18
ባብሎን ካተመንታ ዋችና
1 ኮታ ቡር አንድር ገችታ ኤራ ዶቅድባብ አብ ክታይንችና ጭላርንካ Ꮊንቸርድንካ ሰድቴ፥ ክታ ቦንቼንታ ሮጵንዘንካ አምሳንዳ ፍጨና ሳክማ ማቼ። 2 አንድር ኡፍስከረ “አንድር ማቻን ባብሎን ካተመና ዋቼ! ዋቼ! ግምዘንከስታ ዶቅንትካር ማቼ! ቱና አያንንከስታ ገችንትካር ማቼ! ይንኤርዝድንደተኬ ቦስዝድን አፍትንከስታ ገችንት ካሪ ማቼ!ኢሳ. 13፡21፤ 21፡9፤ ኤር. 50፡39፤ 51፡8፤ ለም. 14፡8። 3 ቤልምንካንታ ጎስዝድን ዎይን ዎጭምን ዎርሳ ሙደና ዎጭተኬ፥ ፍጨዘን ባንችንከስ ኮትካ ክክን ቤልምተኬ፥ ፍጨዘን ዛለንባብከሰረ ኮታ በድ Ꮊላ ጋይንዘንካ አምሳንዳ ቆልመንባብከስ ማተኬ” ኩን ጋይሶ ፍፍሴ። ኢሳ. 23፡17፤ ኤር. 51፡7።
4 አብ ኡፍሰረ ጭላርንካ፥
“እስታ ዎርሰኖ! ኮታ ጎማ ፍክስንካ ዋልቃ የ ማዳክንግንዳ፥
ሳብ ኮትም ዋጭድንᎺይካ ኮታ ዋጭን ተይድባብ የ ማተራክንግንዳ፥
ኮታርንካ ዉትከቴ!ኢሳ. 48፡20፤ ኤር. 50፡8፤ 51፡6።
5 ኮታ ጎመንታ በድምነረ ጭላር የለልታ የልቴ፥
ሳብ ኮታ ዳቀልስንከስም ገቀርሴ፥ ፋይ. 18፡20-21፤ ኤር. 51፡9።
6 ኮታ ይተንከካ ኮትካንታ እምከቴ፥
ኮት ፍክሳን ፍክስንዘንካ ጉጅሶ ኮትካንታ ናከቴ፥
ናየረ Ꮊክ Ꮊክ ዎጭምንከስም ኮት ቡቅሳን ኡፍተናር፥
ጉጅሶ አንድር ማስሰቶ ኮትካንታ ቡቅከቴ፥ የቺ 137፡8፤ ኤር. 50፡29።
7 ና ይንታ ማተንታ ቦንቼንምኬ Ꮊላ ጋይንተን እምሳንደትከካ
ማጠንምኬ ሞርእን ኮትካንታ እምከቴ፥ Ꮊረታ ጋይሴ
ና ይንታ ቡደናር ‘ባንች ማትስቶ ዶቅሳቴ፥
ቡድነረ ካይቴ፥
ሞርእነረ ቦድሶ እም የላዬ’ ጋየሮ ና ጬቅዴ።
8 ኮካንታ ኮትም የልድን ዋጭና ሙዳ ዋልቃሰጭ ኮታዘን የልዴ፥
ደእኬ ሞርእ ዳቀረ ኮታዘን የልዴ፥
ኖሄከረ ና አተርተረ፥
ኮታዘነረ ፋረድባብ ጮይስ ሳብና ዳቅሜ” ኩን ጋይድንካ ኤሰርስቴ።
9 ኮትካ ክክን ቤልምስባብከስኬ Ꮊላ ጋይሶ Ꮊቅባብ ፍጨዘን ባንችንከስ ኮት አተርድንካ ዉድን ጩበን ሰደረኮ ኮትካንታ ፍፈረኮ ኤብደኬ። 10 ኮታ ማጥርንመረ ጳስካ ጎትካ ዎእሰኮ “የና አንድር ካተመና፥ የና ዳቅማ ማቻን ባብሎን ካተመኖ! የስታዘን ፍርደና ዋልቃ ሳዓታር Ꮊዳንካንታ የስም የኤ! የስም የኤ!” ጋይደኬ። ሕዝ. 26፡16-17።
