ዮሀንስ ጻፍሳንዳ
ዎንታ ጮይስን የሱስ ክርስቶሰታ ክላ ኬዛ
አርድንታ
ዮሀንሰታ ክላ ኬዘና የሱሰቴን ኬዝድዮ ዋሀ ቆብርሶ ኤድንከስታ ዎክያር Ꮊፈርስባብ ስለንካ ዶቅድባብ ሳብታ ቃላ ማትንተንም መያ ማስካንቴ። ማጻፍና ይንታ ማታርንካ መያ ማዝድንደትግንዳ ኮና ክላ ኬዘና ጻፍምሳንዳ ናበብድባብከስ የሱስ አቅስንባብ ማትሶ Ꮊዴ ጋይምስባብ ሳብታ ይንች ክታ ማትንተን ኬት አመንድንግንደኬ ክትከረ ከታ አሜንምንጎካ ስለንካ ዶቅንት ከታ ዶቅድንደትም ኬት ኤዝድንግንዴ (20፡31)።
ክላ ኬዘንታ እሪንደታር ስለንክንዳ ሳብታ ቃለንኬ የሱሰካ ዋልቃ ማትንተን አርድንታ ማስሶ ይ ኬዛንደታ ቡር የሱስ አቅስንባብ ማትሶ Ꮊዴ ጋይምስባብ ሳብታ ይንች ክታ ማትንተን ሰጅድን Ꮊክ Ꮊክ አተንታ ቃዉተንከስም ኬዝዴ፥ ኮታዘንከረ ከትኬና አታ ቃዉተንከዘንካ Ꮊራ አፍ Ꮊፈርሳ ናንከረ ኤስዝድንዳ ፍክስምሶ ስገድባብከስ ጎርስምደኬ፥ ኮና ካርነረ ኬዝድንዳ ዋልቃ ዋልቃ ኤድንከስ የሱሰካ አሜንሰኮ ክትም ጎርስምድባብከስ ከታ ማትንተን፥ አብንከሰረ ጉጅሶ Ꮊስግንዳ ክትም ኬት ግርዳናንከኬ ክትካ አመንዳኮቴ ኬት ጋይሳንግንዴ። የድይ 13-17 የለልታ የሱስ ይ የደርሳን ሶይት ይንታ ካርንካ ጎርስምድባብከስካ ክክን Ꮊራከካ ዛብዛን ዋልቃትች ክታ Ꮊቃናንከ ክታ ሮክርነረ የልድንካ ግግምንተኬ ዳቅንተታ ቃላ ከትም ኤስምሳንደትም ኬዝዴ። በእንታ የድንከሳር የሱሰታ የድርንጎከ ፋረድምንጎካ፥ ክታ ሮከርንጎኬ ክታ ደእናርንካ አምንተንጎካ፥ ኮትኮግንደረ ደእናርንካ አምንተንታ ቡር ይንታ ካርንካ ጎርስምድባብከስካንታ ክታ መያ ማትንተንጎካ ገቀርዝድባብከሰኬ።
2 ዮሀንስ የሱስ ክርስቶስጎካ Ꮊፈርድንደትም ስለንክንደታ ዶቅንትን መያ ማስሶ ክት ሰጅድንዳ ኮና ዉች እምንተና ታይንዘንካ የችሶ የሱሰም ጎግ፥ ዶፈን፥ ዶቅንት ማስሶ ተይድባብከስካንቴ። ዮሀንሰታ ክላ ኬዘንም አብንከዘንካ Ꮊክ ማስዝድንዳ አያንናር ዶፈንንከስ ኤድም አርድንግንዳ መጣ ማቻንደትኬ ሰጨታ ዶቅንተናር ዎም መይድርንከስ፥ ጋይንትነረ ሎቃ፥ እችም፥ ሳክማ፥ ግስመንባብ፥ ክታ ቆልንከስ፥ ዎይንንታ ኮረንከስኬ ዎይንንታ አፍን ካምድን ሪንከስም ካምስካ ክት ከዛንዴ።
ማጻፍን ኮትኮታ ሙዳ የድንተና
እሪንደና አርድንታ (1፡1-18)
ስእስንባብ ዮሀንሰኬ የሱሰታ ካርንካ ጎርስምስባብ እርንባብከስ (1፡19-51)
የሱስ ፍክስን ይንታ የድና (2፡1—12፡50)
የሩሳሌም ካተመናርኬ ኮታ ሞረናር ክታ ፍክስንታ በእንታ ሰጨንከስ (13፡1—19፡42)
