1 Awo oYesu oweyamalire okutumula ebyo byonabyona, nʼakoba abeegibe ati, 2 “Mumaite muti wabulayo enaku ibiri oMukolo ogwʼoKutambukirya gutuuke, era omu kiseera ekyo oMwana wa Muntu baaba okumuwaayo bamukomerere oku musalabba.”26:2 Kuz 12:1-27

3 Awo abakabona abakulu, nʼabantu abakulu omwigwanga ni bakiika e wa kabona akira obukulu oKayaafa. 4 Era eeyo ni basala olukwe okukwata oYesu omu mbiso era bamwite. 5 Neye ni bakoba bati, “Tuleke okumukwata omu naku gyʼomukolo, demba abantu beediima.”

6 Awo oYesu oweyabbaire e Bbesaniya omu nyumba ya Simooni eyabbaireku omugenge, 7 ni wabbaawo omukali eyaabireyo nʼecupa erimu amafuta agʼakaloosa, era agʼebbeeyi eino, nʼagasuka oku mutwe gwa Yesu oweyabbaire atyaime ngʼalya.26:7 Luk 7:37-38 8 Neye abeegi owebaboine ekyo, ni banyiiga, ni beebuulya bati, “Lwaki amafuta ago bagabebenyeserye? 9 Babbaire beezya okugatunda ni gʼazwamu empiiya nyingi, ni bagigabira abadoobi.”

10 Awo oYesu oweyategeire ekibakoba, nʼabakoba ati, “Omukali onu lwaki mumuleyerya? Ekintu ekyankoleire kisa. 11 Ekyo kityo olwakubba abadoobi ibo baabbanga na inywe buliijo, neye nze tinaabbe na inywe okumala ekiseera ekinene.26:11 Ama 15:11 12 Asukire amafuta agʼakaloosa oku mubiri gwange ngʼagukwanirya nakimo olwa kuguliika. 13 Era mbakobera amazima nti, wonawona aMawuliro aMasa ago agankwataku egibagalaabbanga okumalaku ekyalo, nʼekinu omukali onu ekyakolere, bakitumulangaku ni bamwewukirya.”

14 Awo omoiza oku beegi eikumi na babiri ogubeetanga oYuda Isikalyoti, nʼayaba egiri abakabona abakulu, 15 nʼababuulya ati, “Singa owenababbeera ni mukwata omusaiza oyo mwampa imeka?” Kale awo ni bamuwa amandusu gʼefeeza 30.26:15 Zak 11:12 16 Era okuzwa oolwo oYuda nʼanoonia akaseera akasa akʼokubabbeera bakwate oYesu.

17 Oku lunaku olusooka olwa Mukolo ogwʼeMigaati eGibulamu eKizumbulukuca, abeegi baabire egiri oYesu, ni bamubuulya bati, “Otaka tukutegekere yaina egiwaliira oMukolo ogwʼoKutambukirya?”

18 OYesu nʼabakoba ati, “Mwabe omu kibuga e wa musaiza oodi ogumumaite, mumukobe muti oMusomesya akobere ati, ‘Ekiseera kyange ekiraagaane kiigereire, kale nze nʼabeegi bange e bubwo niiyo egitwaliira oMukolo ogwʼoKutambukirya.’ ”

19 Kale abeegi ni bakola ngʼoYesu oweyabalagiire, ni baaba ni bategeka oMukolo ogwʼoKutambukirya.

20 Awo obwire owebwairugaire, oYesu nʼabeegibe eikumi na babiri ni batyama okulya. 21 Era owebabbaire balya, oYesu nʼabakoba ati, “Mbakobera amazima nti omoiza kwinywe ayaba okundyamu olukwe.”

