59
Eeri akubbembera abembi. Okwigono, “Tiwajigirica.” EZabbuli ya Dawudi, oSawulo oweyatumire bakuumire oDawudi omu nyumbaye bamwite.
Okusaba oKibbumba okutukuuma
1 Oo Kibbumba wange, ondamye abalabe bange,
onkuume eeri abo abannumba.
2 Ondamye eeri abakola ebibbibibbi,
onnunule eeri abatemo abo.
3 Obone owebagonerera okunjita.
Oo Musengwa, abasaiza abʼamaani abakambwe beekumbaania okunnumba
anambula kibbikibbi ekinkolere ooba omusango.
4 Mbulaku kibbikibbi ekinkolere, neye beetegeka okunnumba.
Obone embeera egindimu osetukiremu ombeere.
5 Oo Musengwa oWabwezye Bwonabwona, oKibbumba wa Isirairi,
osetukiremu obonereze amawanga gonagona agatusetukiireku.
Tiwasaasira abʼenkwe abakola obubbibubbi.
6 Baira nabuli igulo
ni batambulatambula omu kibuga,
nga baluluma ooti mbwa.
7 Owulire ebibono ebibakaasa okuzwa omu minwa,
bakaasa ebibono ebisumuta ooti mpiima.
Baseega bati mpaawo abawulira.
8 Neye iwe Musengwa, obasekerera,
era ojerega amawanga ago gonagona.
9 Oo Kibbumba, iwe amaani gange nkuumirira niiwe okunnunula,
olwʼokubba niiwe olugaga lwange,
10 iwe Kibbumba wange ankwatira ekisa.
OKibbumba omu kisaakye yaliiza nʼambeera,
era nalyegooŋa ngʼawangwire abalabe bange.
11 Neye Musengwa iwe engabo yaiswe tiwabaita,
abantu bange bayinza okwerabira.
Ngʼokolesya obwezyebwo,
obagadangadye era obaice.
12 Olwʼebibono ebibbibibbi ebibatumula,
era olwʼebibono ebizwa omu minwa gyabwe,
oleke babakwatire omu kwekudumbalya kwabwe.
Olwʼokulaama nʼolwʼokubbeya kwabwe,
13 obajigirice omu bulwabwo, obajigirice baweerewo nakimo.
Awo abantu omu kyalo kyonakyona bamanya bati,
oKibbumba niiye afuga oIsirairi.
14 Baira nabuli igulo
ni batambulatambula omu kibuga,
nga baluluma ooti mbwa.
15 Balaaduuka ooti mbwa eginoonia ebyokulya,
ni giruruma nga tigisunire ebigimala.
16 Neye nze nayembanga oku bwezyebwo.
Nabuli makeezi nabbookookanga oku kutakakwo okutakoma,
olwʼokubba oyabire ngʼobba niiwe olugaga lwange,
era ekiirukiro kyange omu biseera byʼebigosi.
17 Nayembanga okukuwuuja iwe aMaani gange,
oKibbumba olugaga lwange, iwe andaga okutaka okutakoma.