ኦይትምስባብ ጳውሎስታ እሪንዳ ክተና
ቆርንቶስ ኤድንከስካንታ
አርድንታ
ጳውሎስ ቆርንቶስ ኤድንከስካንታ ክት ጻፍሳንዳ እሪንዳ ክተና ጻፍምሳንዳ ቆርንቶስ ካተመናር ይ ዎይስሳን ምክስ ኤሄናር ክርስቶሳር አሜንድባብከስታ አሜንንጎካ አምሳን ማጠን ዎይስዝድንደታ ጎግ Ꮊፍስካንታ ገቅርኬ። ኮታይካ ቆርንቶስ ካተመና ፍጫ ሙደን የጃን ግርክ ፍጨንታ ካተማ ማትንዘንከረ ስግስሶ ሮማ ባንችን ቆልድን አካያ ጋይምድን ፍጨንታ ኤስምሳን ካተማ Ꮊቄ። ናኮና ካተመና ዛልአ ፍክስንካ አንድር ማቻንዳ፥ ዳቅሳን ዎገካ፥ አንድር ዳልግዘን ዶቅድን ይተና ኬታ ቦርሳንደትኬ Ꮊክ Ꮊክ ጎይንንከስታ በድምካ ኤስምሳንዳ ና Ꮊቄ።
ኖ ኦይትምስባበረ ማለካ ክት ኬዛካንታ ዝግዛንዳ ምክስ ኤሄናር ዶቅድን ፋስምንጎካ፥ ዳቅል ኬታ ይይተንጎካ፥ ቤልምንጎካ እንቸተኬ ይእምጎካ፥ ምክስ ኤሄንታ ዎጋጎካ፥ አያን ጭልንታ እምንተንከስጎኬ ደእናርንካ አምንተንጎካ Ꮊቄ፥ ኮትኮግንደረ ኖ ኦይትምስባብ ክላ ኬዘንታ ቃለን ከትኬና ኦይስንከዘን ማለካ ኤግዝምሶ ኬዝዴ።
(ሶልማ) ሳብ ዎርሰንካንታ እምሳን እምንተንከዘንካ ስግ ማትንተን መያ ማዝድንዳ ታሜከ ማክምስ የድና ኮ ማጻፍናር አንድር ኤስምሳን ካሪ ማቻንዳ ኤስምዴ።
ማጻፍን ኮትኮታ ሙዳ የድንተና
አርድንታ (1፡1-9)
አሜንድባብከስታ ዎክያር አምሳን ፋስምና (1፡10—4፡21)
ዳቅል ኬታ ፍክስንከ ኤሀ ኤድንከስታ ዶቅንት (5፡1—7፡40)
አሜንድባብከስኬ አሜንዳክን ኤድንከስካ። (8፡1—11፡1)
ምክስ ኤሄንታ ዶቅንተኬ ጎይንንታ ዎጋ (11፡2—14፡40)
ክርስቶሰተኬ አሜንድባብከስታ ደእናርንካ አምንተና (15፡1-58)
ይሁዳ ፍጨናር ዶቅድን ማጠርስባብ አመንድንባብከስካንታ አላ (16፡1-4)
በእንታ ኬዛ (16፡5-24)
1
1 ሳብታ ጋይተካ የሱስ ክርስቶስታ ኦይትምስባብ ማትካንታ ኤልምስባብ ጳውሎስዘንኬ ዎንታ እስመን ሶስተንዘንካ፤
2 ቆሮንቶስ ካተማር Ꮊፈርድን ሳብታ ምክስ ኤሄን ኮታ ዋረረ ክርስቶስ የሱሰካ ጭልምስ ባብከስካንተኬ ሳብካንታ ፋስምስባብ ኬት ማተርንግንዳ ኤልምስባብከስካንታ፥ ኮግንደረ ካሪ ሙደናር ከትካንተኬ ዎካንታ ጮይስ ማችባብ ዎንታ ጮይስን የሱስ ክርስቶስታ ላምን ኤልድባብከስካንታ ሙዳ፥
