11
Ekisa kya Kibbumba eeri aBayudaaya
1 Kaisi tete oleke mbuulye nti, oKibbumba yeebbingiireku nakimo abantube? Kadi tiniikyo owekiri. Zena ndi Mwisirairi, omwizukulu wa Ibbulaimu, era ndi wa mu kika kya Bbenyamini.11:1 Baf 3:5 2 OKibbumba abantube, abo abeyalondere eira, tiyabeebbingiireku nakimo. Timumaite eKiwandiike ekitumula okwEriya, oweyasabire oKibbumba ngʼatumula oku Baisirairi Yakobere ati, 3 “Musengwa, baitire abanaabbibo, ni basansula ebyotobyo. Nze zenkani ninze nsigairewo, era zena bannoonia okunjita.”11:3 1Ba 19:10,14 4 Neye iye oKibbumba yairiremu atya? Ati, “Neebisiireyo abantu kasanvu, abatakomerangaku oBbaali amazwi.”11:4 1Ba 19:18 5 Era wekiri nʼomu biseera binu. Waliwo abasigairewo, abebalonderemu olwʼekisa kya Kibbumba. 6 OKibbumba yabalonderemu lwʼekisaakye, tirwebyo ebibakolere. Singa yabalonderemu lwʼebyo ebibakolere, ekisaakye kyankubbaire tikikaali kisa. 7 Aale atyanu tukobe tutya? ABaisirairi bakayire okusuna ekyo ekibabbaire banoonia ekyʼokubba abatuukiriire. Abatono abalondemu niibo abakisunire. Neye abandi emyoyo gyabwe gyakakanyaire, 8 ngʼowebakiwandiikire bati, “OKibbumba yabawaire omwoyo ogunambulamu malabuki. Yabawaire amaiso agatabona, nʼamatwi agatawulira paka oku lunaku olwatyanu.”11:8 Ama 29:4; Isa 29:10 9 Nʼokabaka oDawudi akoba ati:
“Ebinyumo byabwe
bibasuukiire mitego, bibbe bintu ebibagwisya, bintu ebibakontola era ebibonerezo.
10 Amaiso gaabwe gayofuwale
bakaye okutegeera ebintu byʼomu mwoyo,
nʼobwomi bwabwe bubbengemu ebigosi bingi ino emirembe nʼemirembe,
era babbenge ooti muntu akotaakota olwʼobuzito bwabyo.”11:9-10 Zab 69:22-23
11 Kaisi tete kambuulye: ABayudaaya beesitaala kaisi bagwe bajigirike? Kadi, tiniikyo owekiri. Okutoolaku kiti, okubbenga kwabwe kwaleeteire aBatali Bayudaaya okusuna okubalokola, ibo aBayudaaya kaisi engongi gibakwate. 12 Neye abba ngʼokubbenga kwabwe kwaweserye ebyalo enkabi nyingi, oolwo bonabona owebaliira eeri oKibbumba enkabi tigyalisingawo obubitiriri?
Ekisa kya Kibbumba eeri aBatali Bayudaaya
13 Atyanu nkoba niinywe abantu aBatali Bayudaaya. Ngʼowendi mutume eeri bantu aBatali Bayudaaya, nteeka omu mulimo gwange ekitiisya, 14 nga ngezyaku okukwatisya abʼeigwanga lyange engongi, kaisi ndokole abamo kwibo. 15 Owebababbingire, ekyalo kyasyanirye nʼoKibbumba. Kaisi tete owebalibairyawo, kyalibba kitya? Kyalibba ooti aamo Kibbumba abazuukizire. 16 Ekimegero kibba kitukulye, singa ekiinulo kyonakyona babba bakitukwirye. Era ekikolo kyʼomusaale owekibba ekitukulye, nʼamasaga gaaku gabba matukulye, ngʼaago niibo aBaisirairi abaizukulu ba Ibbulaimu.
