ኦይትምስባብ ዮሀንሰታ እርንዳ ክቴና
አርድንታ
ኦይትምስባብ ዮሀንሰታ እሪንዳ ክቴና ቃስቴን አፍ ማቻን ኬዘንከስም የጃንዴ። ኬተረ ናበብድባብከስ ሳብካ ክክንኬ ክታ ይንችን የሱስ ክርስቶሰካ ክክን ዋልቃትች ኬታ ዶቅተርንግንዳ ዛብስካንተኬ ኮትኮም ዋልቃትቼን ካይስካንታ ማድን ካርካ ኤስስንዘንካ ከት ጎተርተርንግንዳ ኤግዝምስካንቴ። ኮታይካ አምሳንዳ ካርካ ኤስስንንታ ዳቀልስና ዉድንዳ ዳልግ ማቻን ኮፍጫ ሙደንካ ክክን ይይምድን ዋልቃትቼንጎካ ማቻንካንታ ሳብታ ይንችን የሱስይ ቦድሶ ኤድ ማትካንታ አነረ ኤተንግንዳ እዛ ክታ ዶቅካንታ ማታዬ ጋይድንዳ Ꮊቄ። ኬታኬና ኤስስንባብከስ “አቅንታ ጋይንተና ፍጫሙደንዘን ገች Ꮊቅንጎካ ዉችኩን ማጠርክሳ ዶቅ ጋይንትዬ” ጋይድ Ꮊቀኬ፥ ኮትኮከረ ክክን “ኡርማ እዘካ ዶቅንተረ ማታ አብ ኤድካንተረ ሶልማ ሰችና አቅንተንካ ክክን Ꮊረነረ ዋልቃትች” ካዬ ጋይድ Ꮊቀኬ።
ኖ ጻፍንባበረ ኮትኮ ኤስስን ግርንተካ የሱስ ክርስቶስ ቦድማ ኤዴ፥ የሱሰካ ኣመንድባብከስኬ ሳብም ሶልምድባብ ሙደና ክክ ክከረ ሶልማ ከትም ዝግዝዴ ጋይንተካ ኡርስት ከትካንታ ኬዝቴ።
ማጻፍን ኮትኮታ ሙዳ የድንተና
አርድንታ (1፡1-4)
ሳክመኬ ኡምንካ (1፡5—2፡29)
ሳብታ ይንችንከስኬ ዳብሎስታ ይንችንከስ (3፡2-24)
ዶፈንንኬ ካርከንካ (4፡1-6)
ነግምዳክንዳ ሶልማ (4፡7-21)
ሙደንም ጋምድን አሜንና (5፡1-21)
1
ዶቅንት ቃላ
1 እሪንደትዘንካ የድሶ Ꮊቃን ዶቅንት ቃለንጎካ የካንታ ጻብዶቴ፥ ኮና ዶቅንት ቃለና ዎ ኤሰርሳንደትምኬ ዎንታ አፍንካ ዎ ሰዳንደትም፥ ዎ ማለካ ሰዳንደትምኬ ዎንታ አንንከስካ ዎ Ꮊጫንደትሜ። ዮሀ. 1፡1። 2 ናኮና ዶቅንትና መያ ማቴ፥ ዎተረ ሰቶቴ፥ የካንታ ማርከርዶቴ። ሳብ ባበንደር Ꮊቃንደትምኬ ዎካንተረ መያ ማቻን ስለንካ ዶቅንትን የካንታ ኬዝዶቴ። ዮሀ. 1፡14። 3 ዎንካ ክክን ዋልቃትች የንታ ዶቅተርንግንዳ ዎ ሰዳንደትምኬ ዎ ኤሰርሳንደትም የካንተረ ኬዝዶቴ። ዎንታ ዋልቃትችነረ ሳብ ባቤንደርኬ ክታ ይንችን የሱስ ክርስቶስካ ክክኔ። 4 ዎንታ ጉርምና ቦድማ ማድንግንዳ ኮም የካንታ ጻብዶቴ። *ዎንታ ጉርምና፤ ዋልቃ ዋልቃ ኤና ጻፍምሳንዳ የንታ ጉርምና ጋይደኬ።
ሳብ ሳክማ ማትንቴና
5 ክታዘንካ ዎ ኤሰርሳንደትኬ የካንተረ ዎ ኬዝድንዳ ክቴና “ሳብ ሳክሜ፥ ኡምነረ ክደር ቦድሶ ካዬ” ጋይድንዴ። 6 ኮካንታ “ሳብካ ክክን ዋልቃትች ዎንታ ዶቅዴ” ጋየሮቶ ኡማር ዎ ዶቅድንዳ ማቼ ማልትባቦቴ፥ ዎንታ ኬዘከረ ማታ ዎንታ ፍክስንከረ ዶፈንና ካዬ ጋይንትዬ። 7 ኬዛርንካ ማቼ ሳብ ይንታ ማተናርንካ ሳክማር ዶቅድንግንዳ ዎተረ ሳክመናር ዎ ዶቅሴ ክክ ክክታ ዋልቃትች ዎንታ ዶቅተሬ። ጉጅሰረ ክታ ይንችን የሱሰታ ማቀስና ጎማ ሙደናርንካ ዎም ጭልዝዴ። ዮሀ. 13፡34።
8 ጎማ ዎንዘን ካዬ ዎ ጋይዴ ዎንታ ማተንም ገስዝዶቴ። ዶፈነረ ዎንታ ዋር ካዬ። 9 ዎንታ ጎመንም ሳብደር ዎ ፋጭዴ ኖ ኣመንምስባብኬ ጭል ማቻንካንታ ዎንታ ጎመንም ሙዳ ነጋ ጋይዴ፥ ዎንታ ዳቀልስን ሙደናርንካ ጭልዝዴ። 10 ጎማ ፍክሳኮተ ዎ ጋይዴ ሳብም ካርካባብ ማዝዶቴ፥ ሳብታ ቃለነረ ዎንታ ዋሪ ካዬ።