15
1 Okwiramu nʼeigonda kwikaikania ekiruyi,
neye ebibono ebyʼeikayu, byongera busungu.
2 Owʼamalabuki atumula ebyʼobutegeeri,
neye omusirusiru awolompoka byʼobusirusiru.
3 OMusengwa abona nabuli wantu,
alabirira abasa nʼababbibabbi.
4 Entumula eyʼekisa, ereeta okulama ooti musaale gwʼobwomi,
neye ebibono ebyʼobubbeyi, birumya omwoyo.
5 Omusirusiru anyooma ebyo oiteeye ebyʼamulaabbira,
neye iye oyo omutegeeri aikirirya okumunenya.
6 Enyumba yʼomutuukirirye, ebbaamu ebyobusuni bingi,
neye ensuna yʼomubbimubbi, emuleetera bigosi mumwe.
7 Ebibono byʼabʼamalabuki, bisasya okumanya,
neye ebiseego byʼabasirusiru, tibikola bityo.
8 OMusengwa acaawa esadaaka eyʼomubbimubbi,
neye okusaba kwʼomulongoole omu mwoyo kumusangaalisya.
9 OMusengwa acaawa eneebitya yʼabantu ababbibabbi,
neye ataka abo abakalangukira omu kukola ebyʼobutuukirirye.
10 Iye oyo aleka enzira entuuce balimukangavulira nakimo bundi,
oyo acaawa okumunenya yalifa.
11 Oobanga oMusengwa amaite ebifa e magombe nʼomu geyeena,
neye leero takirawo okumanya emyoyo gyʼabantu!
12 Omunyoomi tataka okumunenya,
era tataka okwebuulya oku bʼamalabuki.
13 Eisangaalo lyʼomwoyo, lireeta akamwenyumwenyu omu maiso,
neye enima eri oku mwoyo erubirirya obwomi.
14 Omuntu omutegeeri anoonia kumanya,
neye omusirusiru anyumirwa byʼobusirusiru.
15 Enaku gyonagyona egyʼoyo ogubagadya gibba mbiibbi,
neye omwoyo omusangaali gusiiba kubba ooti guli ku mbaga.
16 Kisa okubba nʼebitono ngʼotya oMusengwa,
okukiraku okubba nʼebyobusuni ebingi ebiriku obugosi.
17 Kasinga muliira ebisyodo nga mutakangana,
okukiraku okulya ebisava nga muli mu bucaawi.
18 Omuntu owensire, asiikuula enyombo,
neye omuguminkiriza, aikaikania empaka.
19 Enzira yʼomugayaali ebba nswapi nʼamawa,
neye ekisinde kyʼomulongoole omu mwoyo lubba luguudo olulambye.
20 Omwana owʼamalabuki asangaalya oiteeye,
neye oyo omusirusiru anyooma omaaye.
21 Obusirusiru ibwo isangaalo lyʼoyo omubuyaabuya,
neye omutegeeri yeeyongera ngʼatambulira mu butuuce.
22 Anambula kuteesa entegeka gifa,
neye awabba abawi abʼamalabuki abangi, gibitamu.
23 Omuntu asangaala ngʼawaire ekyokwiramu ekituuce,
era kisa okubba nʼekibono omu kiseera kyakyo ekituuce.
24 Owʼamalabuki akwata nzira eniina okwaba omu bwomi
okumukuuma nandi nʼaika e magombe.
25 OMusengwa avunirawo nakimo enyumba eyʼowʼamalala
neye akuuma ensalosalo gyʼabanamwandu.
26 OMusengwa acaawa ebiseego ebyʼomubbimubbi,
neye ebyo ebyʼomulongoole bimusangaalisya.
27 Alulunkanira okusuna aleetera amakaage obugosi,
neye iye oyo acaawa enguzi, yalibba mwomi.
28 Omutuukirirye asooka kuseega kaisi nʼabbaaku nʼekyairamu,
neye omunwa gwʼomubbimubbi gusukaania bibbibibbi.
29 OMusengwa abba yala nʼomubbimubbi,
neye awulira okusaba kwʼomutuukirirye.
30 Akamwenyumwenyu omu maiso kaleetera omwoyo okujaagaana,
nʼamawuliro amasa geeyagalisya obwomi.
31 Iye oyo aikirirya okumulaabbira ebimwombeka,
balimubalira omu bʼamalabuki.
32 Iye oyo agaana okumulaabbira, abba yeenyooma niiye onanyere,
neye aikirirya okumunenya, asuna okumanya.
33 Okutya oMusengwa, kwegesya omuntu amalabuki;
nʼobuwombeeki bukubbembera ekitiisya.