3 ዎንታ ባቤን ሳብዘንከ ጮይስ የሱስ ክርስቶስዘንካ ዉች እምንተኬ ሳራትቼንካ የካንታ ማታ።
ጋለት ሳብካንታ
4 የሱስ ክርስቶስካ ይንታ ዉች እምንተን የካንታ እምሳንካንታ የጎካ ሙዳᎺይካ እስታ ሳብንም ጋለድቴ። 5 ሙዳ ርይካ ኬዘከረ ማታ ኤሰከረ ክርስቶሳር ቆልተቴ። 6 ኮነረ ማቻንዳ ክርስቶስጎካ ዎ የካንታ ኬዛንዳ ማርካትቼና የንደር ዳቅቴ። 7 ኮካንታ ዎንታ ጮይስን የሱስ ክርስቶስታ መያ ማትንተን ሱነካ ካርሰረቶ የ ዶቅድንካ Ꮊረሰነረ አያንታ እምንተና የንዘንካ ዞገራዬ፥ 8 ዎንታ ጮይስን የሱስ ክርስቶስታ ቃስትምስ Ꮊድንተካ ይንኤርም ካይሳ ማትሰቶ የ Ꮊፈርተርን ግንዳ ኖ በእንታ የለልታ ዳቅሶ የ ዶቅተርንግንዳ ይይተሬ። 9 ክታ ይንችን ዎንታ ጮይስን የሱስ ክርስቶስካ ክክን ዋልቃትች የንታ ዶቅተርንግንዳ የም ኤልስባብ ሳብና አሜንምስባቤ።
አሜንድባብከስታ ዎክያር ማቻን ፋስም
10 እስታ እስመንከስኬ ምችነንከሶ! “ፋስም የንታ ዎክያር Ꮊይ ዶቃ፥ የታ ሙደነረ ክክ ኤእሰቶ ዋልቃ ኬዘኬ ዋልቃ ገቅርካ ዳቅሶ ዶእከቴ” ጋይስቶ ዎንታ ጮይስን የሱስ ክርስቶስታ ላምካ የም ምግዝድቴ። 11 እስታ እስመንከስኬ ምችነንከሶ! የንታ ዎክያር ዋጭማ ዶቅድንደትም ቀሎኤታ *ቃለዋ ጋይድንዳ ኤተን ማኔ ኤር ኤድን ኬዘንካ እታ ኤሰርትቴ። 12 ኮነረ የታ ዋልቃ ዋልቀንከስ “እታ ጳውሎስትተ፥ እታ አጵሎሰትቴ፥ እታ ጴጥሮስትቴ፥ እታ ክርስቶሰትቴ” የታ ጋይደቴ። ኦይት. ፍ. 18፡24። 13 ይና ክርስቶስ ፋስምቶ? ጳውሎስ የካንታ ሮክርምቶ? አና የ ስኤርሳንዳ ጳውሎስታ ላምኮ? 14 እታ ቃርስጶሰምኬ ጋዮሰዘንካ አብ Ꮊይመሰነረ እ ስእሳክንጎካ ሳብም ጋለድቴ። ኦይት. ፍ. 18፡8፤ 19፡29፤ ሮማ 16፡23። 15 ኮካንታ “እ ጳውሎስታ ላምካ ስኤርትቴ” ጋይሶ ኬዝድባብ Ꮊየሰነረ ካዬ። 16 (ገታ ማቼ፥ እስጥፋኖሰታ ኤር ኤድንም ስእስትቴ፥ ኬት ከነዘንካ አብ እ ስእስባብ ኤድ ዶቅዴ ጋይስቶ ገቀራይቴ፥)1 ቆሮ. 16፡15። 17 ክርስቶስ እም ኦይቻንዳ ክላ ኬዘንም ኤስዝድንግንዳ ዳት እ ስእዝድንግንዳ ካዬ፥ ክርስቶሰታ ማዝቀልና ዉች ማትሶ ነግዳክንግንዳ ክላ ኬዘንም እ ኤስዝድንዳ ኤታ ኤረዘንካ Ꮊፈርሳን ኬዝካ ካዬ።
ክርስቶስ ሳብታ ኤረኬ ዎልቃ ማትንተና
18 ማዝቀልንታ ቃለና ካይድን ኤድንከስካንታ ዳችርምግንዳ ፋይድምዴ፥ ዎ አቅድባብከስካንታ ማቼ ሳብታ ዎልቄ።
