1 OYesu nʼazwa omu kitundu ekyo, nʼayaba omu kitundu kyʼe waabwe, nʼabeegibe ni baaba naye. 2 Awo oku Saabbaato, nʼayaba omwikumbaaniro nʼatandiika okwegesya. Abantu bangi ababbairewo owebawuliire ebyayegesya, ni bawuninkirira! Ni bakoba bati, “Binu byonabyona yabitoire yaina? Malabuki gʼengeriki ganu oKibbumba ageyamuwaire? Era ayezya atya okukola ebyewunyo binu? 3 Onu tiniiye omubaizi, omutaane wa Malyamu, era omuganda wa Yaakobbo nʼoYose, nʼoYuda, nʼoSimooni? Era aboonyokobe tibabba kwaiswe kunu na iswe?” Awo ni bamukwatira engongi.

4 OYesu nʼabakoba ati, “Onaabbi bamuwa ekitiisya wonawona okutoolaku omu kitundu kyʼe waabwe, nʼomu kikaakye, nʼomu nyumba yʼe waabwe.”6:4 Yok 4:44

5 Era eeyo oYesu tiyeezyerye kukolerayo byewunyo, okutoolaku okulamyakuuyo abalwaire batontono bati, ngʼabateekaku engalogye. 6 Yeewunyire ino olwakubba abantu baayo tibabbaire nʼokwikirirya. Atyo nʼayaba ngʼayegesya omu byalo ebirirainewo.

7 Lumo oYesu nʼayeta abeegibe eIkumi na babiri, ni baaba egyali, nʼabatuma babiri babiri. Era nʼabawa obwezye okubbinganga emizimu oku bantu. 8 Nʼabasisiitira ati, “Omu lugendo lunu timwaba na kantu kadi kamo, okutoolaku omukoomero. Timwaba nʼekyokulya, kadi mpiiya, ooba emigoba. 9 Neye muzwale biraito, era buli moiza azwale ekizwalo kimo kyonkani, tiyaaba nʼekyokubiri.” 10 Era nʼabakoba ati, “Buli kibuga ekimubba mutuukiremu, mugonenge mu kisito kyʼabantu ababasangaaliranga, paka owemwalizwa omu kibuga ekyo. 11 Owemutuuka omu kifo kyonakyona, abantu nandi ni babasangaalira ooba ni bagaana okubawulisisya, awo nga muzwawo. Era owemubba muzwawo, mwekunkumulyangaku nʼenkungu egibba gibakwaite oku bigere byanywe, ngʼakamanyiciryo kʼobujulizi obulaga okuvunaana abantu abo. Mazima mbakobera nti ekyalituuka oku Sodoma nʼoku Gomola kyalibba kiguminkirizika okukiraku ekyalituuka oku bantu abo”6:11 Bik 13:516:8-11 Luk 10:4-11

12 Batyo abeegi ni baaba nga bakobera abantu bati, “Kiwomeire mwenenye.” 13 Ni babbinga emizimu mingi oku bantu. Ni basiiga abalwaire amafuta gʼenkabi ni babalamya.6:13 Yak 5:14

14 Awo okabaka Kerode nʼawulira okufuma kwa Yesu, olwakubba babbaire bamutumulaku wonawona. Abamo nga bakoba bati, “Niiye oYokaana oMubatizi azuukiire. Ekyo niikyo ekigira ali nʼobwezye okukola ebyewunyo.”

15 Neye abandi nga bakoba bati, “Niiye Eriya.” Nʼabandi bati, “Naabbi, omoiza oku banaabbi abʼeira.”6:14-15 Mat 16:14; Mak 8:28; Luk 9:19

16 OKerode oweyabiwuliire nʼakoba ati, “OYokaana oMubatizi ogunatemereku omutwe niiye azuukiire!” 17-19 OYokaana oMubatizi yabbaire adeebere oKerode ngʼamukoba ati, “Amateeka tigaikirirya iwe okutwala oKerodiya omuka mugandawo oFiripo, nʼomusuuca mukaliwo. Ekyo kyagirire oKerodiya nʼakoolesya oYokaana, ngʼataka nʼokumwita, neye ngʼabula ngeri.”6:17-19 Luk 3:19-20

Ekiseera kyatuukire oKerode nʼalagira ati, oYokaana bamukwate era bamwigalire omu mabbuusu, okusangaalya oKerodiya, okabaka oKerode oguyabbaire abandwire oku mugandawe.

