15
Abamalaika nʼebirulumo omusanvu
1 Tete ni mbona ekyewunyo ekindi omwigulu, ekinene era ekyewuninkirirya. Wabbairewo abamalaika musanvu nga baleeta ebirulumo musanvu ebisembayo, olwakubba niibyo ebimalayo obusungu bwa Kibbumba.
2 Era ni mbona ekiri ooti nyanza eyʼendabirwamu egibatabwiryemu omusyo. Ni mbona nʼabo abagaine okusinza ogusolo nʼekifaananyi kyagwo, nʼokubateekaku enamba etegeeza eriina eryagwo. Babbaire beemereire oku mbale mbale okwʼenyanza eyo eyʼendabirwamu, nga bakwaite amatongoli oKibbumba ageyabawaire.
3 Ni bemba olwembo onaabbi oMusa, omuweererya wa Kibbumba oluyayembere, nʼolwembo eeri oNtaama oMutomuto wa Kibbumba, nga bakoba bati:
“Musengwa oKibbumba oWabwezye bwonabwona,
ebyokola bikulu era byewunyisya!
Iwe oKabaka owʼemirembe nʼemirembe,
amanzirago matuuce era gʼamazima.15:3 Kuz 15:1
4 Musengwa, naani dala atalikutya era ataliwa eriinalyo ekitiisya!
Iwe wenkani niiwe oMweru.
Abantu abʼamawanga gonagona baliiza ni bakusinza omu maisogo,
olwakubba ebikolebyo ebyobutuukirirye byeraga mu lwatu.”15:4 Yer 10:7; Zab 86:9
5 Ebyo owebyawoire, ni mbona eYeekaalu eyʼomwigulu nga njigule, eYeekaalu ngʼekola ngʼeweema eya Kibbumba ekakasa eti oKibbumba ali aawo nʼabantube.15:5 Kuz 38:21 6 Omu Yeekaalu eyo, ni muzwamu abamalaika omusanvu ababbaire nʼebirulumo omusanvu, nga bazwaire engoye enjeru egitukula egyʼebbeeyi, era nga beesibire omu bifubba enkoba egyʼezaabbu.
7 Ekimo oku bibbumbe ebyomi ebina, ni kiwa abamalaika omusanvu ebibya omusanvu ebyʼezaabbu, ebiizwire obusungu bwa Kibbumba onyere obwomi emirembe nʼemirembe. 8 EYeekaalu nʼeizula omwosi oguduunya okuzwa omu kitiisyakye, nʼomu maanige, nga mpaawo ayezya okugingiramu paka ngʼebirulumo omusanvu ebyʼabamalaika omusanvu biwoireyo.15:8 Kuz 40:34; 1Ba 8:10-11; 2Mi 5:13-14; Isa 6:4