1 Awo ngʼeSaabbaato ewoireku, amakeezi pwi olwesaabbiiti, oMalyamu oMangadaleena nʼoMalyamu ogondi ni baaba okubona amagombe agʼempuku omu babbaire bateekere oYesu. 2 Kale owebatuukire ni wagwawo omusisi owʼamaani, olwakubba omalaika wa Musengwa oKibbumba yazwire omwigulu nʼaika oku magombe nago nʼayiringitya eibbaale eryabbaire omu mulyango nʼalitoolawo, era nʼalityamaku. 3 Omalaika oyo yabbaire amasaamasa ooti kumesya kwa ikendi, nʼebizwalobye nga bitukula ooti mabbaale ga ikendi. 4 Nʼolwekyo abakuumi ni bamutya ino, ni batukuta era ni babba ooti bafiire.

5 Awo omalaika nʼakoba abakali abo ati, “Timwatya, mmaite nti munoonia Yesu ogubakomereire oku musalabba. 6 Aanu abulawo, azuukiire ngʼoweyakobere. Mwize mubone egibabbaire bamuteekere. 7 Olwo kaisi mwabe mangu mukobere abeegibe muti, ‘Azuukiire, era yeesookere okwaba e Galiraaya, eeyo gimwamubonera.’ Obwo niibwo obukwenda obumbakobeire.”

8 Kale abakali abo ni bazwa mangu oku magombe agʼempuku nga batiire, neye nga baizwire eisangaalo, ni bairuka okukobera abeegibe.

9 Awo owebabbaire baaba, oYesu nʼabeerukira ngʼabazwera omu maiso, nʼabakoba ati, “Mbasugiirye!” Era bamwigereraku, ni bakoma amazwi kaisi ni beevambirya oku bigerebye ni bamusinza. 10 Kale awo oYesu nʼabakoba ati, “Timwatya, mwabe mukobere abeegi bange baabe e Galiraaya eeyo niiyo egibambonera.”

11 Awo abakali abo owebabbaire bazwa oku magombe nga bali omu nzira baaba, abamo oku baisulukale abakuumi bʼamagombe ga Yesu, ni baaba omu kibuga, ni bakobera abakabona abakulu byonabyona ebyabbaire bituukirewo. 12 Kale abakabona abakulu ni bakumbaana aamo nʼabantu abakulu omwigwanga, ni bateesa. Era ni basalawo ni bawa abaisulukale empiiya nyingi okubagulirira, 13 nga babakoba bati, “Mukobe muti, ‘Abeegibe eizo baizire obwire nga tugonere, ni baibba omulambogwe.’ 14 Ekyo omufugi oPiraato oweyakiwulira, iswe twabawozererya ni mulama omusango.”

15 Kale awo abakuumi ni bakwata empiiya, era ni bakola ngʼowebabakobere. Ekibono ekyo ni kisaalaana omu Bayudaaya paka atyanu.

16 Awo abeegi eikumi na moiza ni baaba e Galiraaya, oku lusozi oYesu egiyabakobere okwaba.28:16 Mat 26:32; Mak 14:28 17 Era owebamuboine, ni bamusinza, neye abamo kwibo ni bamubuusabuusa.

18 Awo oYesu nʼaigerera egibali kaisi nʼabakoba ati, “Bampaire obwezye bwonabwona omwigulu nʼoku kyalo. 19 Nʼolwekyo mwabe musuuce abantu abʼamawanga gonagona babbe beegi bange, nga mubabatiza omu liina lya Bbaabba, nʼeryʼoMwana, nʼeryʼoMwoyo oMweru,28:19 Bik 1:8 20 nga mubeegesya okukwatanga byonabyona ebinabalagiire inywe. Era dala naabbanga na inywe paka ekyalo owekyaliwaawo.”