1 Awo oYesu nʼayeta abeegibe eikumi na babiri, ni baaba egyali, nʼabawa obwezye okubbinganga emizimu oku bantu, nʼokulamyanga abantu buli ndwaire nʼobunafu. 2 Era abeegi abeyasuucirye abatume eikumi na babiri niibo banu: Asooka, niiye oSimooni oguyatuumire erya Peetero, nʼAndereya omugandawe; nʼoYaakobbo nʼomugandawe oYokaana abataane ba Zebedaayo. 3 NʼoFiripo, nʼoBbantulumaayo, nʼoTomasi, nʼoMatayo omusolooji wa musolo, nʼoYaakobbo omutaane wʼAlufaayo, nʼoSadaayo, 4 nʼoSimooni oMulwaniriri wa kwefuga kwʼeigwangalye, nʼoYuda Isikalyoti eyaliiremu oYesu olukwe.

5 Awo oYesu nʼatuma abatume eikumi na babiri abo ngʼabasisiitira ati, “Timwaba egiri aBatali Bayudaaya, waire omu bibuga ebya Basamaaliya. 6 Neye mwabe giri bantu bʼe Isirairi abali ooti ntaama egyagotere. 7 Mwabe mulaabbe egibali muti, ‘Obwakabaka bwʼomwigulu bwigereire.’10:7 Luk 10:4-12 8 Era mwabe mulamye abalwaire, nʼokuzuukiza, nʼokulamya abagenge, era mubbinge nʼemizimu oku bantu. Obwezye obwʼokukola ebyo mubusunire bwereere, nywena mubukolesyenge bwereere. 9 Timwaba kadi nʼempiiya gyonagyona omu migoba gyanywe. 10 Era timwaba waire nʼekisawo. Buli muntu tiyaaba kadi nʼekizwalo kyokubiri waire ngaito, waire omukoomero, olwakubba omutambi awoomera okumuwa ebiyeetaaga.”10:10 1Ko 9:14; 1Te 5:18

11 Awo oYesu ni yeeyongera ati, “Buli kibuga ooba buli kyalo ekimwaingirangamu, mwanoonereryanga omuntu abasangaalira, era muzwerenge wʼoyo paka owemwalizwayo. 12 Owemwaingiranga omu kisito ekyo, mukobenge abantu baamu muti, ‘Eidembe libbe na inywe.’ 13 Era singa abantu baamu babasangaaliranga, eidembe erimubatakirya lyasigalanga nabo. Neye singa tibabasangaalirenge, eidembe erimubatakirya lyabairiranga niinywe. 14 Era singa abantu bʼomu kisito kyonakyona ooba omu kibuga, owebagaananga okubasangaalira ooba okuwulira ebibono byanywe, mukizwengemu. Era owemwabbanga mukizwamu, mwekunkumulyengeku nʼenkungu egyabbanga gibakwaite oku bigere byanywe.10:14 Bik 13:51 15 Mbakobera amazima nti, oku lunaku olwʼokusaliraku emisango, abantu bʼomu kibuga kyʼe Sodoma nʼe Gomola balibasalira ekibonerezo ekiri gwai gwai okukiraku ekyo ekibaliwa abantu abo abagaananga okubasangaalira.”10:15 Mat 11:24; Luk 10:12; Nta 19:24-28

16 Awo oYesu ni yeeyongera era nʼabalabula ati, “Aale muwulisisye, mbatuma nga muli ooti ntaama egibasindikire akati omu misege, ibyo ebisolo ebya kabenje. Nʼolwekyo mubbe balabukirabuki okwekuuma ooti mpiri, era mubbe bʼeiwooyo ooti njiiwa.10:16 Luk 10:3 17 Aale mukimanye muti abantu balibakwata ni babawaayo omu mbuga gyʼamateeka, era ni babafaamuulira omu makumbaaniro gaabwe. 18 Era okulwange balibatwala omu maiso gʼabafugi nʼaga bakabaka. Ekyo kyalibeezyesya inywe okubatuucaaku ibo nʼoku Batali Bayudaaya obukwenda bwange. 19 Era owebabakwatanga, timweraliikiriranga ekimwatumula nʼengeri eyʼokukitumulamu. Omu kaseera ako mwasunanga ekyokutumula. 20 Ekyo kityo olwakubba tiniinywe omwabbanga mutumula, neye oMwoyo wa Kibbumba oItewaanywe niiye eyaabbanga atumula okubitira mwinywe.”10:17-20 Mak 13:9-11; Luk 12:11-12; 21:12-15

21 Era oYesu ni yeeyongera ati, “Omuntu yaliwaayo omugandawe okumwita, nʼomusaiza omubyaire yaliwaayo omwanawe. Era abaana balyediima ni bawaayo ababyaire baabwe okubaita.10:21 Mak 13:12; Luk 21:16 22 Era nywena abantu bonabona balibacaawa olwakubba muli basengereri bange. Neye oyo eyaligumira ebigosi ebyo paka oku nkomerero, yalirokoka.10:22 Mat 24:9,13; Mak 13:13; Luk 21:17 23 Kale atyanu abantu owebabayiigaanianga omu kibuga ekimo, mwairukiranga omu kindi. Mbakobera amazima nti timwaliwoisya ebibuga byʼomwIsirairi ngʼoMwana wa Muntu akaali okwira.”

