ዮሀንሰታ ለምለም ጋይድንካ ሰድንና
አርድንታ
ዮሀንስ ለምለም ጋይድንካ ሰደሮ ክት ጻፍሳንዳ ክርስቶሳር ማችባብከስ የሱስ ክርስቶስ ኬታ ጮይስ ማትንተን ከት አሜንሳንጎካ ዳይርኬ ማጠካ ኬታዘን የልድ Ꮊቃንደትኬ። ኖ ጻፍና ኡርስት ክት ሰዳንዳ ናበብድባብከስም ኬታ Ꮊድን ጉርምና ቦድማ ማተርንግንዳ ዛብስካንተኬ ኬታዘን የልሳን ዳይርናርንኬ ማጠናር ከታ ይንታ አመንካ ከት ዳቅድንግንዳ ከትም ዛብስካንቴ።
ማጻፍን ኮትኮታር ስግ ካርዘን በድካ ሰድምድንደትኬ ለምለም ጋይድንካ ክክ ካርካ የጃንደትም ሰድምድንዳ Ꮊቄ፥ ኬታኬና ለምለም ጋይድንካ ሰድምስባብከሰረ ኮትኮ ስለናር Ꮊቅባብ አሜንድባብከስ ከት ኤስካንታ ማድንዳ፥ አብንከስ ማቼ አቼካ ማትሶ ዶቅድንዳ ሪንከስታ ካምስካ ኬዝምሳንዴ። የችንታ ኤልስና ካርንካ ካርንካ ጋይምድንደትግንዳ ኮትኮ ማጻፍንታ የድንተንከስ Ꮊክ Ꮊክ ለምለም ጋይድንካ ሰድምሳን Ꮊክ Ꮊክ ካምስካ ማስት ማስት ሰጅዴ። ማጻፍንታ ቡልንጎከረ Ꮊክ Ꮊክ ገቀር ዶቅስንከረ አፍይ ማድን ኬዘና መዬ፥ ኮነረ ሳብ፥ ጮይስ ክርስቶስጎካ አናካርንካ ይይምዳክኖጎግካ ዋልቃዱትካንተኬ በእንታ ማድንግንዳ ሰጣንምኬ ይምኤንባብከስመረ ሙዳ ጉጅሶ ጋምዴ፥ ጋምንተነረ በእንተዘን የልሳንደትካ አሜንምስባብ ማችባብ ኮችንከስካንታ ክላ ጭለንተኬ ክላ ፍጨንታ አንጀንም ከት ተይድንግንዳ ይስዝዴ ጋይድንዴ።
ማጻፍን ኮትኮታ ሙዳ የድንተና
አርድንታ (1፡1-8)
ለምለም ጋይድንደታ ፎችምንኬ ታብዛ Ꮊክ Ꮊክ ምክስ ኤሄንካንታ ኦይትምሳን ክቴና (1፡9-20)
ማጻፍንኬ ታብዛ ማይተምንከስታ ፍርደና (4፡1—8፡1)
ታብዛ ፍርደንከስታ ፍቼንከስ (8፡2—11፡9)
ቃርንኬ ሰንፓ ዶቅድን ቃስቴን ፍዝርንከስ (12፡1—13፡18)
Ꮊክ Ꮊክ ሰድምሳን ለምለምንከስ (14፡1—15፡8)
ሳብታ ታብዛ ዋጭንታ ኡፍተንከስ (16፡1-21)
ባብሎን ካተመንታ ካይንታ፥ ባችርንታ፥ ሳብዘንካ ኤሰራክዶቆ ኬዝድባብ ካርከንባብኬ ዳብሎሰታ ጋምርና (17፡1—20፡10)
በእንታ ፍርደና (20፡11-15)
ክላ ጭላ፥ ክላ ፍጨና፥ ክላ የሩሳሌም ካተመና (21፡1—22፡5)
በእንታ (22፡6-21)
1