11 ባሃርንዘንካ ቃልዝድን ኬታ ማርከብናር ጫነርሳንደትም ይና ኮዘንካ ኦስ ሰንድባብ ካየንካንታ ፍጨንዘን ዛለንባብከሰረ ኮትካንታ ኤብደኬ፥ ኮትካንተረ ሞርእደኬ፥ ሕዝ. 27፡31-36። 12 ኬታ ማርከብናረረ ጫንምሳንዳ ዎርቃ፥ ዱንድ፥ ቦንችምሳን ሰይን፥ ሮጵድንዳ እንቁ ጋየርድን ሪ፥ ሳዝ አፍላ፥ ማቀስም ካምድን አፍላ፥ ድርካ ኡርሰርሳን አፍላ፥ ዘይም አፍለኬ ኡርማ ዎዝድን Ꮊቃ ሙደን፥ ዶንገርታ አችካ፥ ስንጋ ማቻን Ꮊቀካ፥ ጋይዘንካ፥ ስብልዘንኬ አዝም ካምድንደትካ ኤሀ ኡርዝድን እብነበረድ ጋየርድንደትካ ኡርሰርሳን ሪ ሙዳ፥ 13 ቀረፋ ጋየርድንዳ ሳዉሰታ ማድን Ꮊቀታ ኦፍር፥ Ꮊክ Ꮊክ ሳዉሳካንታ ማድንርንከስ፥ ዎዝድን Ꮊቃ፥ ከርቤ ጋየርድንዳ ዎዝድሪ፥ እጣን፥ ዎይን ዎጭምና፥ Ꮊቃ ዎይረዘንካ ጩጰርሳንዳ ዛይት፥ እላ፥ ዘርግ፥ መሄንከስ፥ ቆልንከስ፥ ፋረንከስ፥ ፋራ ጎጅድንዳ ጋር ግንደንዳ ሰረገለንከስ፥ አይለንከስኬ አብ ኤድንከሰረ ዋር Ꮊቀኬ። ሕዝ. 27፡12፤ 13፡22። 14 ዛለንባብከሰረ “የስ አንገርሳን ኡርማ ሪንከስ ሙዳ የዘንካ ጎተርሶ አይተኬ፥ የስታ ቆልመነረ የስ ሰግድን ሪንከሰረ ሙዳ ካይተኬ፥ ይና ኮዘንካ ኦስ ከትከነም ሙዳ ቦድሶ Ꮊብዳከዬ!” ኮትም ጋይደኬ። 15 ከትኬና ሪንከስም ሙዳ ሰነረኮ ቆልመካ ማችባብ ዛለንባብከስ ኮታ ማጥርንም ጳስካ ጎትካ ዎእደኬ፥ ኤፈረኮ ሞርኤረኮ፥ ሕዝ. 27፡31፥36። 16 “ሳዝ አፍለኬ ዘይም ማቀስም ካምድን አፍለረ ቆበርድ Ꮊቃንዳ ዎርቀኬ ቦንችምሳን ሰይን ፍግዝድባብከስ ሙዳ ባሀርንዘን ዛለን ዛልድባብከስ ሙደና ጎትካ ዎእደኬ። ኢሳ. 23፡14፤ ሕዝ. 27፡26-30። 17 ኮከንዳ ቆልማ ዋልቃ ሳዓታር ካይዴ!” ጋይደኬ።
ሎቀንዘንካ ቃልዝድን መርከብን በይድባብከስ ሙደና መርከብንታ ዘን ፍግዝድባብከስ ሙደና፥ ባሀርንታዘን ዛልእድባብከስ ሙደና ጎትካ ዎእደኬ፥ ኢሳ. 23፡14፤ ሕዝ. 27፡26-30። 18 ኮት አተርድንካ ዉድን ጩበን ኬታ ይ ሰዳንደትካ “ኮትኮ አንድር ካተመን ካምድንዳ ቦድሶ አብ ካተማ ዶቅዶ?” ጋየረኮ ፍፍሰኬ። ሕዝ. 27፡32። 19 ኬታ ይንታ ማተንዘነረ ቡል ይጭሰኬ፥ ኤፈረኮ ሞርኤረኮ ኩንጋየሮ ፍብደኬ፥ “ባሀርንዘን ዶቅድን ማርከብንባብከስ ሙደና ኮታ ቆልመንካ ቆልስባብከስ፥ ና አንድር ካተመና ዋልቃ ሳዓት ዋር ኮት ካይዳንካንታ ኮትም የኤ! ኮትም የኤ!” ሕዝ. 27፡30-34።
