16
Okuzuukira kwa Yesu
(Mat 28:1-8; Luk 24:1-12; Yok 20:1-10)
1 Awo eSaabbaato oweyawoireku, oMalyamu Mangadaleena, nʼoSoloome, nʼoMalyamu omaaye wa Yaakobbo, ni bagula ebyakaloosa baabe basiige omulambo gwa Yesu.
2 Eizo waaku, oku lunaku olwesaabbiiti, amakeezi pwi, ni baaba oku magombe nga 3 beebuulyangana bati, “Neye, naani eyatwiringitirya eibbaale okulitoola omu mulyango gwʼamagombe?” 4 Olwakubba eibbaale nago lyabbaire linene ino. Neye owebatuuka oku magombe, baabire okulola angulu oku kagingi amagombe egigabbaire nga babona eibbaale baliyiringitirye balitoire omu mulyango gwʼamagombe agʼempuku!
5 Owebangira omu magombe, ni babona omusaiza atyaime oku lubba lwʼengalo endiiro, ngʼazwaire ekanzu enjeru, ni bawuninkirira. 6 Awo omusaiza oyo nʼabakoba ati, “Muleke okuwuninkirira. Timunoonia Yesu owʼe Naazaleesi ogubakomereire oku musalabba? Aanu abulawo, azuukiire. Mubone, kinu niikyo ekifo egibabbaire bamuteekere. 7 Aale mwabe mukobere abeegibe, eino eino oPeetero, muti, ‘Yeesookere okwaba e Galiraaya. Eeyo gimwamubonera, era ngʼoweyabakobere.’ ”16:7 Mat 26:32; Mak 14:28
8 Oweyamalire okubakoba ebyo, olwʼokuwuninkirira nʼobuti obubitiriri obwabbaire bubakwaite, ni bawulukamu, ni bazwa oku magombe nga bairuka, era ni batakoberaku muntu yenayena olwakubba babbaire batiire ino.
EMMALIIRIRYA EGENDI EYʼEIRA
Mak 16:9-20
OYesu abonekera oMalyamu oMangadaleena
(Mat 28:9-10; Yok 20:11-18)
[ 9 OYesu oweyazuukiire amakeezi eino, oku lunaku olwesaabbiiti, yasookere kubonekera Malyamu oMangadaleena, oodi oguyabbingireku emizimu omusanvu. 10 OMalyamu oyo nʼayaba nʼakobera abeegi ba Yesu, era nga babbaire bakaali bakunga. 11 Neye owebawuliire bati nambu oYesu mwomi, era mbu oMalyamu amuboineku, ni batakiikirirya.
OYesu abonekera abeegi ababiri
(Luk 24:13-35)
12 Ebyo nga biwoire, oYesu nʼabonekera babiri kwibo nga baaba omu kyalo. Yabbaire afaanana mu ngeri gendi. 13 Awo ni bairayo, ni bakobera abanaabwe. Neye bona ni bataikirirya.
OYesu abonekera abeegibe eikumi na moiza
(Mat 28:16-20; Luk 24:36-49; Yok 20:19-23; Bik 1:6-8)
14 Oluzwanyuma, oYesu nʼabonekera abeegibe eikumi na moiza, nga batyaime balya. Nʼabanenya olwa kutabba nʼokwikirirya, nʼolwʼobukakanyali bwʼemyoyo gyabwe olwakubba tibaikiriirye ebibono byabo abamuboine ngʼamalire okuzuukira. 15 Era kwolwo nʼabakoba ati, “Mwabe omu byalo byonabyona mulaabbe eeri abantu bonabona aMawuliro aMasa.16:15 Bik 1:8 16 Buli agaikiririryamu, era ni bamubatiza, yalirokoka, neye atagaikiririryamu, omusango gwalimusinga.
17 “Abo abanjikiririryamu bakolanga ebyewunyo binu: Omu liina lyange babbinganga emizimu oku bantu; batumulanga omu ntumu egibatayegangaku; 18 singa bakwata empiri, era singa balinywa ekintu kyonakyona ekiita, tikyabakolenge bubbibubbi. Bateekanga engalo gyabwe oku balwaire, abalwaire abo ni balama.”
OYesu bamutwala omwigulu
(Luk 24:50-53; Bik 1:9-11)
19 Awo oMusengwa oYesu oweyamalire okutumula nabo, ni bamutwala omwigulu, nʼatyama nʼoKibbumba omu kifo kyʼekitiisya eino.*16:19 Ekifo kyʼekitiisya eino, ooba, Oku lubba olwʼengalo endiiro eya Kibbumba.16:19 Bik 9:11 20 Awo abeegibe ni batambula nga balaabba wonawona aMawuliro aMasa. OMusengwa oYesu nʼababbeeranga, era nʼakakasanga obukwenda bwabwe ngʼabakolesya ebyewunyo].†16:9-20 EBiwandiike ebimo ebyeira biri nʼemmaliirirya enyimpi, ngʼeira omu kifo kyʼenyiriri 9-20. Emmaliirirya eyo enyimpi niiyo eenu: Okuzwa eeyo, abakali abo ni baaba egiri oPeetero nʼabainaye ni babakobera omu bimpi bimpi byonabyona omwisuka ebyabakobere. Ebyo nga biwoire, oYesu onyere nʼabonekera abeegibe, nʼabatuma okulaabba obukwenda bwa Kibbumba, obwʼemirembe gyonagyona obwa kulamya abantu, babusalaanie omu kyalo kyonakyona, okuzwa ebuzwaisana okutuuka ebugwaisana. Amiina.
16:7 16:7 Mat 26:32; Mak 14:28
16:15 16:15 Bik 1:8
*16:19 16:19 Ekifo kyʼekitiisya eino, ooba, Oku lubba olwʼengalo endiiro eya Kibbumba.
16:19 16:19 Bik 9:11
†16:20 16:9-20 EBiwandiike ebimo ebyeira biri nʼemmaliirirya enyimpi, ngʼeira omu kifo kyʼenyiriri 9-20. Emmaliirirya eyo enyimpi niiyo eenu: Okuzwa eeyo, abakali abo ni baaba egiri oPeetero nʼabainaye ni babakobera omu bimpi bimpi byonabyona omwisuka ebyabakobere. Ebyo nga biwoire, oYesu onyere nʼabonekera abeegibe, nʼabatuma okulaabba obukwenda bwa Kibbumba, obwʼemirembe gyonagyona obwa kulamya abantu, babusalaanie omu kyalo kyonakyona, okuzwa ebuzwaisana okutuuka ebugwaisana. Amiina.