1 Awo oYesu oweyazwire oku lusozi, oguyindi gwʼabantu ni gumusengererya. 2 Era omugenge*8:2 Ebigenge bulwaire obwasuucanga omuntu okubba timulongoole okusinzirira oku mateeka gʼeKiyudaaya. nʼayaba egiri oYesu, nʼamukomera amazwi ngʼamukoba ati, “Musengwa, mmaite nti oyezya okundamya, owoobba ngʼotakire.”

3 OYesu nʼagolola engalo nʼamukwataku, nʼamukoba ati, “Ntaka, era olame!” Amangu ago ebigenge ni bimuwaaku. 4 Awo oYesu nʼamukoba ati, “Ekyo, tokikoberaku omuntu kadi moiza wazira oyabe weeyanjule e wa kabona, era ngʼoMusa oweyalagiire, oweeyo nʼekyokuwaayo, kaisi bakakase bati olamire.”8:4 Lee 14:1-32

5 OYesu oweyaingiire omu kibuga e Kaperenawumu, oMulooma omukulu wʼekibinja kyʼabaisulukale 100, nʼayaba egiyabbaire, nʼasaba obubbeeri 6 ngʼakoba ati, “Musengwa, omuweererya wange mulwaire ali e ika oku kitaliri, asanyalaire omubiri era ali omu bulumi bubitiriri.”

7 OYesu nʼamukoba ati, “Naizayo ni mmulamya.” 8 Neye oMulooma oyo nʼairamu ati, “Musengwa, tintuukana iwe okwingira omu nyumba yange, wazira otumule-butumuli kibono, era omugalama wange yalama. 9 Ekyo kityo olwakubba nze zena ndi muntu aali nʼabasengwa bange abantwala, era ngʼowendi nʼabaisulukale abentwala. Owenkoba onu nti ‘Oyabe,’ era ayaba; nʼogondi nti, ‘Oize,’ era aiza; nʼomugalama wange nti, ‘Okole kinu,’ era akikola.”

10 Awo oYesu oweyawuliire ebyo, ni yeewunya, nʼakoba ababbaire bamusengererya ati, “Mbakobera amazima nti, tinjajiryangaku omuntu yenayena omwIsirairi ali nʼokwikirirya okwʼamaani ooti kuukwo! 11 Era mbakobera nti bangi balizwa e njuyi nʼe njuyi, era ni batyama oku mbaga nʼoIbbulaimu, nʼoIsaka, nʼoYaakobbo omu bwakabaka bwʼomwigulu.8:11 Luk 13:29 12 Neye abo abandibubbairemu, balibabbingira e nza omu ndikiirya, ewalibba okukunga nʼokuŋiiya amaino.”8:12 Mat 22:13; 25:30; Luk 13:28

13 Awo oYesu nʼakoba oMulooma nago ati, “Oyabe, era kibbe kityo ngʼowoikirirya.” Era omugalamawe nʼalama omu kaseera ako.

14 Awo oYesu oweyaingiire omu nyumba ya Peetero, nʼabona omaaye wa muka Peetero ngʼali aawo omusuuja gumuluma ino. 15 OYesu nʼamukwata oku ngalo, omusuuja ni gulama, era omukali oyo nʼasetukirawo, era nʼatandiika nʼokumwinula.

16 Awo akanaigolo, ni baleetera oYesu abantu bangi ababbaireku emizimu, nʼagibabbingaku ngʼagikaawuukira, era bonabona ababbaire balwaire, nʼabalamya. 17 Ekyo kyabbaire kityo, kaisi onaabbi oIsaaya ekiyatumwire kituukirire, ekikoba kiti:

18 OYesu oweyaboine ngʼekiziima kyʼabantu kimweruguulirirye, nʼalagira abeegibe okusomoka naye okwaba oku lubba ludi olwʼenyanza. 19 Awo omoiza oku bakugu omu byʼaMateeka ga Musa nʼaiza egiri oYesu, nʼamukoba ati, “Musomesya, natambulanga na iwe egiwayabiranga wonawona.”

20 Neye oYesu nʼamukoba ati, “Amakibbwe igo gali nʼebiina egigabba, nʼenyonyi gyona giri nʼebisaasiriro. Neye oMwana wa Muntu adambaku kadi nʼejaica olubba.”

21 Omusaiza ogondi, omoiza oku beegibe, nʼamukoba ati, “Musengwa, naliiza nga mmalire okuliika obbaabba.” 22 Neye oYesu nʼamukoba ati, “Oize obbe mwegi wange, era oleke abo abali nʼobwomi obwʼomwoyo obufu baliike abafu baabwe.”

23 Awo oYesu nʼaniina omu lyato, era abeegibe bona ni baaba naye. 24 Ogumpunga ogwʼamaani ni gutandiika okufuwa oku nyanza, amayengo ni geesuka omu lyato ni libbuuca kwizula amaizi. Neye oYesu iye yabbaire agonere. 25 Abeegibe ni baigerera egiyabbaire, era ni bamulamuca ni bamukoba bati, “Musengwa, otulamye, tufa!” 26 OYesu nʼabakoba ati, “Lwaki mutiire? Nga muli nʼokwikirirya kutono!” Awo nʼasetuka, nʼakaawuukira ogumpunga nʼamayengo, era enyanza nʼeteekera nakimo kusani!

27 Bonabona ni beewunya, ni bakoba bati, “Onu muntu wʼengeriki? Obona nʼogumpunga nʼamayengo bimuwulira!”

28 Awo oYesu oweyatuukire oku lubba ludi olwʼenyanza, omu kitundu kyʼaBagaderiini,†8:28 Bagaderiini, eBiwandiike ebimo biti, Bagerigeseene, nʼebindi biti Bagaraasi, nʼebindi biti Bageraasa. abantu babiri ababbaireku emizimu, ni bamusangaana nga bazwa omu magombe agʼempuku. Abasaiza abo babbaire bakambwe ino, nga mpaawo muntu ayezya okubitayo egibabbaire. 29 Amangu ago ni bakooka nga bakoba bati, “Otuvunaanira niki iwe oMwana wa Kibbumba? Oizire aanu okutugadya ngʼekiseera kyaiswe kikaali okutuuka?”

30 Wabbairewo ekiraalo kinene ekyʼembiizi nga giriisya era nga yalaku okuzwa egibabbaire. 31 Kale emizimu egyo ni gyegairira oYesu giti, “Singa owekibba kiti kutubbinga ku bantu banu otusindike mu kiraalo kyʼembiizi.” 32 OYesu nʼagikoba ati, “Aale mwabe.” Kale ni gibazwaku, ni gingira omu mbiizi. Era ekiraalo kyonakyona ni kitantawuka okuzwa e ngulu oku mugingi, ni kiyoolookera omu nyanza, era gyonagyona ni gifeera omu maizi.

33 Era abaliisya baagyo ni bairuka, ni baaba omu kibuga, ni balonsya byonabyona ebyabbairewo, nʼokukiraku eino ebikwata ku badi ababbaireku emizimu. 34 Awo abantu bangi ino ni bazwa omu kibuga okwaba okusangaana oYesu. Era owebamuboine, ni bamwegairira abazwere omu kitundu kyabwe.