22 Cooka awo abeegi ni beekondamira ino, era moiza moiza, ngʼabuulya oYesu ati, “Musengwa, oolwo ninze?”

23 OYesu nʼabairamu ati, “Oyo akozya na nze omu kibya, niiye eyandyamu olukwe.26:23 Zab 41:9 24 Dala oMwana wa Muntu baaba okumwita, ngʼeBiwandiike owebimutumulaku. Neye wobe! Omuntu oyo eyalyamu oMwana wa Muntu olukwe, ngʼalabire! Kyandimubbeereire kisa singa tibamubyaire!”

25 Awo oYuda eyaliremu oYesu olukwe, nʼakoba ati, “Musomesya, oolwo ninze?” OYesu nʼamwiramu ati, “Ee, kityo ngʼowookobere.”

26 Awo oYesu nʼabeegibe owebabbaire nga balya, oYesu nʼatoola omugaati, ni yeebalya oKibbumba, nʼaguvunavunamu nʼabawa, nʼabakoba ati, “Mutoole mulye, gunu niigwo omubiri gwange.”

27 Era oluzwanyuma nʼakwata ekikopo kyʼenviinyo, ni yeebalya oKibbumba nʼabawa, nʼabakoba ati, “Munywe kunu nywenanywena. 28 Ekyo kityo olwakubba linu niiryo eisaaye lyange eryasusuka oku lwʼabangi, era erikakasa endagaano*26:28 EBiwandiike ebimo ebyeira bikoba Ndagaano eMpyaka. eya Kibbumba egyali kukola nʼabantube okubasoniya ebikole byabwe ebibbibibbi.26:28 Kuz 24:8; Yer 31:31-34 29 Neye mbakoba nti okuzwa atyanu tinaliirayo tete okunywa ekyokunywa kyʼemizabbibbu, paka owenalikinywa na inywe omu ngeri empyaka, omu bwakabaka bwa Bbaabba.”

30 Awo owebamalire okwemba olwembo olwa kuwuuja oKibbumba, ni bawuluka ni baaba oku Lusozi olwʼeMisaale eMizaituuni.

31 Awo oYesu nʼakoba abeegibe ati, “Omu kiire kinu nywenanywena mwairuka ni mundekawo, olwakubba bakiwandiikire bati:

33 Awo oPeetero nʼamukakasa ati, “Abandi bonabona nʼowebairuka ni bakulekawo olwʼebyakubbaaku, nze tinakulekewo.”

34 OYesu nʼamwiramu ati, “Nkukobera amazima nti omu kiire ekinanyere kinu, onkoko yaabba akaali nʼokukookoola, nga wankanegaanira emirundi misatu.”

35 Neye oPeetero nʼamukakasira nakimo ati, “Nʼowebaabba nga bateekwa kunjitira aamo na iwe, tinakwegaane.” Era nʼabeegi abandi bonabona ni bakoba kinanyere ekyo.

36 Awo oYesu nʼabeegibe ni baaba omu kifo ekibeeta Gesusemani. Owebatuukire eeyo oYesu nʼabakoba ati, “Mutyame aanu, nga nze njaba aadi negairire oKibbumba.” 37 Nʼayaba nʼoPeetero nʼabataane ba Zebedaayo ababiri, era awo nʼatandiika okutya nʼokweririgana. 38 Kale nʼabakoba ati, “Omwoyo gwange gwizwire enima eyezya nʼokunjita! Musigale aanu era nga nywena mubonia.”

39 Oweyeeyongeireyo katono omu maiso, nʼagwa oku mazwige era nʼakotamya omutwe ansi, kaisi ni yeegairira oKibbumba ati, “Bbaabba, owekibba ekyetaagisya kiti nteekwa okubita omu kipimo ekyokugada okwo, kale kibbe ngʼowootaka.”

40 Awo nʼakanga egiri abeegibe badi abasatu nʼabaajirya nga bagonere, kaisi nʼabuulya oPeetero ati, “Timwezyerye okubba na nze aanu nga tubonia waire esaawa emoiza eti? 41 Mubonie era musabe oKibbumba, kaisi okubagezesya tikwabatuukaku, olwakubba emyoyo gyanywe dala mimaliriri, neye emibiri minafu.”