17 Atyanu amasaga agamo agʼomusaale ogwo omuzaituuni omukomangano, babatemereku, kaisi iwe eyabbaire eisaga eryʼomusaale omuzaituuni ogwʼomu kigona ni bakulambirya omu kifo kyabwe, era ogabana oku nkabi gya Ibbulaimu nga niiye ekikolo. 18 Neye oleke okwewaana oti amasaga ago atyanu ogakira. Oweweewaana, oyewukirye oti tiniiwe okwatiriire nʼoyemereryawo ekikolo, neye ekikolo niikyo ekikukwatiriire ni kikwemereryawo. 19 Neye era oyezya okukoba oti, “Amasaga bagamogoireku, nze kaisi bannemberyeku.” 20 Kityo wekiri, bagamogoireku lwa butaikirirya oKurisito bwago, neye iwe ekikwemereiryewo niikwo okwikirirya oKurisito. Nʼolwekyo tiwewaana, wazira ootye era weekuume. 21 Olwakubba obanga oKibbumba tiyalekereku amasaga agebabyaliire ku musaale ogwo, atyo na iwe tiyalikulekawo.
22 Nʼolwekyo omanye ekisa nʼobukambwe bwa Kibbumba. Akambuwalira abo abagwire nʼakwatira iwe ekisa, kasita weekalangulira oku kisaakye. Neye owootalikyekalanguliraku, wena balikumogolaku. 23 Era nʼaBayudaaya owebalibba tibakaliire omu butaikirirya bwabwe, balibairya oku musaale, olwakubba oKibbumba ayezyerya nakimo okubairyaku. 24 Aale obanga iwe, omu nkulayo, eyʼokubba eisaga lya musaale omuzaituuni ogwʼomu kigona, bakutoireyo ni bakuyunga oku musaale omuzaituuni ogwʼomu musiri ogutali gwʼekikulakyo, amasaga agebabyaliire oku musaale ogwo tigalibba mangu ino okugairya oku musaale gwago?
Ekisa kya Kibbumba eeri abantu bonabona
25 Boluganda, ntaka mumanye ekyama kinu, kaisi muleke okwepankapanka. ABaisirairi abamo basigaire nga bakakanyali bʼemyoyo, paka aBatali Bayudaaya bonabona owebalimala okwira eeri oKibbumba. 26 Kaisi awo nʼaBaisirairi bonabona balibalokola, ngʼowebakiwandiikire bati:
“Omulokoli yalibbutuka okuzwa omu Sayuuni, yalitoola abaizukulu ba Yaakobbo
omu kukola ebitali byʼobwakibbumba kwabwe.11:26 Isa 59:20
27 Era eyo niiyo eyalibba endagaano yange nabo,
owenalibatoolaku ebikole ebibbibibbi byabwe.”11:27 Yer 31:33-34
28 Omu bikwata oku Mawuliro aMasa, babba balabe ba Kibbumba, inywe kaisi oolwo mutoolemu omugaso. Neye omu bikwata oku kubalondyamu, babba batake ba Kibbumba olwa bazeiza baabwe. 29 OKibbumba owaagabira abantu ooba owaayeta, tiyeejusa, 30 ni yeecuusa. Na inywe eira mwajeemeire oKibbumba, okutoolaku kiti atyanu abakwatiire ekisa olwʼobujeemu bwʼaBayudaaya. 31 Atyanu bona bajeemere, kaisi abakwatire ekisa ekiyabakwatiire inywe. 32 OKibbumba yalekere abantu bonabona omu bujeemu, kaisi akwatire bonabona ekisa. Era eBiwandiike bikoba biti:
33 “Dala, obusuni bwa Kibbumba nʼamalabukige, nʼokumanyakwe nga tibimalikayo!
Ebyateesa nga tibifumintirizikika! Engerigye nga tigitegerekeka!”11:33 Isa 55:8
34 Era bikoba biti:
“Naani eyabbaire amaite oMusengwa ngʼowaaseega?
Naani eyabbaire amuwaire amalabuki?11:34 Isa 40:13
35 Ooba naani eyabbaire amuwaire,
ekirabo yena kaisi amusasule?11:35 Yob 41:11
36 Byonabyona byazwire gyali, niiye eyabibbumbire, era byonabyona bibbaawo kumuweererya.
Tumuwenge ekitiisya emirembe nʼemirembe. Amiina.” 11:36 1Ko 8:6