7
Okulabula okundi oku bulendi
1 Mwana wange, okwatenge ebibono byange;
era okuumenge ebiragiro byange.
2 Okuumenge ebiragiro byange, kaisi obbenge mwomi.
Ebinkusomesya obikuumenge, ngʼobwokuuma emunge yʼeriisolyo.
3 Obyebukiryenge bulijo,
obikuumirenge omu mwoyogwo.
4 Okobenge amalabuki oti, “Oli ngʼomwonyoko wange,”
era obalenge okutegeera ngʼomuntu wʼoku lusegere.
5 Byakukuumanga eeri omukali omulendi,
eeri omukali wʼamaiso amangu mangu nʼebibonobye ebisikiriza.
Obukodyo bwʼomukali omulendi
6 Nabbaire oku dinisa omu nyumba yange
ni mbitya amaiso omu dinisa ni ndola e nza.
7 Ni mbona omu babisi,
ni mbona omu baisuka
omuvuvuka onambula okutegeera.
8 Yabbaire atambula omu luguudo okumpi nʼeikoona omukali omulendi egyabba,
ngʼalungama enyumba yʼomukali nago egyeri
9 eigulo ngʼobwire bwirugala,
endikiirya ngʼekwata.
10 Awo omukali nago nʼazwayo okumusisinkana,
ngʼazwaire ooti malaaya, era ngʼagenderera kumusikiriza.
11 Iye omukali nago atumulira ngulu, era nga wʼempuutu,
nga tatyamikica e ika,
12 esaawa egendi mu nguudo, olwisi mu bifo abantu e gibakumbaanira,
mu buli nsonda ngʼakuumire abasaiza.
13 Omukali nago nʼamukwata, era nʼamugwa omu kifubba,
era ngʼabulaku nʼensoni oku maiso, nʼamukoba ati:
14 “E ika mpaireyo esadaaka eyʼokusyania,
era olwatyanu ntuukiriirye obweyamo bwange.
15 Kale nzwireyo kusisinkana niiwe,
nkunoonerye era atyanu nkuboine.
16 Obuliri bwange mbwalireku
amasuuka aga lineni okuzwa e Misiri agalimu erangi.
17 Obuliri bwange mbufuwireku
okalifuwa ogubeeta omiira, nʼogondi bati alowe, nʼokinamooni.
18 Oize tunyinyintirye omukwano paka kuca,
oleke omukwano gutunyumire.
19 Oibawange abulayo e ika;
yaabire mu lugendo lwʼe yala.
20 Yaabire nʼomugoba nga gwizwire empiiya
era yamalayo esaabbiiti ibiri*7:20 Esaabbiiti ibiri. Omu Lwebbulaniya bati, omweri owegubbeera mulamba. kaisi nʼaira.”
21 Omukali oyo nʼebibono ebisendasenda nʼamucaamya;
nʼamugondya nʼebibonobye ebisimoolya.
22 Amangu ago omuvuvuka oyo nʼamusengererya,
ooti nte ogubatwala omu kibbaagiro,
ooti kimaadu agwa omu mutego,
23 paka akalaso owekasumuta einirye,
ooti nyonyi avulumuka okugwa omu mutego
nga tamaite ati yafiirwa obwomibwe!
24 Atyanu baana bange, mumpulisisye,
era muteekeyo omwoyo oku bintumula.
25 Tiwaganyanga omukali ngʼoyo okucuusa omwoyogwo ni gwaba omu manzirage,
ooba okucaamira omu manzirage.
26 Bangi abaaleeteire okujigirika;
abaitisirye tibabalika.
27 Okwaba omu nyumbaye kubba kukwata nzira eyaba e magombe,
kubba kwaba mu kufa!