20 የና ጭለኖ! ኮትካ የስም ጉርምሳ! ሳብ የካንታ ኮታዘን ፋረጃንካንታ የታ ሳብካንታ ፋስምስባብከስ፥ ኦይትምስባብከስኬ ሳብዘንካ ኤሰርሶ ከዝድባብከስመረ የም ጉርምሳ!ካሪ. 32፡43፤ ኤር. 51፡48።
21 ኮታ ቡር ዋልቃ ዳቅማ ክታይንችን አንድር ደይስን ሰይን ከከንደትም ዋልቃ ሰይን አምስሶ “አንድር ማቻን ካተመና ባብሎን ኮ ግንዳ አንድር ዎልቀካ Ꮊቅምሶ ና ዋችተሬ፥ ይና ኮዘንካ ኦስ ቦድሶ ና Ꮊፈርተራክዬ ኩንጋየሮ ባሀርናር ኦይቼ። ኤር. 51፡63-64፤ ሕዝ. 26፡21። 22 ሶንግንም ቃንድባብከስኬ የችንባብከስታ ኡፍስ፥ አንዳለን ፉግድባብከስተኬ ፍቼን ፉግድባብከስታ ኡፍስና አናካርንካ የሳር ኤስማዬ፥ Ꮊምንመረ ሪ አንታ ሩርምካ ፍግዝድባብ እብለንባብ ኤድ ይና ኮዘንካ ኦስ የሳር Ꮊፈራዬ፥ ደይስን ደይዝድንደታ ኡፍስና ይና ኮዘንካ ኦስ የሳር ኤስማዬ። ሕዝ. 26፡13፤ ኢሳ. 24፡8። 23 ዞጰንታ ሳክመነረ ይና ኮዘንካ ኦስ የሳር ሳካዬ፥ እንጅድባብተኬ ይእድንደታ ኡፍስ ይና ኮዘንካ ኦስ የሳር ኤስማዬ፥ የስታ ዛለንባብከስ ፍጫሙደንዘን አንድር ኤድ Ꮊቀኬ፥ የስታ ሳገንካ ዎርሰንከስም ሙዳ ኮተርስተዬ። ኤር. 7፡34፤ 25፡10።
24 “ኮታር ሳብዘንካ ኤሰርሶ ከዝድባብከስተኬ ሳብካንታ ፋስምስባብከስታ፥ ፍጨዘን ደይስምስባብ ኤድንከስታ ሙዳ ማቀስና Ꮊፈርቴ”። ኤር. 51፡49።
18:2 ኢሳ. 13፡21፤ 21፡9፤ ኤር. 50፡39፤ 51፡8፤ ለም. 14፡8።
18:3 ኢሳ. 23፡17፤ ኤር. 51፡7።
18:4 ኢሳ. 48፡20፤ ኤር. 50፡8፤ 51፡6።
18:5 ፋይ. 18፡20-21፤ ኤር. 51፡9።
18:6 የቺ 137፡8፤ ኤር. 50፡29።
18:10 ሕዝ. 26፡16-17።
18:11 ሕዝ. 27፡31-36።
18:13 ሕዝ. 27፡12፤ 13፡22።
18:15 ሕዝ. 27፡31፥36።
18:16 ኢሳ. 23፡14፤ ሕዝ. 27፡26-30።
18:17 ኢሳ. 23፡14፤ ሕዝ. 27፡26-30።
18:18 ሕዝ. 27፡32።
18:19 ሕዝ. 27፡30-34።
18:20 ካሪ. 32፡43፤ ኤር. 51፡48።
18:21 ኤር. 51፡63-64፤ ሕዝ. 26፡21።
18:22 ሕዝ. 26፡13፤ ኢሳ. 24፡8።
18:23 ኤር. 7፡34፤ 25፡10።
18:24 ኤር. 51፡49።