ኦይትምስባብ ጳውሎስታ ክታ
ፍልሞናካንታ
አርድንታ
ፍልሞነረ ኤስምስባብ ክርስቶሳር ማችባብ Ꮊቄ፥ ቆለስያስ ምክስ ኤሄናር አሜንድባብከሳርንካ ዋልቃባብ ክት ማቻንደትም ኬዝምዴ። ፍልሞነታ አይላ ማችባብ ኦነስሞስ ጋይምድባብ Ꮊቄ፥ ኖ ኮነረ አይለና ይንታ ማተን ቆልስባብዘንካ Ꮊዝሶ ክት አይሳንደትካ ዞክና ኤሀር Ꮊቅባብ ጳውሎሰካ ክክን Ꮊፈርሴ፥ ጳውሎስጎከረ ኦነስሞስ ክርስቶሳር ማትንተካ አሜንሴ፥ ጳውሎስ ፍልሞናካንታ ክት ጻፍሳን ክቴና ፍልሞነረ ማቲ ክደር Ꮊዳዶቅድባብ ፍክስንባብካ ክክን ክት ኤድምድንግንዳ ክትም ገቀርስዝድንዴ። ጉጅሰረ ታ ኦነስሞስ ክርስቶሳር ማችባብ ክት ማቻንካንታ ይና ኮዘንካ ኦስ ክርስቶሳሪ ማችባብ እስመንግንዳ ማስሶ ፋይድንግንዳ ዳት አይላግንዳ ማስሶ ፋይዳክንግንዳ ክትካንታ ኬዝዴ።
ማጻፍን ኮትኮታ ሙዳ የድንተና
አርድንታ (1-3)
ጳውሎስ ፍልሞነም ጎፍሳንዳ (4-7)
ጳውሎስ ኦነስሞስካንታ ፍልሞነም ክታ ምክስና (8-22)
በእንታ (23-25)
1
1 የሱስ ክርስቶስጎካ ዞከርስባብ ማችባብ እ ጳውሎስዘንኬ ዎንታ እስመን ጢማቶስዘንካ፥
ሶልምምስባብ ዎንታ እስመንኬ ዎንታ ፍክስንታ ላኮይት ማችባብ ፍልሞናካንታ፥ 2 ዎንታ ምችነን አፍብያካንታ፥ ዎንካ ክክን ክርስቶሰታ ዳምንባብ ማችባብ አርክጳስካንታ፥ ኮትኮግንደረ የስታ ኤር ሳንምድን *“የስታ ኤር ሳንምድን ጋይድንዳ” የስታ ኤሄናር Ꮊፈርድን ምክስ ኤሄንካንታ ጋይዴ ቆለ. 4፡17። አሜንድባብከስካንታ፥
3 ዎንታ ባቤን ሳብዘንካ፥ ዎንታ ጮይስን የሱስ ክርስቶስዘንከረ ዉች እምንተንኬ ሳራትችንካ የካንታ ማታ።
ፍልሞነታ ሶልመንኬ አሜንካ
4 እስታ ምክስንካ የስም ገቀረረቶ ሙዳᎺይካ እስታ ጮይስን ጋለድቴ፥ 5 ጮይስ የሱሳር የስታ ዶቅድን አሜንኬ አሜንድባብከስካንተረ የስታ ዶቅድን ሶልመን ኤሰርትቴ፥ 6 ክርስቶሰታ ዎንታ ማትንተንካ ዎንታ ዶቅድን ኡርማ ሪ ሙዳ መየካ ኤስምድንግንዳ የስታ አሜንንታ አፍና አብንከስካንታ ማተርንግንዳ ሳብም ምግዝድቴ። 7 እስታ እስመኖ! የስጎካ አሜንድባብከስታ ቡደና ክልምሳንጎካ የስታ ሶልመና አንድር ጉርምኬ ዳቅንተን እካንታ እምቴ።
ጳውሎስ ኦነስሞስጎካ ጋልትምና
8 ኮካንታ የስታ ፍክስን ቦድካ ጋይስቶ የስም ክታካንታ ክርስቶስካ ሙቅም እስታ ዶቅዳዶቆ፥ 9 ማችንከረ ኮትኮግንዳ ይይንዘንካ ስግሶ የሱስ ክርስቶስጎካ ዞከርስባብ ማትስቶ ዶቅድባብ እታ ዶንጀርስባብ ጳውሎስ ሶለመካ ምክስንም ዝግድቴ። 10 እታ ዞክና ኤሀር ዶቅድንካ እስታ ይንቺ ማችባብ ኦነስሞስጎካ የስም ምግዝድቴ። ቆለ. 4፡9። 11 ኦነስሞስ ኮታ ኤና እሪ የስካንታ መይዳክዶቆ፥ ታ ማቼ የስካንተረ ማታ እካንታ መይድባቤ።
