuli nʼokusooka okweraliikirira ekya kuwozya. 15 Ekyo kityo olwakubba nze nalibawa ebibono nʼamalabuki, abalabe baanywe ebibateezya kwakanisya waire okugaana.21:14-15 Luk 12:11-12 16 Paka nʼababyaire baanywe nʼabaganda baanywe, nʼabekika kyanywe, nʼemikago gyanywe bona balibalyamu olukwe era abamo kwinywe balibaita. 17 Abantu bonabona balibacaawa olwʼeriina lyange. 18 Neye mpaawo kwinywe eyalijigirika obwomibwe obwa mwoyo.‡21:18 EBiwandiike ebimo bikoba biti, Newankubbaire akaziiri oku mitwe gyanywe tikalijigirika. 19 Olwʼokugumira ebigosi kwanywe mwalirokoka.”

20 Awo oYesu ni yeeyongera ati, “Owemwalibona ngʼamaje geeruguuliriirye ekibuga kyʼe Yerusaalemi, oolwo nga mumanya muti bali kumpi okukijigirica. 21 Olwo abo abalibba omu Buyudaaya, bairukiranga mu nsozi, ibo abalibba omu kibuga kyʼe Yerusaalemi bakizwangamu, era abo abalibba omu byalo tibakingirangamu. 22 Ekyo kityo olwakubba ekiseera ekyo kyalibba kya Kibbumba kunyaaŋa eeri abantu bʼomu kibuga ekyo, era ekyo kyalibba kutuukirirya Biwandiike.21:22 Kos 9:7 23 Abalibba ebida nʼabalibba bayonkesya omu naku egyo, nga baligada ino! Walibbaawo okugada okwʼamaani oku kyalo kinu, nʼobulwa bwa Kibbumba oku bantu baamu. 24 Abandi balibaita nʼempiima, kaisi abandi balibatwala omu byalo ebitali bimo omu busibe, era aBatali Bayudaaya baliwamba era ni bafuga kubbikubbi ino ekibuga kyʼe Yerusaalemi paka ebiseera oKibbumba ebiyategekeire aBatali Bayudaaya okufuga, owebyaliwaaku.”

25 Awo oYesu ni yeeyongera ati, “Walibbaawo ebyewunyo okwisana nʼoku mweri nʼoku nkota. Nʼoku kyalo abantu balyeraliikirira nga batya olwʼokuwolomboga kwʼenyanza nʼokubbaapa kwʼamayengo.21:25 Isa 13:10; Zek 32:7; Yow 2:31; Kub 6:12-13 26 Abantu balibbalikaku olwʼentiisya nʼolwʼokweraliikirira ebyalibbaawo oku kyalo, olwakubba obufugi nʼebibbumbe ebyʼe ngulu omwibbanga balibitengeetya. 27 Olwo kaisi ni babona oMwana wa Muntu ngʼaizira oku bireri, era ngʼali nʼobwezye bungi nʼekitiisya ekyʼamaani.21:27 Dan 7:13; Bil 1:7 28 Kale ebyo owebyalitandiika okubbaawo, musetukanga era ni mugangamula emitwe gyanywe olwakubba okubanunula inywe, kwalibba kuli kwigereranga.”

29 Awo oYesu nʼabagerera olugero ati, “Aale mubonere oku musaale omutiini, era nʼegindi gyonagyona. 30 Owemubona nga gikunkumuka nga mumanya muti ebiseera ebyʼensaaca biigereire. 31 Nʼomu ngeri enanyere eyo, owemubonanga ebyo ebimbakobeire nga biri kubbangawo, mumanyanga muti obwakabaka bwa Kibbumba bwigereire.”

32 Awo oYesu ni yeeyongera ati, “Mbakobera amazima nti ebintu ebyo byonabyona byaba okubbaawo ngʼabantu abʼomulembe gunu bakaali okufa okuwaawo. 33 Eigulu nʼekyalo byaliwaawo, neye ebibono byange tibyaliwaawo kadi naire.”

34 Awo oYesu nʼalabula abantu ati, “Mwekuume okwetalawusa, nʼobuteemeere, nʼokweraliikirira ebyobwomi bwʼoku kyalo kunu okutazitowereranga emyoyo gyanywe, amo ni mubba ooti muli awo ngʼolunaku lwa Kibbumba olwʼokusaliraku emisango lubagwireku nga timwetegekere ooti muntu azwa omu mutego. 35 Ekyo kityo olwakubba ekyo kyalikwata oku bantu bonabona abali oku kyalo. 36 Kale mubbenge beetegeki, era musabenge oKibbumba, kaisi mwezye okubunuka ebyo byonabyona ebyaba okubbaawo, nʼokwezya okwemerera omu maiso gʼomwana wa Muntu.”

37 Buli lunaku omusana oYesu yaabbanga mu Yeekaalu ngʼayegesya, kaisi owekwairugalanga nʼawuluka okwaba oku Lusozi olubeeta olwʼeMisaale eMizaituuni okugona. 38 Abantu bangi ino bawuunanga makeezi ni baaba egyali omu Yeekaalu okumuwulisisya.