2
ቤዝንከስም ሰድሶ ጎርስምድባብከስ Ꮊይንታ ዉትንታጎካ Ꮊድንተና
1 ባንችን ሄሮድሰታ ስለናር፥ ይሁዳ ፍጨናር Ꮊፈርድን ቤተልሄም ካተመናር የሱስ አጠርሳንᎺይካ፥ ቤዝም ሰድሰኮ ጎርስምድባብከስ Ꮊይታ ዉትንታጎካ የሩሳሌም ካተመናር Ꮊደኬ። 2 “ኩነረ ጋየረኮ ኦይሰኬ፥ አይሁድንታ ባንች ማትካንታ አጠርምስባብ ኡለና Ꮊብረረ? ቤዝንም Ꮊይንታ ዉትንታጎካ ሰድሶቶ ክትም ጎዝደር Ꮊቶቴ” ጋይሰኬ። ኤር. 23፡5፤ ዘካ. 9፡9፤ ፋይ. 24፡17።
3 ባንችን ሄሮድስ ኮሪን ይ ኤሰርሳንደትካ ገቅሴ። የሩሳሌም ካተማ ኤድንከሰረ ሙዳ ክትካ ክክን ገቅሰኬ። 4 ቀሰንከስም ገችዝድባብከስም ሙደንምከ ሙሴታ ህግንም ኤስዝድባብከስም ሳንስሶ ክርስቶስ Ꮊብር ክት አጠርሳናንከረ ከትም ኦይሰኬ።
5 ከተረ፥ “ሳብዘንካ ኤሰርሶ ከዛቅባብካ ኩን ጋይድንዳ ቤሪካ ጻፍምሳንካንታ፥ ክርስቶስ አጥርምድንዳ ይሁዳ ፍጫር፥ ቤተልሄም ካተመናሬ፥
6 “ ‘ይሁዳ ፍጨናር Ꮊፈርድንዳ በተልሄሞ!ሚክ. 5፡2።
እስታ ዎርሰን እስራኤልም ካርስተርባብከ ጎርስተርባብ የሳርንካ ዉድንካንታ፥
ይሁዳር ዶቅድን አንድር ካተመንከዘንካ Ꮊረከረ የና ቶግዳካዬ’ ” ኩንጋየሮ ከትካንታ ማስሴ። ሚክ. 5፡2።
7 ኮታ ቡሪ ሄሮድስ ቤዝንከስም ሰድሰኮ ጎርስምድባብከስምከ ኤድንከስም ካቼካ ኤልሶ፥ ቤዝና ሰድምሳን ገታ ሰጨን ኦይስሶ ኤሴ፥ 8 ኩን ጋይሰረ በተሌሄማር ከትም ኦይቼ፥ “አይሰቶ፥ ኡለንጎካ ኡርስት ኦይስከቴ፥ የᎺፍሳንደትከረ እተረ አይስቶ ክትካንታ እ ጎስተርንግንዳ Ꮊድሰቶ እካንታ ኬዝከቴ” ጋይሴ።
9 ከተረ ባንችንታ ኬዘንም ኤሰርሳንግንዳ ዉትሰኮ አይሰኬ፥ ይና! Ꮊይንታ ዉትንታጎካ ከት ሰዳን ቤዝና ኡለና ዶቅድን ካርዘን ዎእተርን የለልታ፥ ከታ እሪ አየሮ ከትም ጎርዝድ Ꮊቄ። 10 ቤዝና ዎእሳንደትም ከታ ይ ሰዳንደትካ አንድር ጉርምሰኬ፥ 11 ኤሄናረረ አርድሰኮ ኡለንም እንደን ማራመካ ክክን ሰደኬ፥ ጉፕን ጋይሰኮ ክትካንታ ጎስትሰኬ፥ ከታ ይንታ ሳጥንንከስም ፎችሰኮ ዎርቀን፥ እጣንንምከ ሳየርስንካ ኡርማ ዎዝድን እመንም እምሰኬ።
12 ሄሮድሰደረረ ከት ማዳክንግንዳ ሳብ Ꮊምስካ ከትም ኤግዝምሳንካንታ፥ አብ ጎግካ ከታ ይንታ ፍጨናር ማትሰኮ አይሰኬ።
ኡለን የድሰኮ ግብጽ ፍጨናር ከታ አጥምና