1 ኮና ለምለም ጋይድንካ ሰድምድንዳ ቅንች ሰጫር ይይምድን ሪም ይንታ ፍክስንባብከስካንታ ሰጅድንግንዳ ሳብ የሱስ ክርስቶስካንታ እምሳንዴ። የሱስ ክርስቶሰረ ይንታ ክታይንችንም ኦይትሶ ይንታ ፍክስንንባብ ዮሀንስካንታ ኮትኮም ለምለም ጋይድንካ ሰድምድንደትም ክትካንታ መያ ማስሴ። 2 ዮሀንሰረ ሳብታ ቃለንጎኬ የሱስ ክርስቶስ ኤስሳን ዶፈንንጎካ ኮትኮግንደረ ይ ሰጃን ሪንጎካ ሙዳ ማርከርሴ። 3 ኮና ሙዳ ቦድምድንደታ ሰጨና ቅንች ማቻንካንታ ኮትኮም ቤር ቃለንም ናበብድባብ አንጅምስባቤ! ኮትኮግንደረ ቤር ቃለንም ኤሰርድባብኬ ኮታር ጻፍምሳንደትም ቦድባብከስ አንጅምስባብከሰኬ።
ታብዛ ምክስ ኤሄንካንታ ኦይትምሳን ሳራትች
4-5 ዮሀንስዘንካ ታብዛ እስያ ፍጨናር ዶቅድን Ꮊክ Ꮊክ ምክስ ኤሄናር ኤድንከስካንታ፥ ታ ዶቅድባብዘንኬ ኤንገርንካ Ꮊቅባብዘንካ፥ አና ክት Ꮊድባብ፥ ባንችምሶ ክት ዶቅሳን ጎንገንታ እሪ ዶቅድባብ ታብዛ አያንንከዘንካ፥ ኮትኮግንደረ ደእናርንካ አምንተካ ዳነዝ ማችባብ ፍጨዘን ባንችንከስም ቆልድባብ፥ አሜንምስባብ ማርካ ማችባብዘንካ፥ ዎም ሶልምድባብዘንኬ ይንታ ማቀስንካ ዎንታ ጎመናርንካ ባዛካይሳ ዎም ዉችስባብ የሱስ ክርስቶስዘንካ ዉች እምንተንኬ ሳራትቼና የካንታ ማታ። ዉት. 3፡14፤ ለም. 4፡5፤ ኢሳ. 55፡4፤ የቺ 89፡27። 6 የሱስ ክርስቶስታ ባቤን ሳብም ዎ ክትካንታ ፍግዝድንግንዳ ባንችንከስኬ ቄሰንከስ ዎም ማስስባብ፥ የሱስ ክርስቶስካንታ ስለንክንደትዘንካ ስለንክንደታ የለልታ ቦንቼኬ ዎልቀካ ክትካንታ ማታ! አምንኤ። ዉት. 19፡6፤ ለም. 5፡10።
7 ኮሰቸቴ፥ ኡፔካ ኖ Ꮊተሬ፥ ክትም እክስባብ ኤድንከስ ዎራ ነጋከክዶቆ ኤድ ሙደናክትም ሰተረኬ፥ ፍጨዘነረ ዎርሰንከስ ሙደና ክትጎካ ኤፍተረኬ። ኮና ሪና ዶፈኔ። አምንኤ። ዳን. 7፡13፤ ማቶ. 24፡3፤ ማር. 13፡26፤ ሉቃ. 21፡27፤ 1 ተሰ. 4፡17፤ ዘካ. 12፡10፤ ዮሀ. 19፡34፥37።
8 ታ ዶቅድባብ፥ ኤንገር Ꮊቅባብከ፥ Ꮊድባበረ ሙደንም ጋምድባብ ጮይስ ሳብና “እሪነረ ቡርነረ እትቴ!” ጋይዴ። ለም. 22፡13፤ ዉት. 3፡13።
ክርስቶስ ለምለም ጋይድንካ መያ ማትና
