ኦይትምስባብ ጳውሎስታ ቃስትምስ ክተና
ቆርንቶስ ኤድንከስካንታ
አርድንታ
ጳውሎስ ቆርንቶስ ኤድንከስካንታ ክት ጻፍሳንዳ ቃስትምስ ክተና ጻፍምሳንዳ ቆርንቶስ ካተመናር Ꮊቃን ምክስ ኤሄንካ ክክን ክታ ዶቅድን ዋልቃትቼና አንድር ማጣ ማቻንደትᎺይኬ። ዋልቃ ዋልቃ ምክስ ኤሄናር ኤድንከስ አንድር ክታዘን ይንኤርዝድንደትም ኬት ኬዝንከረ ጳውሎስ ኤድማ ካንታ አንድር ዝግመት ክታ ዶቅድንደትም ሰችዝዴ፥ ኮነረ ኮት ማድንደትᎺይካ አንድር ጉርም ክትካንታ ኤስምድንደትም መያ ማዝዴ።
ክታ ክተንታ እርንደታር ጳውሎስ ቆርንቶስ ካተመናር ዶቅድን ምክስ ኤሄንካ ክክን ክታ ዶቅድን ዋልቃትቼን ሰችካ ምክስ ኤሄናር አምሳን ይንኤርዝድን ሪንከስጎኬ ኬታ ግርንተንጎካ Ꮊረታ ኬዘንታ ማስንም ዳቅስሶ ከት ማስሳናንከረ ኤስምዴ። ኮትኮከረ የችሶ ኮና ክታ ዋጭና ጎማ ፍክስን ኬት ዎይስዝድንግንደኬ ኬት ኤድምድንግንዳ ይሳንካንታ ክትካንታ ኤስምሳን ጉርምንም ከትካንታ መያ ማዝዴ። ኮታዘንከረ ይሁዳ ፍጨናር ዶቅድን አሜንድባብከስም አላካንታ ቡዳርንካ ከት እምድንግንዳ ከትም ኖ ገቀርስዝዴ። በእንታ የድንከሳር ጳውሎስ ይንታ ኦይትምስባብ ማትንተንዘን ክታዘን የልሳን ካሰስንጎካ ይ ጋምድን ኬዘንታ ማስንም ኬዝዴ። ቆርንቶስ ምክስ ኤሄናር ዋልቃ ዋልቃ ኤድንከስ ከታ ይንታ ማተን ዶፈን ኦይትምስባብከስ ማስንተካ ጳውሎስ ካርከካ ኦይትምስባቤ ጋየረኮ ክትም ካሰዝድ Ꮊቀኬ።
ማጻፍን ኮትኮታ ሙዳ የድንተና
እሪንዳ (1፡1-11)
ጳውሎስኬ ቆርንቶሳር ምክስ ኤሄንካ (1፡12—7፡16)
ይሁዳ ፍጨናር ዶቅድን አሜንድባብከስካንታ አላ (8፡1—9፡15)
ጳውሎስ ይ ኦይትምስባብ ማትንተንታ ገችታ ኤረንጎካ ይ ጋምድንደታ እምሳን ማስና (10፡1—13፡10)
በእንታ (13፡11-14)
1
1 ሳብታ ጋይተካ የሱስ ክርስቶስታ ኦይትምስባብ ማችባብ ጳውሎስዘንኬ ዎንታ እስመን ጢማቶስዘንካ፥ ኦይት. ፍ. 18፡1።
ቆርንቶስ ካተመናር Ꮊፈርድን ሳብታ ምክስ ኤሄንከ ኮትኮግንደረ ሙዳ አካያ ፍጨናር Ꮊፈርድን አሜንድባብ ዎርሳ ሙደና፥
2 ዎንታ ባበን ሳብዘንካ፥ ጮይሰረ የሱስ ክርስቶሰታ ዉች እምንተኬ ሳራትቼና የካንታ ማታ።
ጳውሎስ ሳብካንታ እምሳን ጋለትና
3 አጭርንታ ባበንኬ ዳቅንተን ሙዳ እምድባብ ኮትግንደረ ዎንታ ጮይስን የሱስ ክርስቶስታ ባቤን ሳብካንታ፥ ጋለትና ማታ። 4 ዎታ ሳብዘንካ ዎ Ꮊብድን ዳቅንተንካ ማጠዘን ዶቅድባብከስም ሙዳ ዳቅስካንታ ዎ ማድንግንዳ ሳብ ዎም ዎንታ ማጣ ሙደንካ ዳቅዝዴ። 5 ክርስቶሰታ ማጠና ዎካንታ በጃንከካ ኮትኮግንደረ ክርስቶሰካ ዳቅንተነረ ዎካንታ በዴ። 6 ዎታ ማጠን ዎ ተይድንካ የታ ዳቅንተንምኬ አቅንተንም Ꮊፍተረቴ፥ ዎ ዳቅድንካ ጉጅሰረ የተረ ዎ ተይድንደትም ካምድንደት ማጠን ዳንዳእካ ተይሰቶ ዳቅተረቴ፥ 7 ዎንታ ማጠን የ ካስምድንደት ከካ ዎንታ ዳቅንተንመረ የ ካስምድንደትም ዎ ኤዝድንኦል የንታዘን ዎንታ ዶቅድን ጉርምና ዳቅሜ።