13 ቤዝንከስም ሰድሶ ጎርስምድባብከስ አይሳንደታ ቡር፥ ጮይስታ ክታይንችና ዮሰፍካንታ Ꮊምስካ መያ ማትሶ፥ “ሄሮድስ ኡለንም ደይሳካንታ ዝግድንኦል፥ አምሰዮ ኡለንም እንደንካ ክክን የድሰዮ ግብጽ ፍጨናር አይሳዮ አጥምካ፥ እ የስም ኬዝተርን የለልታ ኮታር ዶእካ” ክትም ጋይሴ። 14 ኮካንታ ዮሴፈረ ሶይትካ አምስንደትከ፥ ኡለንም እንደንካ ክክን የድሶ፥ ግብጽ ፍጨናር አይሴ። 15 ኮታረረ ሄሮድስ ደእተርን የለልታ ዶቅሴ፥ ኮነረ ማቻንዳ ሳብዘንካ ኤስርሶ ኬዛᎺቅባብካ “እስታ ይንችን ግብጽ ፍጨናርንካ ኤልሳቴ” ጋይሳን ጮይስታ ቃለና ቦድምድንግንዴ። ሆሴ. 11፡1።
ሄሮድስ ኡለንከስም ደይስስና
16 ኮታ ቡሪ ሄሮድስ፥ ቤዝንከስም ሰድሶ ጎርስምድባብከስ ክትም ከት ገስሳንደትም ኖ ይ ኤሳንደትግንዳ፥ አንድር ኖ ዋጬ፥ ቤተሌሄም ካተመናርከ ኮታ ካንተንከረ ዶቅድን ሞረንከስ ሙደናር ይንታ ዳምንባብከስም ኦይትሶ፥ ቤዝንም ሰድሰኮ ጎርስምድባብከዘንካ ይ ኤሳንዴት ግንዳ፥ በተሌሄማርኬ ኮታ ካንተካ ዶቅድን ሞረንከሳር ከት አጠርስንካ ቃስተን ስላ ማችባብከስምኬ ኬታ ታመካ ዶቅድን አⷝና ይንች ሙደንም ኖ ደይስሴ። 17 ኮታይካ፥ ሳብዘንካ ኤሰርሶ ኬዝባብ ኤርማሰካ፥
18 “ራሄል ይንታ ይንችንከስካንታ ኤብድንካ፥
አንድር ሞርእኬ ኤፍካ ራማ ካተመናር ኤስምሴ፥
ኮታ ይንችንከሰረ ደእሳንኦል ዳንዳእካንታ ና ማታክዬ” ኩን ጋይምሶ ኬዝምሳንዳ ቤርና ቦድምሴ። ኤር. 31፡15።
ግብጽ ፍጨናርንካ ፈንክ ናዝረት ካተመናር ማትና
19 ሄሮድስ ደእሳን ቡር ጮይስታ ክታይንችና ግብጻር ዮሰፍካንታ Ꮊምስካ መያ ማትሶ፥ 20 “ኡለን ደይሳካንታ ዝግድን ኤድንከስ ደእሳንካንታ፥ አምሳዮ ኡለን እንደንካ ክክን የድሳዮ፥ እስራኤል ፍጨናር አይካ” ጋይሴ። 21 ዮሰፈረ አምሶ ኡለንም እንደንካ ክክን የድሶ፥ እስራኤል ፍጨናር ማት Ꮊዴ።
22 ኬዛርካ ማቼ አርኬላዎስ ይንታ ባቤን ሄሮድሰታ ካርናር ይሁዳ ፍጨንዘን ክት ባንችምሳን ይ ኤሰርሳንደትካ፥ ዮሰፍ ኮታር አይካንታ ጳሴ። ማችንከረ Ꮊምስካ ክትካንታ ክታ እምምሳንጎካ፥ ገሊላ ፍጨናር አይሴ። 23 “ናዝረት ፍጨናርንክንባቤ ጋይምተሬ” ጋይምሶ ሳብዘንካ ኤስርሶ ኬዛቅባብከስካ ኬዝምሳንዳ ቦድምድንግንዳ ናዝረት ጋይምድን ካተመናር Ꮊድሶ ዶቅሴ። ኢሳ. 11፡1፤ ማር. 1፡24፤ ሉቃ. 2፡39፤ ዮሀ. 1፡45።