ጮይስታ ደእናርንካ አምንተንከኬ ይንታ ካርንካ ጎርስምድባብከስካንታ መያ ክታ ማትና (20፡1-31)
በእንታ፥ ገሊላ ፍጨናር አናካርንካ ይንታ ካርንካ ጎርስምድባብከስካንታ ክታ መያ ማትና (21፡1-25)
1
ዶቅንት ቃላ
1 እርምሶ ቃለና Ꮊቄ፥ ቃለነረ ሳብካ ክክን Ꮊቄ፥ ኮነረ ቃለና ሳብ Ꮊቄ። 2 ኖየረ እርምሶ ሳብታ ላማር Ꮊቄ። 3 ሙዳ ርና ክትጎካ ፍዝምሴ፥ ፍዝምሳን ሙዳ ሪያርንካ፥ ዋልቃ ሪየረ ክት ካይሳ ፍዝምሳንዳ ካዬ። 4 ክትካ ሰንፓ Ꮊቄ፥ ኮነረ ሰንፔና ኤድንከስታ ሳክማ Ꮊቄ። 5 ሳክመና ኡምናር ሳግዝዴ ኡምነረ ሳክመንም ጋማክዬ።
6 ሳብዘንካ ክትምስባብ ዮሀንስ ጋይምድባብ ዋልቃ ኤች Ꮊቄ፥ ማቶ. 3፡1፤ ማር. 1፡4፤ ሉቃ. 3፡1-2። 7 ክታ ማርካትቸን ኤሰርሶ ኤድ ሙደና አሜንድንግንዳ ሳክመንጎካ ማርካ ማትሶ ኖ Ꮊዴ። 8 ኖ ሳክመንካንታ ማርክርደር Ꮊዳ ዳት ኖይንታ ማታ ሳክማ ካዬ። 9 ኤድ ሙደንካንታ ሳግዝድባብ ዶፈን ሳክመና ፍጫሙደንዘን Ꮊዳ ዶቅዴ።
10 ኖየረ ፍጫሙደንዘን Ꮊቄ፥ ፍጫ ሙደና ፍዝምሳንዳ ክትኬ፥ ፍጫ ሙደና ማቼ ክትም ኤሳክዬ። 11 ይንታ ማችባብከዝደር ኖ Ꮊዴ ክታ ኮችንከስ ማቼ ክትም ግርደኬ። 12 ማታጋካ ዳት ክትም Ꮊፍስባብከስካንተኬ ክታ ላምካ አመንስባብከስካንታ ሙዳ ሳብታ ይንች ማትንተታ ሸን ከትካንታ እምሴ። 13 ከተረ ሳብዘንካ አጥምሰክ ዳት ኤታ ሱሳርንካ፥ ጋይንትነረ ዋሄታ ጋይተካ አነረ ኤታ ጋይተካ አጥማከኬ።
14 ቃለነረ ኤድ ማቼ፥ ዉች እምንተኬ ዶፈንነረ ጮጭሶ ዎንታ ዎክያር ዶቅሴ፥ ባቤንታ ዋልቃ ይንት ይንችና ይንታ ባቤንታ ላማር ዶቅድንደትግንዳ ክታ ቦንቼንም ሰቶቴ።
15 ዮሀንሰረ “ ‘ኖ እስታ ካርንካ Ꮊድባብ እስታ እሪ ክት Ꮊቃንኦል እዘንካ አንድርይ ስገዴ’ ጋይስቶ እ የካንታ ኬዛንዳ ይና ኮኔ” ጋየሮ ማርከርሴ።
16 ክታዘንካ ዉች እምንተንታ በድምናርንካ ዎታ ሙደና ዉች እምንተንዘን እምንተንም ተይቶቴ። 17 ሳብ ህግን ሙሴጎካ እምሴ፥ ዉች እምንተንኬ ዶፈና ማቼ የሱስ ክርስቶስጎካ Ꮊዴ። 18 ሳብም ሰጅባብ ቦድሶ Ꮊየነረ ካዬ፥ ማታጋካ ዳት ሳብ ባቤንካ ክክን ዶቅድባብ ጮይስ ማችባብ ዋልቃ ክታ ይንችና Ꮊክ ክትም መያ ማስሴ።
ስእስንባብ ዮሀንሰታ ማርከትቺ
(ማቶ. 3፡1-12፤ ማር. 1፡1-8፤ ሉቃ. 3፡1-18)
19 አይሁድንከስታ ገችንታ ኤረንባብከስ የሩሳለማርንካ ቄሰንከስምኬ ሌዊንከስም ዮሀንሰደር ኦይትሰኮ፥ “የና Ꮊይራ?” ጋይሶ ኬት ክትም ኦይስሳንᎺይካ ከትካንታ ክት እምሳንዳ ማርካትቸና ኮም ካምዴ፤