9 የሱስጎካ ማጠንምኬ ክታ ባንችምንታ ኮትኮግንደረ ዳንዳእንም የንካ ክክን ካስምድባብ እታ የንታ እስመን ዮሀንስ ሳብታ ቃለኬ የሱሰታ ማርካትቼንጎካ ፍጥሞ ጋይምድን ሎቀታ ዎክናር ዶቅድን ደንንዘን Ꮊቃቴ። 10 ጮይስታ ሰጨናይካ አያን ጭልንታ ገቅርናር ማትስቶ እ ዶቅድንካ ፍቻ ፉገርድንደትግንዳ ካምድንዳ አንድር ኡፍስ እስታ ቡርጎካ፥ 11 “የስካንታ ሰድምድንደትም ማጻፍናር ጻፍሰዮ ታብዛ Ꮊክ Ꮊክ ምክስ ኤሄንከሳር ኤድንከስካንታ ጋይንተነረ ኤፈሶን፥ ሰመነረሳር፥ ጰርጋሞናር፥ ትያጥሮናር፥ ሰርዴሳር፥ ፍላድልፍያርኬ ሎዶቃር ኦይትካ” ኩን ጋይድንካ ኤሰርሳቴ።
12 Ꮊይ እም ኬዛናንከረ ኤስካንታ ኦስ እስታ ቡር ዋልን ጋይስቴ፥ ዋልን እ ጋይሳንደትከረ ዎርቀካ ኡርሰርሳንዳ ታብዛ ዞጰንከስም ዎደርድንደትም ሰድቴ። 13 ዞጰንከስም ዎደርድንደታ ግድናር ኤድ ይንችም ካምድባብም ሰድቴ፥ ኖየረ ይንታ ዱትን የለልታ የልድን ቃልም አፍላ ቆበርስባብ፥ ይንታ ኦንገዝንም ዎርቀካ ኡርሰርሳንደትካ አሜችባብ Ꮊቄ። ዳን. 7፡13፤ 10፡5። 14 ክታ ቃደንኬ ክታ ማተነረ አዝግንደኬ፥ ጫምሳ አፍለንግንዳ Ꮊቄ፥ ክታ አፍንከሰረ ኖሄታ ሎግንችግንዳ Ꮊቀኬ። 7፡9፤ 10፡6። 15 ክታ ዱትንከሰረ ኖሄታ ዎልስማር ዘይሳን ጋይንም ካምደኬ፥ ክታ ኡፍስነረ አንድር ሎቃ ሶረንታ ኡፍስግንዳ Ꮊቄ፥ ሕዝ. 1፡24፤ 43፡2። 16 ይንታ ምዝ አንንካ ታብዛ ቤዝንከስም የድሶ Ꮊቄ፥ ቃስተንንጎካ ቃርድንዳ ማሳ ክታ አፋርንካ ዉድ Ꮊቄ። ክታ ባለነረ ሙዳ ሳግድን Ꮊይግንዳ Ꮊቄ።
17 ክትም እ ሰጃንደትካ ደእስባብ ኤድግንዳ ማትስቶ ክታ ዱትንታ ጎያር ዋችቴ፥ ኖ ማቼ ይንታ ምዝ አንንም እዘን ዎድሶ፥ “Ꮊይጳሴ፥ እሪነረ ቡርነረ እትቴ፥ ኩን ጋይሴ። ኢሳ. 44፡6፤ 48፡12፤ ለም. 2፡8፤ 22፡13። 18 እታ ሰንፔካ ዶቅድባብቴ፥ ደእትት ዶቆ፥ ኬዛር ማቼ ይና እታ ስለንካ ዶቅድባብቴ፥ ደእንዘንኬ ጩልጩል ጎርንዘን ገችታ ኤራ እስታ ዶቅዴ። 19 ይና የስ ሰዳንደትም፥ ታ ዶቅድንደትምኬ ኮታ ቡር ይይምድንደትም ጻፍካ። 20 እስታ ምዝ አንንዘን የስ ሰድባብከስ ታብዛ ቤዝንከስተኬ ዎርቀካ ኡርሰርሳን ታብዛ ዞጰን ዎደርድንደታ ቡልና ኮግንዴ። ታብዛ ቤዝንከስ ታብዛ Ꮊክ Ꮊክ ምክስ ኤሄንከስታ ክታይንችንከስኬ፥ ታብዛ ዞጰንከስም ዎደርድንደረ ታብዛ Ꮊክ Ꮊክ ምክስ ኤሄንከሰኬ”።