5
Ekitabo nʼoNtaama wa Kibbumba
1 Ni mbona omu ngalo endiiro eyʼoyo atyaime oku ntebe eyʼobwakabaka ekitabo ekiringe ooti mukeeka omulinge.5:1 Zek 2:9-10; Isa 29:11 Ekitabo nago nga bakiwandiikiremu omunda nʼoku ngulu, era nga bakimonereku obuzebbo musanvu. 2 Awo ni mbona omalaika owʼamaani. Nʼalanga nʼeigono eryaminkirira ati, “Naani asaaniire okumoonolola obuzebbo obusibire omuzingo ogwʼekitabo, era nʼokukyanzululya?” 3 Ni watabbaawo kadi moiza omwigulu nʼoku kyalo, waire ansi wʼekyalo, ayezya okwanzululya omuzingo ogwʼekitabo, waire okugulolamu.
4 Nze ni nkunga ino olwakubba tiwabonekerewo asaaniire okwanzululya omuzingo ogwʼekitabo, waire okugulolamu. 5 Awo omoiza oku bakaire nʼankoba ati, “Tiwakunga. Obone eenu, waliwo ayezya. Niiye oyo eyawangwire abalabe ba Kibbumba, ogubeeta oMpologoma owʼomu kika kya Yuda, omwizukulu wa kabaka oDawudi. Iye ayezya okumoonolola obuzebbo omusanvu, nʼokwanzululya omuzingo ogwʼekitabo ekyo.”5:5 Nta 49:9; Isa 11:1,10
6 Kaisi ni mbona oNtaama oMutomuto wa Kibbumba ngʼaliku obumanyiciryo obulaga buti bamukomereire. Yabbaire ayemereire akati awabbaire entebe eyʼobwakabaka, ngʼebibbumbe ebyomi ebina, nʼabakaire 24 bamweruguuliriirye. Era yabbaire nʼamaziga musanvu, nʼamaiso musanvu, nga niigyo emyoyo omusanvu egya Kibbumba, egibatumire omu byalo byonabyona.5:6 Isa 53:7; Zak 4:10 7 Awo nʼayaba nʼatoola omuzingo ogwʼekitabo omu ngalo endiiro eyʼoyo atyaime oku ntebe eyʼobwakabaka. 8 Oweyagukwaite, ebibbumbe ebyomi ebina nʼabakaire 24 ni bakotama omu maiso ga Ntaama oMutomuto wa Kibbumba. Buli moiza yabbaire nʼotongoli nʼebibya ebyʼezaabbu ebiizwire obubbaani: Obwo bulaga saala egyʼabatuukirirye.5:8 Zab 141:2 9 Ni bemba olwembo oluyaaka nga bakoba bati:
“Osaaniire okutoola omuzingo ogwʼekitabo,
nʼokumoonolola obuzebbo bwagwo.
Ekyo kityo olwakubba bakwitire, era olwʼokufaakwo,
wanunuliire oKibbumba abantu omu bika byonabyona,
nʼomu ntumu gyonagyona,
nʼomu bantu bonabona, nʼomu mawanga gonagona,5:9 Zab 33:3; 98:1; Isa 42:10
10 nʼobasuuca obwakabaka era abakabona ba Kibbumba waiswe, abʼokufuga ekyalo.”5:10 Kuz 19:6; Bil 1:6
11 Awo ni nningirira era ni mpulira eigono eryʼabamalaika abangi, enkumi nʼenkumi, obukaire nʼobukaire, nga beeruguuliriirye entebe eyʼobwakabaka nʼebibbumbe ebyomi, nʼabakaire.5:11 Dan 7:10 12 Ni batumula nʼeigono eryaminkirira bati:
ONtaama oMutomuto wa Kibbumba, iwe ogubaitire,
osaaniire okubba nʼobwezye, nʼobusuni, nʼamalabuki, nʼamaani.
Era osaaniire ekitiisya,
nʼokukugulumalyanga, nʼokukuwuujanga!
13 “Era ni mpulira nabuli kibbumbe omwigulu nʼoku kyalo, nʼansi wʼekyalo nʼomu nyanza, byona nga bikoba biti:
Oyo atyaime oku ntebe eyʼobwakabaka
era nʼoNtaama oMutomuto wa Kibbumba,
tubawuuje, tubawe ekitiisya;
tubagulumalye, era babbe nʼobwezye emirembe nʼemirembe!”
14 Ebibbumbe ebyomi ebina ni bikoba biti, “Amiina.” Nʼabakaire 24 ni bakotama ni basinza.