20 ኖ “እታ ሳይምስባብ ካይቴ” ጋይሶ ማርከርሳ ዳት ካዳክዬ።
21 ከተረ “ይና የና Ꮊይራ? የና ኤላሶ?” ጋየረኮ ክትም ኦይሰኬ። ካሪ. 18፡15-18፤ ሚል. 4፡5።
ኖየረ “እታ ካይቴ” ጋይሶ ከደረ ማስሴ።
ከተረ “Ꮊዴ ጋይምስባብ ሳብዘንካ ኤሰርሶ ኬዝድባብ የኖ?” ክደረ ጋይሰኬ።
ኖየረ “እታ ካይቴ” ጋይሴ።
22 ከተረ “ይና የና Ꮊይራ? ዎም ኦይችባብ ኤድንከዝደረ ማስንም ዎ ኬዝድንግንዳ የስጎካ Ꮊረስ ጋይዳ?” ክደረ ጋይሰኬ።
23 ኖየረ ሳብዘንካ ኤሰርሶ ኬዝባብ ኢስያስ ኬዛንደትግንዳ
“እታ ‘ጮይስንታ ጎግን ሉልስከቴ’ ጋየሮ
ዴል ቆቸናር ፍብድን ኤታ ኡፍስቴ” ጋይሴ። ኢሳ. 40፡3።
24 ኤድንከስ ኦይትምሳንደና ፈረሳዊያንንከሳርንኬ። 25 ኮካንታ “የና ሳይምስባብ አነረ ኤላስ አነረ Ꮊዴ ጋይምስባብ ሳብዘንካ ኤሰርሶ ኬዝድባብ የስ ማታክንዳ ማቼ ይና፥ Ꮊረተስ ስእዝዳ?” ጋይሶ ኦይሰኬ።
26 ዮሀንሰረ ኩንጋየሮ ከደረ ማስሴ፥ “እ ስዝድንዳ ሎቀኬ፥ ኬዛር ማቼ የታ የ ኤዝዳክባብ የንታ ዎክያር ዎእቴ። 27 ኖ እስታ ቡርጎካ Ꮊድባቤ፥ እታ ክታ ጫመንታ ዞክነንደትም ብልካንታ ዎራ ማድባብ ካይቴ።”
28 ኮና ማቻንዳ ዮሀንስ ስእዝድ Ꮊቃን ዮርዳኖስ ሎቀንታ ፋማ Ꮊፈርድን ብታንያ ካተመናሬ።
ሳብታ ቆለን ማችባብ የሱስ
29 ዛማክንካ ዮሀንስ የሱስ ፈንካ ክደር Ꮊድንካ ሰድሶ፥ “ይና ፍጫሙደንታ ጎመንም Ꮊልእዝድባብ ሳብታ ቆለና ኮኔ! 30 ‘ኖ ኦኮና እስታ ካርንካ Ꮊድባብ እስታ ኤና እሪ ክት Ꮊቃንካንታ እዘንካ አንድርይ ስገዴ’ እ የካንታ ጋይሳንዳ ኮኔ። 31 እተረ እስታ ማታርንካ ኤሳይቴ፥ ኬዛር ማቼ ኖ እስራኤል ዎርሰንካንታ መያ ማድንግንዳ እታ ሎቀካ ስእሰሮ Ꮊዳተ ጋይሴ።”
32 ኮታዘንከረ ዮሀንስ፥ “አያንይ ጭልና ዎላ ግንዳ ጭላርንካ Ꮊንችርድንከ ክታዘን ማድንካ ሰጅቴ፥ 33 እታ እስታ ማታርንካ ክትም ኤሳይቴ፥ ኬዛር ማቼ ሎቀካ እ ስእዝድንግንዳ እም ኦይችባብ፥ ‘አያን ጭልና Ꮊንቸርድንከኬ ክታዘን ዶቅድንካ ሰድምድባብ አያን ጭልንካ ስእዝድባብ ኖዬ’ ጋየሮ እም ኬዝቴ። 34 እተረ ኮም ሰትቴ፥ ኮካንታ ኖ ሳብታ ይንች ማትንተን እታ ማርከርድቴ ጋይሴ።”
የሱሰታ ካርንካ ጎርስምስባብ እርንባብከስ
35 ዛማክንካ ዮሀንስ ቃስተን ይንታካርንካ ጎርስምድባብከስካ ክክን ካርንካ አነታ ኮታር ዎእሶ Ꮊቄ፥ 36 ዮሀንሰረ የሱስ ኮትካ ስገድንካ ሰድሶ፥ “ይና፥ ሳብታ ቆለን!” ጋይሴ።