12 ይና ክትም የዝደር ማስት ኦይድቴ፥ ክትም የዝደር ኦይድቶ እታ እስታ ማታርንካ Ꮊዳንግንዳ ማስስቶ ፋይድቴ። 13 ክላ ኬዘንጎካ ካሪ ዞከርሶ እ ዶቅድንካ የስታ ካርያር ማትሶ እካንታ ፍግዝድንግንዳ ክት እንካ ክክን ማቻናና እም ጉርምዝዳዶቆ፥ 14 ኬዛርካ ማቼ የስታ ኡርማ ፍክስና ማእስካ ማታክናና ሶልመካ ማድንግንዳ ጋይስቶ የስም ኦይሳክዶቅስቶ Ꮊረሰነረ ይይካንታ ዝጋክቴ።
15 ኦነስሞስ ታ የለልታ ቶክም ሰጫካንታ ፋስምሰረ Ꮊረንግርካ ይና ኮዘንካ ኦስ ሙዳᎺይክንደታ የስካ ክክን ዶቅድባብ ማተሬ። 16 ይና ኮዘንካ ኦስ የስካ ክክን ክት ዶቅድንደረ አይላግንዳ ማታክናና አይለዘንካ ስግ ማትሶ ሶልምምስባብ እስመንግንዴ፥ ኖ እካንታ ሶልምምስባብ እስመኔ፥ ማታጋካ ዳት ዋሄካ ኖይንታ ፍክስንካ የስም መይድንካንታ ይንታ አያንካ ጉጅሶ ክርስቶሰካ የስታ እስመን ክት ማቻንካንታ የስካንታ እንድንካ ሶልምምስባቤ።
17 ይና እም የስታ እስመንግንዳ ማስሳዮ የስ ፋይጀ ገታ እግንዳ ማስሳዮ ፋይድካ። 18 የዘን ክት የልሳን ባች ዶቅሴ አነረ ባዛ ክታዘን ዶቅሴ ባዘንም እዘን ማስካ። 19 ይና እታ ጳውሎስ “ባዘን እታ የስካንታ ናክትቴ” ጋይስቶ እስታ ገታ አንካ ጻፍስቶ የስካንታ መያ ማዝድቴ፥ ማችንከረ የስታ ሰንፔንካንታ የና የስታ ማታርንካ ዎራ እስታ ባዛባብ የስታ ማትንተን እም የስም ገቀርስ ዝክሳዬ። 20 ይና እስታ እስመኖ! ኮም ኡርማ ሪን የስ እካንታ ይድንግንዳ ጮይስካ የስም ምግዝድቴ፥ እስታ ቡደን ክርስቶስካ ኡክንስስካ።
21 ኮም የስካንታ እ ጻፍሳንዳ የስ እካንታ ክትምድንደትም አሜንምስቴ፥ ኮትኮግንደረ እ የስም ኦይዝድንደትዘንካ ስግ የስ ይድንደትም እታ ኤዝድቴ። 22 ኮትከረ ሳብ የንታ ምክስን ኤሰርሶ የንደር እ Ꮊድንግንዳ እም ይድንደትም እስታ Ꮊድን ጉርም ዶቅድንካንታ እ Ꮊዉዝድን ኤሀ ግክስካ።
በእንታ ሳራትች
23 የሱስ ክርስቶስጎካ እንካ ክክን ዞከርስባብ ኤጳፍራ አቦ የስም ጋይዴ፥ ቆለ. 1፡7፤ 4፡12። 24 ኮትኮግንደረ እስታ ፍክስንታ ላኮይት ማችባብከስ ማርቆስ፥ አርስጥሮኮስ፥ ደማስኬ ሉቃሰካ አቦ የስም ጋይደኬ። ኦይት. ፍ. 12፡12-25፤ 13፡13፤ 15፡37-39፤ 19፡29፤ 27፡2፤ ቆለ. 4፡10፥14፤ 2 ጢማ. 4፡10፥11።
25 ጮይስ የሱስ ክርስቶሰታ ዉች እምንተና የንካ ክክን ማታ አምንኤ።