24 Awo oYesu ni yeeyongera ati, “Ogubeegesya takiraku amwegesya, era nʼomuweererya takiraku omusengwawe.10:24 Luk 6:40; Yok 13:16; 15:20 25 Iye ogubeegesya tali nʼokwewunya singa owebamubitya ooti yoodi amwegesya, nʼomuweererya yena atyo singa owebamubitya ooti musengwawe. Obanga onyere ekisito bamwetere Bberuzebbuli, kaisi leero abʼomu kisitokye ibo babba tibabeete ekikiraku ekyo obubbibubbi!”10:25 Mat 9:34; 12:24; Mak 3:22; Luk 11:15

26 Awo oYesu ni yeeyongera okwegesya ati, “Kale timutyanga abantu abo abababitya okubbikubbi. Ekyo kityo olwakubba buli kintu ekikukuulirirye balikitoolayo, era buli kintu ekiri omu kyama kyalimanyikana.10:26 Mak 4:22; Luk 8:17 27 Ebintu ebimbakobera inywe omu mbiso, mubikoberenge abantu mulwatu, era nʼebintu ebimbaweweetera inywe mubikookerenge ngulu. 28 Era timutyanga abo abaita mubiri gwonkani, neye nga tibeezya okwita omwoyo. Wazira mutyenge Kibbumba iye ali nʼobwezye okujigirica byonabyona, omwoyogwo nʼomubirigwo omu geyeena. 29 Obunyonyi obubiri bwa layisi ino, neye mpaawo kadi kamo kwibwo akagwa ansi ni kafa okutoolaku oItewaanywe nga niiye atakire atyo. 30 Era nʼainywe nywena oItewaanywe amaite nʼobungi bwʼenziiri gyʼokumitwe gyanywe. 31 Kale timwatyanga olwakubba inywe muli bʼebbeeyi okukiraku omududu gwʼobunyonyi.”

32 Tete oYesu nʼakoba ati, “Buli ambutula omu maiso gʼabantu, zena nalimubbutula omu maiso ga Bbaabba aali omwigulu. 33 Neye buli anegaanira omu maiso gʼabantu, zena nalimwegaanira omu maiso ga Bbaabba aali omwigulu.”10:33 2Te 2:12

34 Awo era oYesu ni yeeyongera okubakoba ati, “Timwaseega muti naizire kuleeta idembe oku kyalo. Tinaizire kuleeta idembe, wazira naizire kuleeta ntalo. 35 Ekyo kityo olwakubba naizire okwawukanisya,

37 Era ni yeeyongera ati, “Buli oyo ataka oiteeye ooba omaaye okukiraku owantaka tasaanira okubba mwegi wange. Era buli oyo ataka omutaanewe ooba omwalawe okukiraku owantaka, yena tasaanira okubba mwegi wange. 38 Era buli oyo etiyeetiika omusalabbagwe gwʼokugada olwʼobwakabaka bwa Kibbumba era nʼansengererya, oyo tasaanira okubba mwegi wange.10:38 Mat 16:24; Mak 8:34; Luk 9:23 39 Kale buli agezyaku okulamya obwomibwe okululwe, yalibufiirwa, neye buli afiirwa obwomibwe okulwange, yalibulamya.”10:39 Mat 16:25; Mak 8:35; Luk 9:24; 17:33; Yok 12:25

40 Awo oYesu nʼakoba abeegibe ati, “Buli abasangaalira inywe abba asangaaliire ninze, era ansangaalira, abba asangaaliire Kibbumba eyantumire.10:40 Mak 9:37; Luk 9:48; 10:16; Yok 13:20 41 Nʼolwekyo buli asangaalira onaabbi olwakubba mukwenda wa Kibbumba, yalisuna empeera ngʼeya naabbi. Era nabuli asangaalira omuntu atuukiriire olwakubba muntu atuukiriire, yalisuna empeera ngʼeyooyo. 42 Era buli muntu awa omoiza oku basengereri bange banu abebanyooma, kadi amaizi agʼokunywa amawolu olwakubba mwegi wange, mbakobera amazima nti anambula kubuusabuusa yalisuna empeeraye.”