42 Era nʼayaba omulundi gwokubiri, nʼasaba oKibbumba ati, “Bbaabba, ekipimo kinu ekyokugada owekibba nga tikyezyeka okukintoolaku paka nga nkinywireku, kale kibbe ngʼowootaka.”

43 Era oYesu oweyakangire omulundi ogundi tete nʼabaajirya nga bagona olwakubba endoolo gyabbaire gibali kubbikubbi. 44 Kale awo oYesu nʼabaleka, nʼakanga, nʼasaba oKibbumba omulundi ogwokusatu, ngʼasaba omu bibono ebinyere ebyo.

45 Awo nʼakanga egiri abeegibe, nʼabakoba ati, “Mukaali mugona, era mukaali muwuumula? Aale mubone esaawa etuukire eyʼokulyamu oMwana wa Muntu olukwe bamuweeyo eeri obwezye bwʼabakola ebikole ebibbibibbi bamugadye. 46 Musetuke twabe tubasangaane! Era andiiremu olukwe ngonu atuukire.”

47 Awo oYesu oweyabbaire akaali atumula, oYuda omoiza oku beegibe eikumi na babiri, nʼatuuka nʼekiyindi ekinene ekyʼabantu ababbaire nʼempiima nʼemiigo. Abantu abo, abakabona abakulu nʼabantu abakulu omwigwanga niibo ababbaire babatumire. 48 Atyanu eyaliiremu oYesu olukwe yabbaire amalire okuwa ekiyindi kyʼabantu ekyo akamanyiciryo ngʼabakobere ati, “Omuntu ogunasugirya nga mmugwa omu kifubba, yaabba niiye oyo, mwamukwata-bukwati.”

49 Awo oYuda oweyatuukire, amangu ago nʼayaba egiri oYesu nʼamusugirya ati, “Musomesya oli otya!” Era nʼamugwa nʼomu kifubba.

50 Neye oYesu nʼamukoba ati, “Munange, okole ekikuleetere.” Awo ni baiza ni bakwata oYesu era ni bamukalangula.

51 Amangu ago omoiza oku babbaire nʼoYesu nʼatoolayo empiimaye, nʼatemaku omugalama wa kabona akira obukulu ekitwi nʼamutiicaaku. 52 Neye oYesu nʼamukoba ati, “Empiimayo ogikanjeeyo omu kiruutu kyayo, olwakubba bonabona abakolesya empiima okwita bona balibaita nʼempiima. 53 Oseega oti timpezya okusaba oBbaabba nʼampeererya enkumi nʼenkumi egyʼabamalaika okwiza okunkuuma? 54 Neye owensaba ni babampa oolwo kaisi eBiwandiike ebikoba biti kinu kiteekwa okuntuukaku bibba byatuukirira bitya?”

55 Omu kaseera ako oYesu nʼakoba ekiziima kyʼabantu ati, “Mwizire okunkwata nga muli nʼempiima nʼemiigo ooti mwaba kukwata muyeekera? Kale buli lunaku natyamanga na inywe omu Yeekaalu nga njegesya ni mutankwata.26:55 Luk 19:47; 21:37 56 Neye binu byonabyona birikubbangawo lwa kutuukirirya Biwandiike abanaabbi ebibawandiikire.” Awo abeegibe bonabona ni bairuka ni bamuleka awo.

57 Awo abo abakwaite oYesu ni bamutwala e wa Kayaafa okabona akira obukulu, abakugu omu byʼaMateeka ga Musa nʼabantu abandi abakulu omwigwanga, egibabbaire bakumbaaniire.

58 Neye iye oPeetero yasengereirye oYesu ngʼalekerekuuwo eibbanga okutuukira nakimo omu luuga lwa kabona akira obukulu. Yaingiire nʼatyama nʼabakuumi bʼeYeekaalu abone ebyazwamu.