8 እስታ እስመንከስኬ ምችነንከሶ! እስያ ፍጨናር ዎ ዶቅድንደትᎺይካ ዎንዘን የልሳን ማጠን የ ኤዝድንግንዳ ሶልምዶቴ፥ ኮነረ ዎንዘን የልሳን ማጠና ባላካንታ ዎም ደጭድንዳ ማቻንጎካ ሰንፔካ ዶቅንትካንታ ዎንታ ዶቅድን ጉርምና ዎራ ነግታ Ꮊቄ። 1 ቆሮ. 15፡3። 9 ኮትኮግንደረ ደእ ዎንዘን ፋረድምሳን ኬካ ዎካንታ ኤስምታ ዶቆ፥ ኮነረ ሙዳ ዎንዘን የልሳንዳ፥ ዎ አመንምድባብ ደእስባብከስም አምስዝድባብ ሳብካ ዳት ዎንታ ዎልቀካ ማታክንደትም ዎ ገቀርት ተይድንግንዴ። 10 ኮካንታ ኖ ደእካንታ የልዝድን ማጠንዘንካ ዎም አቅስቴ፥ አነረ ኖ ዎምአቅሰተሬ፥ ጉጅሰረ ዎም አቅዝድንደት ግንዳ ዎንታ ጉርምና ክትኬ። 11 የተረ ዎም ምክስካ አላ ዝግዝዴ፥ በድ ምክስካ ዎታ ሳብታ አለን ዎ Ꮊብድንካ በድ ኤድንከስ ጉጅሶ ዎጎካ ሳብም ጋለደኬ።
ጳውሎስ ይ አይካንታ ገቅርሳን ገቀርን ኦክና
12 ዎ ጨቅድንዳ ሪና ኮኔ፥ ኮነረ ዶፈን ማትንተን ዎንታ ማክቼና ዎካንታ ማርከርዴ፥ አብን ኤድንከዘንኬ ስግስሰረ የንካ ክክን ዶቅድንዳ Ꮊፍርና ሳብዘንካ ዎ Ꮊፍሳን ሳብካንታ ፋስምንኬ ሉለዘን የድምሳንዴ፥ ኮነረ ማቻንዳ ሳብታ ዉች እምንተንካ Ꮊቃ ዳት ኤታ ኤጨካ ካዬ። 13 ናበብሰቶ ገቅርት የ ተይካንታ የ ማዳክንዳ ማቼ አብ Ꮊረነረ የካንታ ጻፋዮቴ፥ ሙደንም ገቅር ካንታ የ ማድንግንዳ ጉርም ይድቴ፥ 14 ታ ዎጎካ የ ኤዝድንዳ ቶክምየ፥ ኦስ እር ማቼ ቦድሶ የ ገቀርድንደትም Ꮊድን ጉርም ይድቴ፥ ኮጎከረ ጮይስ የሱስ Ꮊድንደት Ꮊይካ ዎታ የንካ ዎ ጬቅድንደት ግንዳ የተረ ዎንካ ጬቅተረቴ።
15 ኮርንካ ገታ እ ማቻንጎካ ቃስተን ዱት የካንታ መይድን ግንዳ ጋይስቶ የም እርምስቶ ሰድንካንታ ገቀርትትዶቆ፥ 16 እ ገቀርሳንዳ ኦስ መቅዶና ካተመናር ስገርንደትኬ ኮታርንከረ እ ማድንደትᎺይካ የም ሰድካንቴ፥ ኮግንደከረ ኦስ ይሁዳ ፍጨናር እ አይድንደትካ እም አሌንም አልተረቴ ጋይንተካ ገቀርስቴ። ኦይት. ፍ. 19፡21። 17 ኮም እ ገቅርሳንደትካ እ ይድንደትም እታ ኤሳይባብ ኦስ ፈንክ ጋይድባብ የንደር ካምዶ? አነረ ኮም እስታ ገቅርንካ ዋልቃዱት “ይየኬ ዋአ” ጋየርቶ ኦስ ፈንክ ጋይንትካ ኤታ ገቀርካ እ ይሳንዳ የም ካምዶ? 18 ሳብ አሜንምስባብ ማቻን ኦል ዎተረ የም ዎ ኬዝድን ኬዘና “ይያ ናንከረ ዋአ” ጋይድን ኦስ ፈንክ ጋይስዝድንዳ ካዬ። 19 እንኬ ስላስካ፥ ጢማቶሰከረ ሳብታ ይንችን የሱስ ክርስቶሰም የካንታ ዎ ሳባክሳንዳ ሙዳᎺይካ “ይዬ” ጋይድን ቃለካ ዳት፥ “ይዬ ናንከረ ዋአ” ጋይድን ኦስ ፈንክ ኦክምድን ቃለካ ካዬ። ኦይት. ፍ. 18፡5። 20 ሳብ ዎካንታ እምሳን Ꮊድን ጉርምን ሙዳ “ይያ” ማድንዳ ክርስቶሰኬ፥ ኮካንቴ ሳብካንታ ቦንቼና ክርስቶስጎካ “አምንኤ” ዎ ጋይድንዳ። 21 ዎም የንካ ክክን ክርስቶሳር ዎ ዛብድን ግንዳ ዎም ይስስባብ ሳብዬ፥ ይንታ ፍክስንካንታ ዎም እጅባብ ኖዬ፥ 22 ክታ ዎ ማቻንደታ ማርካ ማድንዳ ማይተምን ዎንዘን ይስባብኬ ኦስ እር ዎካንታ እምምድን ቆልማጎካ ዎንታ ቡዳር አያን ጭልን ዋሳ ማስሶ እምስባብ ኖዬ።
23 እታ ቆርንቶስ ካተመናር ማትስቶ እ Ꮊዳክንዳ ጎግና የም እ ሞርእዝዳክንግንዳ የካንታ አጨርስቴ፥ ኮትኮካንተረ ሳብ እስታ ማርኬ፥ 24 የታ የንታ አመንንካ ዳቅስባብ የ ማቻንጎካ የም ጉርምዝድን ግንዳ የንካ ክክን ፍግዝዶት ዳት የንታ አሜንካ የም ክዳኮቴ።