18
Okugwa okwa Bbabbulooni
1 Ebyo owebyawoire, ni mbona omalaika ogondi ngʼaika okuzwa omwigulu, ngʼali nʼobwezye bungi ino, era nʼokwaka okwamubbaireku ni kumoleka ekyalo. 2 Nʼabbookooka nʼeigono eryaminkirira ati:
“OBbabbulooni ekibuga ekinene kijigirikire!
Kisuukire ikumbaaniro eryʼebinyonyi byonabyona ebibbibibbi era ebyomuliko.
Era niikyo ekisito emizimu gyonagyona omu gikumbaanira.18:2 Isa 13:21; 21:9; Yer 50:39; 51:8; Bil 14:8
3 Ekyo kityo olwakubba amawanga gonagona gateemeire omwenge ogwʼobulendi bwakyo
obwʼokusinza ebifaananyi.
Abakabaka abʼoku kyalo bayendere nakyo,
nʼabasuubuuzi abʼoku kyalo basuniire obusuni mu kucakala kwakyo okubitiriri.”18:3 Isa 23:17; Yer 51:7
4 Tete ni mpulira eigono erindi erizwa omwigulu nga likoba liti,
“Abantu bange mbalabula, mukizwemu,
kaisi muwunuke okwingira omu bibbibibbi byʼabantu byakyo
era nʼokubatwalirya omu kugada kwakyo.18:4 Isa 48:20; Yer 50:8; 51:6,45
5 Ekyo kityo olwakubba ebibbibibbi byakyo bituukire omwigulu,
nʼoKibbumba asalirewo okubonereza okubbenga kwakyo.”18:5 Nta 18:20-21; Yer 51:9
6 Era akoba abamalaika ati:
“Musasule oBbabbulooni ebintu ebibbibibbi ebiyakolere abandi.
Oku bikole ebyʼekibuga ekyo, inywe musingisyewo emirundi mibiri.
Obulumi obuyatuucirye oku bainaye
mubumutuuceku yena nga mukubbisyamu emirundi mibiri.18:6 Zab 137:8; Yer 50:29
7 Egikyakomerye okwegulumalya nʼokwejalabya nywena gimubba mukomye
okukigadya era nʼokukikunja,
olwakubba kyewaana nga kikoba kiti:
‘Ntyaime ngʼokabaka, tindi namwandu
era tinalibbaaku mu kugada naire.’
8 Nʼolwekyo ebirulumo ebyalikigadya,
byalikiizira mu lunaku lumo, ni bireeta enzala, nʼokuyungubala, nʼokufa.
Era ekibuga ekyo balikyoca omusyo,
olwakubba oMusengwa oKibbumba iye wa bwezye akisingisya omusango.”18:7-8 Isa 47:7-9
9 Abakabaka abʼoku kyalo abayendanga nakyo ni babba aamo nakyo omu byʼamasanyu owebalibona nga bakyoca kiduunya omwosi, balikuukulya ni bakikunga. 10 Balyemerera yala yala olwʼokutya okugada kwakyo, ni bakoba bati,
“Wobe! Wobe! Nga walaba iwe ekibuga ekinene!
Iwe ekibuga ekyʼamaani dala
bakujigiricirye omu saawa moiza yonkani!”18:9-10 Zek 26:16-17
11 Abasuubuuzi abʼoku kyalo bona bakikunga ni beekondamira olwakubba ababbaire bagula ebintu byabwe bafiire bawoirewo.18:11 Zek 27:31,36 12 Tiwakaali waliwo agula ezaabbu nʼefeeza, nʼamabbaale agʼebbeeyi, nʼago agebeeta luulu; amajoola amasa agʼebbeeyi eino, nʼebya liiri nʼebitukuliikiriri. Era, buli musaale ogwʼakaloosa, nabuli kintu ekyʼamasyanka. Era, buli kintu ekyʼomusaale ogwʼebbeeyi eino, nʼekya bbulonzi, nʼekyʼekyoma, nʼekyʼamabbaale amasa. 13 Era tiwakaali waliwo agula ebyakaloosa nʼebirungo ebya syodo, nʼobubbaani, nʼamafuta agʼakaloosa agebeeta miira, nʼenvumbo; omwenge ogwʼemizabbibbu, nʼamafuta; obusye obubakuŋuntire okusani eino, nʼengaano; ente nʼentaama, nʼembalaasi nʼebigaali; abagalama nʼabantu abebanyagire omu lutalo.18:12-13 Zek 27:12-13,22
14 Abasuubuuzi balikikoba bati:
“Ebisa byonabyona ebiwegombanga okusuna, kibuga iwe,
bikufiire bityo.