59 Olwo abakabona abakulu nʼabʼoLukiiko oLufugi olwʼaBayudaaya bonabona ni banoonia obujulizi obwʼobubbeyi obubasinziriraku okwita oYesu. 60 Neye nandi ni babusuna, waire ngʼabajulizi abʼobubbeyi bangi baizire ni bamusibiriryaku. Neye oluzwanyuma ni wazwayo babiri 61 era ibo ni bakoba bati, “Omusaiza onu yakobere ati, ‘Mpezya okuvunawo eYeekaalu ya Kibbumba era nʼokugyombeka omu naku isatu.’ ”26:61 Yok 2:19

62 Awo okabona akira obukulu nʼayemerera nʼabuulya oYesu ati, “Tiwairemu? Niki ekyokoba ku binu ebibakulumiriza?” 63 Neye oYesu nʼasigala ngʼasirikire. Awo okabona akira obukulu nʼamukoba ati, “Nkulagira nti olayire oKibbumba onyere obwomi, otukobere obanga niiwe oKurisito oMwana wa Kibbumba.”

64 OYesu nʼairamu ati, “Ee, kityo ngʼowookobere. Era mbakobera nywenanywena nti mwalibona oMwana wa Muntu ngʼatyaime nʼoKibbumba omu kifo kyʼekitiisya eino†26:64 Ekifo ekyʼekitiisya eino, ooba, Oku lubba olwʼengalo endiiro eya Kibbumba. era ngʼaizira oku bireri okuzwa omwigulu.”26:64 Dan 7:13

65 Awo okabona akira obukulu omu busungu nʼanyiira eganduulaye, era nʼakoba ati, “Omusaiza onu yeeyeta okubba Kibbumba! Tete tukaali tutakira niki abajulizi abandi? Nti ngoyo muwuliire ebibono ebyatumwire. 66 Inywe museega mutya?” Ibo ni bairamu bati, “Awomeire kumwita.”26:65-66 Lee 24:16

67 Awo ni bamwanda ebitanta omu maiso era ni bamukubba ebinfuute, abandi ni bamukubba empi26:67 Isa 50:6 68 neenu webamukoba bati, “Kurisito, otukobere, naani akukubbire?”

69 Awo oPeetero oweyabbaire ngʼatyaime e nza oku luuga, ni wabbaawo omoiza oku baala ababbaire abaweererya e wa kabona akira obukulu nʼaigerera egyali, kaisi nʼamukoba ati, “Wena wabbaire nʼoYesu owʼe Galiraaya.” 70 Neye oPeetero ni yeegaana omu maiso gaabwe bonabona, ngʼakoba ati, “Ekyokoba tinkimaite.”

71 Awo oPeetero nʼazwa oku luuga nʼayaba oku muzigo, era tete eeyo yona omwala ogondi omoiza oku baweererya nʼamubona, nʼakoba abantu ababbaire awo ati, “Oyo yena yabbaire nʼoYesu owʼe Naazaleesi.” 72 Tete era oPeetero ni yeegaana ngʼalayira ati, “Omu mazima aganyere nze omusaiza oyo timmumaite.”

73 Tete nga wabitirewo akaseera katono, ababbaire beemereire aawo ni bakoba oPeetero bati, “Dala oli moiza oku basengereri ba Yesu, olwakubba nʼentumulayo ekuloopa nti oli Mugaliraaya.”

74 Neye oPeetero nʼatandiika okweraama era nʼokulayira ati, “Omu mazima aganyere nze omusaiza oyo timmumaite!”

Amangu ago onkoko nʼakookoola. 75 Awo oPeetero nʼayewukirya ebyo oYesu ebiyabbaire amukobere ati, “Onkoko yaabba akaali nʼokukookoola, nga wanegaine emirundi misatu ngʼokoba oti tommaite.” Era awo oPeetero nʼawuluka, era nʼakunga ino.