37 ቃስተና ዮሀንሰታ ካርንካ ጎርስምድባብከስ ዮሀንስ ኮም ጋይድንካ ኤሰርሶ፥ የሱሰም ጎርስምሰኬ። 38 የሱስ ዋልን ጋይሶ ከት ክትም ጎርስምድንካ ሰድስንደትኬ “Ꮊረንት ዝግዳ?” ከደረ ጋይሴ።
ከተረ “ረቢ! የስ ዶቅድንዳ Ꮊብረረ?” ክደር ጋይሰኬ። (ረቢ ጋይንትና ኤስስንባብ ጋይንትዬ)።
39 ኖየረ “Ꮊድሰቶ ሰድከቴ” ከደረ ጋይሴ። ኮካንታ አይሰኮ Ꮊብር ክት ዶቅዳናነረ ሰጀኬ። ኮት ሰጨንካ ክትካ ክክን የካ Ꮊቀኬ፥ ሳዓትና ታማ ማታባብ Ꮊቄ።
40 ዮሀንስ ኬዛንደትም ቃለንም ኤሰርሶ የሱሰታ ካርንካ ጎርስምስባብከሳርንካ ዋልቀና ስምኦን ጴጥሮስታ እስመን እንደርያስ Ꮊቄ። 41 እንደራስ እርምሶ ይንታ እስመን ስምኦነደር አይሶ “መስም Ꮊፍሶቴ!” ክደረ ጋይሴ። (መስይ ጋይንትና ክርስቶስ አነረ ሳይምስባብ ጋይንትዬ) 42 ኮታ ቡር እንደራስ ስምኦነም የሱሰደር ተይᎺዴ።
የሱሰረ ፍስሳ ክትም ሰድሶ “የና ዮነታ ይንችና ስምኦነዬ፥ ይና ኮዘንካ ኦስ ማቼ ከፋ ጋይምደዬ” ክደረ ጋይሴ። (ከፋ ጋይንትና ጴጥሮስ ጋይንት ናንከረ አነረ ላዝይ ጋይንት ማዴ)።
የሱስ ፍልጶሰምኬ ናትናኤልም ኤልና
43 ዛማክንካ የሱስ ገሊላ አይካንታ ዝግዜ፥ ፍልጶሰመረ Ꮊፍስንደትከ “እም ጎርስምካ!” ክትም ጋይሴ። 44 ፍልጶስ እንደርያስግንደኬ ጴጥሮስግንዳ በቴሳይዳ ካተማ ኤድ Ꮊቄ። 45 ፍልጶሰረ ናትናኤልም Ꮊፍሶ፥ “ሙሳ ህግ ማጻፍናር፥ ሳብዘንካ ኤሰርሶ ኬዝድባብከሰረ ቤር ማጻፍናር ክትጎካ ጻፍሳንደትም Ꮊፍሶቴ፥ ኖየረ የሶፍታ ይንች ናዝረት የሱስየ” ክደረ ጋይሴ። 46 ናትናኤል ማቼ፥ “ናዝረታርንካ ኡርማ ር ቦድሶ Ꮊፈርዶ?” ክደር ጋይሴ። ፍልጶሰረ “Ꮊድሶ ሰድካ!” ክትም ጋይሴ። 47 ናትናኤል ፈንካ ክደር Ꮊድንካ ሰድሶ የሱሰረ “ይና! ጩባ ካየንባብ ዶፈን እስራኤል ኤድ!” ጋየሮ ክትጎካ ኬዜ። 48 ናትናኤለረ “Ꮊብረስ እም ኤዝዳ?” ክደር ጋይሴ። የሱሰረ “ፍልጶስ የስም ኤልተርንደታ እር በለስ Ꮊቀንታ ጎያር የስ ዶቅድንካ ሰጅቴ” ጋየሮ ክደር ማስሴ። 49 ኮትᎺይካ፥ ናትናኤል፥ “ኤስስንባቦ! የና ሳብታ ይንቸዬ! የና እስራኤልታ ባንቻዬ!” ጋይሴ።
50 የሱሰረ፥ “የስ አሜንሳንዳ፥ ‘በለስ Ꮊቃንታ ጎያር ማትሶ የስ ዶቅድንካ ሰጅቴ’ እ ጋይሳን ኦሎ? ኮዘንካ ስግዳን ርንከስም አክ ሰተራዬ ጋይሴ። 51 ዶፈን፥ ዶፈን የም ጋይድቴ፥ ጭላ ፎችምድንካ ሳብታ ክታ ይንችነረ ኤድ ይንችንታ ዘን ዉድንኬ Ꮊንቸርድንካ ሰተረቴ ጋይሴ”።ፍዝ. 28፡12።