Ebyobusuni byonabyona nʼebyʼekitiisya bikuwoireku,
era tokaali oirayo okubibonaku naire.”
15 Abasuubuuzi abʼebintu ebyo abekyagaigawairye, balyemerera yala yala olwʼokutya okugada kwakyo, ni bakunga era ni beekondamira,18:15 Zek 27:31,36 16 ni bakoba bati:
“Wobe! Wobe! Nga walaba iwe ekibuga ekinene,
ekyazwalanga ebizwalo ebisa ebyebbeeyi eino, era ebitukuliikiriri nʼebitukuliki;
ni bakutimba okukujolija nʼezaabbu,
nʼamabbaale agʼebbeeyi, nʼaago agebeeta luulu!
17 Omu saawa moiza yonkani, obusuni obwo bwonabwona bujigirikire!”18:17 Isa 23:14; Zek 27:26-30
Abavugi abʼamaato nʼamameeri bonabona, nʼabagatambuliramu bonabona, nʼabo bonabona abasuubuulira oku nyanza balyemerera yala yala. 18 Owebalibona omwosi gwakyo nga kiya, balyaminkirira nga bakoba bati, “Tiwabbangawo ekibuga ekyagaagana kinu obunene!”18:18 Zek 27:32 19 Ni beesuka enkungu omu mitwe gyabwe, ni baasyamika nga bakuukulya era nga bawolooga, nga bakoba bati:
“Wobe! Wobe! Nga walaba iwe ekibuga ekinene,
ekyagaigawairye abanyere amaato agʼoku nyanza!
Omu saawa moiza yonkani bakujigiricirye!”18:19 Zek 27:30-34
20 Ni wabbaawo eyakobere ati:
“Neye inywe omwigulu musangaale olwakubba bakijigiricirye!
Inywe abatuukirirye, na inywe abatume nʼabanaabbi musangaale,
olwakubba oKibbumba akisingisirye omusango
olwʼebyo ebikyakolere!”18:20 Ama 32:43; Yer 51:48
21 Awo omalaika owʼamaani nʼasetula eibbaale eriri ooti gumengo ogunene, nʼagudyaka omu nyanza ngʼakoba ati:
“OBbabbulooni ekibuga ekinene balikudyaka batyo ansi nʼamaani amangi,
nandi nʼoirayo kubonekaku!18:21 Yer 51:63-64; Zek 26:21
22 Enyembo egyʼabakubbi abʼamatongoli, nʼegyʼabembi, nʼegyʼabafuwa amakondeere,
tibyaliirayo kuwulikika mwiwe.
Timwalibba mukugu omu mulimo naabba gumo
eyaliirayo okuboneka mwiwe,
waire kuvuga okwʼemengo ngʼeesya
eyaliirayo okuwulikika mwiwe.18:22 Zek 26:13; Isa 24:8
23 Ekitangaala ekyʼeitaala tikyaliirayo kuboneka mwiwe.
Waire eigono eryʼaleeta omukali omugole nʼeryʼaibaaye
tiryaliirayo okuwulikika mwiwe.
Abasuubuuzibo babbaire bakulu ino omu kyalo,
era obulogobwo bwabbeyabbeyere amawanga gonagona!18:22-23 Yer 7:34; 25:10
24 Mwikyo eisaaye eryʼabanaabbi nʼeryʼabatuukirirye,
nʼerya bonabona abebaitire oku kyalo, niimwo omu balyajiirye.”18:24 Yer 51:49
18:2 18:2 Isa 13:21; 21:9; Yer 50:39; 51:8; Bil 14:8
18:3 18:3 Isa 23:17; Yer 51:7
18:4 18:4 Isa 48:20; Yer 50:8; 51:6,45
18:5 18:5 Nta 18:20-21; Yer 51:9
18:6 18:6 Zab 137:8; Yer 50:29
18:8 18:7-8 Isa 47:7-9
18:10 18:9-10 Zek 26:16-17
18:11 18:11 Zek 27:31,36
18:13 18:12-13 Zek 27:12-13,22
18:15 18:15 Zek 27:31,36
18:17 18:17 Isa 23:14; Zek 27:26-30
18:18 18:18 Zek 27:32
18:19 18:19 Zek 27:30-34
18:20 18:20 Ama 32:43; Yer 51:48
18:21 18:21 Yer 51:63-64; Zek 26:21
18:22 18:22 Zek 26:13; Isa 24:8
18:23 18:22-23 Yer 7:34; 25:10
18:24 18:24 Yer 51:49