20 OKerode iye yabbaire atya oYokaana, ngʼamaite ati oYokaana musaiza atuukiriire, era mweru, kale yamukuumanga kusani tiyabbaaku kabbikabbi. Yatakanga okumuwulisisya, newankubbaire nga buli oweyamuwulisisyanga, yeeraliikiriranga ino omu mwoyo.

21 Neye lumo, oKerodiya nʼasuna akakisa. Lwabbaire lunaku lwa kwewukiriryaku olubabyaliire oKerode. OKerode nʼakola embaga, nʼayeta abantube abakulu, nʼabakulu bʼabaisulukale, nʼabantu abafuma omu Galiraaya. 22 Kwolwo omwala wa Kerodiya yaizire nʼabina, nʼasangaalya ino oKerode nʼabagenibe. Olwʼokusiima eino okabaka nʼakoba omwala ati, “Onsabe kyonakyona ekyotaka, nakuwa.” 23 Nʼalayira nʼokulayira ati, “Kyonakyona ekiwansaba nakuwa, nʼowewataka oti obwakabaka bwange tubugabaniremu akati.”

24 Awo omwala nʼawuluka, ni yeebulyaku omaaye ati, “Nsabe niki?” Omaaye nʼamwiramu ati, “Mutwe gwa Yokaana oMubatizi gwʼobba osabe.”

25 Amangu ago omwala nʼaluuya okukanga egiri okabaka, nʼamusaba ati, “Ekintaka okumpeerawo omu kaseera kanu, mutwe gwa Yokaana oMubatizi nga baguteekere okwitiba.”

26 Ekyo ni kiruma ino okabaka, neye olwakubba yabbaire alayiire, aate nga nʼabagenibe bawuliire, nandi nʼataka kumwima ekyamusabire. 27 Amangu ago okabaka nʼatuma omwisulukale omukuumi wʼamabbuusu okuleeta omutwe gwa Yokaana. Oguyatumire, nʼayaba omu mabbuusu nʼatemaku oYokaana omutwe. 28 Era ni baguleetera okwitiba, ni baguwa omwala, era nʼomwala yena nʼaguwa omaaye. 29 Abeegi ba Yokaana owebakiwuliire, ni baaba ni batwala omulambogwe, ni baguliika.

30 Awo abatume ni bakanga egiri oYesu, ni bamulonserya byonabyona ebibabbaire bakolere nʼebibabbaire beegeserye. 31 Iye nʼabakoba ati, “Mwize, twabe omu kifo omutwezya okubba swenkani, muwuumuleku.” Babbaire bakayireku nʼakaseera akʼokulyaku olwʼabantu abangi abaizanga egibaabbanga. Abantu abamo baabbanga ooti bazwawo, nga tete abandi batuuka. 32 Nʼolwekyo ni bagimba eryato, ni baaba bonkani, omu kifo ekinambulamu bantu.

33 Neye era abantu bangi ni bababona nga baaba, ni babamanyica bati niibo. Awo-so ni bazwa omu bibuga byonabyona, ni babagedya nga babita oku lukalu, nga baaba bairuka, ni babeesooka omu kifo oYesu nʼabeegibe egibabbaire baaba. 34 OYesu oweyatuukire oku lukalu, nʼabona ekiziima kyʼabantu kinene nga kiri awo, nʼabakwatira ekisa olwakubba babbaire ooti ntaama eginambulaku muliisya! Kale nʼamala ekiseera kiwanvu ngʼabeegesya.6:34 Kub 27:17; 1Ba 22:17; 2Mi 18:16; Zek 34:5; Mat 9:36 35 Abeegi owebaboine ngʼobwire bwatira okwirugala, ni baaba egiri oYesu, ni bamukoba bati, “Ekifo kinu mpaamu bantu, aate nga nʼobwire buunu bwirugala. 36 Abantu obaseebule baabe beegulire ekyokulya omu byalo nʼomu bubuga obuliraine aanu.”

