“ ‘Oyo aali nʼemyoyo omusanvu egya Kibbumba, nʼenkota omusanvu, binu byakoba. Ati, Mmaite ebyokola. Mmaite nti abantu bakumaite bati oli mwomi omu bintu bya mwoyo aate ngʼoli mufu. 2 Olamuke omanye embeerayo embiibbi, okalangule ebyo ebisigairekuuwo nga bikaali okufa, olwakubba omu byokola timbonamu ekituukiriire omu maiso ga Kibbumba wange. 3 Aale oyewukirye ebintu ebikwata oku bwomi obutuukiriire ebibakwegeserye era ebiwawuliire, obikwate, weenenye. Owootalamuke nʼofaayo kwebyo oKibbumba ebyakoba, naliiza ooti mwibbi, era tiwalimanya saawa eginaliiziramu egyoli.3:3 Mat 24:43-44; Luk 12:39-40; Bil 16:15

4 “ ‘Neye era, omu Saludi olimu nʼabaikirirya abamo abatontono abakaali bakumiire obwomi bwabwe omu butuukirirye. Abo balitambula na nze nga bazwaire ebizwalo ebyeru, olwakubba basaaniire 5 Atyo awangula amaani aga Sitaani, balimuzwalisya ebizwalo ebyeru, era tinalisangula eriinalye omu kitabo ekyʼabantu abali nʼobwomi obutawaawo, wazira nalirangirira nti, “Oyo wange,” omu maiso ga Bbaabba nʼaga bamalaikabe.3:5 Kuz 32:32-33; Zab 69:28; Bil 20:12; Mat 10:32; Luk 12:8

6 “ ‘Ali nʼamatwi awulire oMwoyo oMweru ekyakoba amakanisa.’ ”

“ ‘Oyo atuukiriire era owʼamazima, aali nʼekifunguwo ekya Dawudi, era aigulawo ni watabbaawo kadi moiza ayezya okwigalawo, nʼaigalawo ni watabbaawo kadi moiza ayezya okwigulawo,3:7 Isa 22:22; Yob 12:14 binu byakoba ati: 8 Mmaite ebyokola. Nakwiguliirewo olwigi olwʼokuweererya oKibbumba olutaigalikawo omuntu kadi moiza. Mmaite ngʼoli nʼamaani matono, neye obone weekalanguliire oku kibono kyange nandi ni waneegaana. 9 Kale abo abasengererya oSitaani, abeeyeta aBayudaaya aate nga tiBayudaaya, neye nga babbeya-bubbeyi, nalibatuuca omu mbeera eyalibaleeta omu maisogo, ni bakotama oku mazwi omu maisogo okukuwa ekitiisya, era ni bamanya bati nkaali nkutaka.3:9 Isa 49:23; 60:14; 43:4 10 Ekyo nalikikola olwakubba wakwaite ekiragiro kyange ekikoba kiti, “Oguminkirize,” zena nalikulamya omu kiseera ekyʼokukugezesya ekyaba okwiza oku kyalo kyonakyona, okugezesya abo abali oku kyalo.

11 “ ‘Njiza mangu. Kale okalangukire oku bibono ebibabeegeserye ebyʼokubba omu bwomi obutuukiriire, tiwaabbaawo akukaisya okusuna ekirabo ekyʼenguleyo eyʼobuwanguli. 12 Oyo awangula amaani ga Sitaani, nalimusuuca muntu owʼekitiisya omu bantu ba Kibbumba ogumpeererya, era tiyaligizwamu. Nalimuwa eriina eriyaaka eriraga liti muntu wa Kibbumba wange, era wa mu kibuga oYerusaalemi ekiyaaka, ekiika nga kizwa omwigulu e wa Kibbumba ogumpeererya. Era nalimuwandiikaku eriina lyange eriyaaka okulaga nga muntu owange.3:12 Bil 21:2; Isa 62:2; 65:15 13 Oyo aali nʼamatwi awulire oMwoyo oMweru ekyakoba amakanisa.’ ”

“ ‘Oyo ogubeeta “Amiina,” omujulizi omwesigwa era owʼamazima, onanzwa wʼebyo oKibbumba ebiyabbumbire,3:14 Nge 8:22 binu byakoba ati: 15 Mmaite ebyokola. Mmaite nti toli muwolondoki, aate era toli muyo! 16 Neye olwakubba oli awo kyotakyota; toli muwolondoki aate toli muyo, njaba okukwandula ozwe omu munwa gwange. 17 Iwe okoba oti, “Ndi musuni, ndi nʼebintu bingi, mbulaku ekindamba.” Neye nga tomaite oti oli nkudawu asaaniire kukusaasira. Nkubona ngʼoli mudoobi, era omwofu, era aali obwere. 18 Nkuwa amalabuki, onguleku ezaabbu egibalongooseire omu musyo; niibwo obusuni obwʼebintu ebizwa egiri oKibbumba, kaisi osuuke omusuni omu ngeri entuuce. Era onguleku ebizwalo ebyeru ozwale; niibwo obutuukirirye oKibbumba obwagaba, kaisi olame ensoni egyʼokutambula obwere. Onguleku nʼobulezi obwʼokusiiga oku maisogo, kaisi obone kusani ebintu ebifa oku bwomi.

19 “ ‘Nze bonabona abentaka mbanenya era mbagolola kaisi beeyongere okubba abasa. Kale weefudeku, weenenye.3:19 Nge 3:12; Beb 12:6 20 Ngonu njemereire oku lwigi lwʼobwomibwo nkubba okoodi. Awulira eigono eryange nʼaigulawo, nze naingira omu bwomibwe, ni tuliira aamo naye.

21 “ ‘Oyo awangula amaani ga Sitaani, nalimwikirirya okutyama aamo na nze oku ntebe eyange eyʼobwakabaka, nga zena owenawangwire, ni ntyama aamo nʼoBbaabba oku ntebeye eyʼobwakabaka.

22 “ ‘Oyo aali nʼamatwi awulire oMwoyo oMweru ekyakoba amakanisa.’ ”