19 “ኤረንባብከስታ ኤረንም እታ ካይዝድቴ፥
በድ ኤዝድባብከስታ ኤሰንም ቦዝድቴ” ጋይምሶ ጻፍምቴ። ኢሳ. 9፡14።
20 ይና ኤረንባብ Ꮊብረረ? በድ ኤዝድባበረ Ꮊብረረ? ኮ ፍጫሙደንታ ፍዘንም ሙዳ ኤስካንታ ዝግድባብከስ Ꮊብረረ? ሳብ ኮ ፍጫሙደንዘን ኤጨንም ዳቻ ማሳክዮ?ኢዮብ 12፡17፤ ኢሳ. 19፡12፤ 33፡18፤ 44፡25።
21 ኮ ፍጫሙደንታ ኤድንከስ ይንታ ገታ ኤጨንካ ሳብም ኤስካንታ ከት ማዳክንግንዳ ሳብ ይንታ ኤጨንካ ከታዘን ዝጬ፥ ኬዛር ማቼ ዳችርምግንዳ ፋይድምድንዳ ዎ ኤስዝድን ክላ ኬዘንካ አሜንድባብከስም አቅስካንታ ሳብታ ጋይተና ማቴ። 22 አይሁድንከስ አተንም ሰድካንታ ዝግደኬ፥ ግርክ ኤድንከስ አና ኤጨንም ዝግደኬ። 23 ዎታ ማቼ ክርስቶስ ዎካንታ ሮከርምሳንደትም ኤስዝዶቴ፥ ኮነረ አይሁድንከስካንታ ጎሄ፥ ግርክ ኤድንከስካንታ ዳችርዬ። 24 ኤልምስባብከስካንታ ማቼ አይሁድን ከስካንተረ ማታ ግርክ ኤድንከስካንታ፥ ክርስቶስ ሳብታ ዎልቀኬ ሳብታ ኤጬ። 25 ሳብታ ዳችርዬ ጋይምሶ ገቅርምድንዳ ኤታ ኤጨንዘንካ ስገዴ፥ ሳብታ ጋፍርዬ ጋይምሶ ገቅርምድንዳ ኤታ ዎልቀዘንከረ ስገዴ።
26 እስታ እስመንከስኬ ምችነንከሶ! ሳብ የም ኤና ኤልድናይካ Ꮊራ ግንዳ ኤድ የ Ꮊቃናንከረ ገቀርከቴ፥ ኤታ ገቅርግንዳ የንታ ዎክያርንካ በድንከስ ኤጨንከስ ናንከረ ዳቅመንከስ አነረ አንድር ኤድንከስ ካያ Ꮊቀኬ። 27 ኬዛር ማቼ ሳብ ኤጨን ባብከስም ኦስንስካንታ ፍጫሙደንዘን ዳቻግንዳ ፋይድምድባብ ኤድንከስም እጄ፥ ዳቅመን ከስመረ ኦስንስካንታ ፍጫሙደንዘን ጋፍስ ባብከስግንዳ ፋይድምድባብከስም እጄ። 28 ሳብ ፍጫ ሙደን ኤድንከዝደር ዶቅዴ ጋይምሶ Ꮊፈርድን ሪንከስ ኬትም ካያ ግንዳ ማስካንታ ፍጫሙደንዘን ኦስንሳንደትምኬ ቶችምሳንደትም ሪይካንታ ካምሶ Ꮊፈርዳክን ሪም እጄ። 29 ኮመረ ክት ይሳንዳ Ꮊየሰነረ ኤድ ሳብታ እሪ ጬቅዳክን ግንዴ። 30 የም ማቼ ሳብ የሱስ ክርስቶስካ ክክን ዋልቃትች የካንታ ዶቅተርንግንዳ ይሴ፥ ኮካንታ ሳብ የሱስ ክርስቶሰም ዎንታ ኤጫ፥ ዎንታ ጭልም፥ ዎንታ ሳብካንታ ፋስምንኬ ዎንታ ቆትማ ክት ማድን ግንዴ ይሴ። 31 ኮነረ “ጬቅድባብ ጮይስካ ጬቃ” ጋይምሶ ማጻፍናር ጻፍምሳንግንዴ። ኤር. 9፡24።