37 OYesu nʼabairamu ati, “Niinywe omubbe mubawe ekyokulya balye.” Ibo ni bamubuulya bati, “Otaka twabe tubagulire emigaati egimalawo edinaali 200,*6:37 Edinaali 200, gyabbaire mpeera yʼomupakasi egyapakasira enaku 200. tubawe balye?”

38 Iye nʼababuulya ati, “Muliwo nʼemigaati mimeka? Mwabe mubone.” Owebamalire okwekalikica, ni bamukoba bati, “Mitaanu, nʼenyanyi ibiri.”

39 Awo oYesu nʼalagira abantu bonabona okutyama ansi okwisubi mu bibbubbu. 40 Ni batyama nga bali mu bibbubbu, ebimo nga buli kimo mulimu abantu 100, nʼebindi nga buli kimo mulimu 50. 41 OYesu nʼatoola emigaati emitaanu nʼenyanyi eibiri, nʼalingirira omwigulu, ni yeebalya oKibbumba. Nʼavunavunamu emigaati, nʼagiwa abeegibe okwinula abantu. Era nʼenyanyi eibiri gyona nʼagivunavunamu, bonabona ni basunaku. 42 Era abantu bonabona baliire ni baikuta. 43 Era abeegibe ni bakumbaania ebitundutundu ebyafiikireku, ni baizulya ebiibo ikumi na bibiri. 44 Oku bantu bonabona abaliire, obungi bwʼabasaiza bonkani†6:44 Abasaiza bonkani, aBaisirairi tibabalanga abakali nʼabaana nga babala abantu. bwabbaire 5,000.

45 Amangu ago oYesu nʼalagira abeegibe bagimbe eryato beekubbemberemu, baabe e Bbesusaida, oku lubba ludi olwʼenyanza, nga iye akaali aseebula abantu. 46 Oweyamalire okubaseebula, nʼaniina oku lusozi okusaba oKibbumba. 47 Endikiirya oweyakwatiire, ngʼabeegibe bali mu lyato akati omu nyanza, oYesu iye ngʼali yenkani oku lukalu. 48 Awo nʼabalengera nga bakalabana okugimba eryato nʼenkasi, olwʼogumpunga ogwabbaire guzwa egibaaba. Obwire owebwabbaire bwatira okuca, nʼayaba egibali ngʼatambulira oku maizi. Nabba ooti ababitaku. 49 Neye ibo owebamuboine ngʼatambulira oku maizi, ni baseega bati kyewo. Ni bakubba enduulu, 50 olwakubba bonabona bamuboine, ni batya ino. Neye iye amangu ago nʼatumula nabo, nʼabakoba ati, “Ninze! Timwatya, mwiremu omwoyo.” 51 Atyo nʼaniina omu lyato omu babbaire. Ogumpunga ni gulekera awo okufuwa. Abeegibe ni bawuninkirira ino, 52 olwakubba ekyewunyo ekyʼemigaati babbaire tibategeire makulu gaakyo, bati oYesu ali nʼamaani. Emyoyo gyabwe gyabbaire mikakanyali.

53 Awo owebasaliremu enyanza ni basomoka kudi, batuukiire mu kitundu kyʼe Genesareeti, ni basiba eryato oku mbale kwʼenyanza. 54 Owebazwire omu lyato, abantu ni bamanyica oYesu amangu ago. 55 Ni bairuka nga babita buli wantu omu kitundu ekyo, ni baleeta abalwaire, nga babagingiire oku mikeeka, ni babatwala wonawona awebawuliranga bati oYesu niiwo egyali. 56 Wonawona aweyayabanga, omu butale, omu bibuga, ooba omu byalo, abantu bateekanga abalwaire omu bifo ebyʼokukumbaaniramu, ni bamwegairira aikirirye kadi bakwate oku mugo gwʼekizwalokye. Era bonabona abakikwaiteku, ni balama.