1 Che rahɨreta, aní chira peroya opacatu “Espíritu pɨpe añehe” ehi vahe. Iyacatu rumo pesãha rane ‘¿Tũpa suindar ité pĩha?’ pe hesa pɨpe. Esepia, setá vai oporombohe angahu tẽi vahe oguata opacatu ɨvɨ rupi yuvɨreco. 2 Co rese peicuara ava Espíritu Tũpa suindar vɨreco vahe: “Jesucristo ou opacatu güete reseve” ehise, aipo ehi vahe vɨreco Espíritu Tũpa suindar ité. 3 Acoi aipo ndehi vahe rumo, ndovɨrecoi eté Espíritu Tũpa suindar oyese. Ahe rumo vɨreco espíritu Cristo amotarẽhɨmbar tẽi. Aracaco niha pesendu ñehesa acoi yamotarẽhɨsar espíritu ou vaherã resendar. Ahe cũritei secoi co ɨvɨ pɨpe.

4 Che rahɨreta, pe rumo Tũpa suindar peico. Iyavei pesecopɨ ité acoi semira tẽi vahe peico. Esepia, Espíritu secoi vahe pe rese, ahe ipĩrata catu Caruguar sui. 5 Evocoi co ɨvɨ pɨpendar tẽi yuvɨrecoi vahe. Esepia, oñehe mbahe ɨvɨ pɨpendar rese tẽi yuvɨreco. Iyavei ava supindar ae ité oyapɨsaca iñehe rese yuvɨreco. 6 Yande rumo Tũpa suindar yaico. Acoi oicua vahe Tũpa oyapɨsaca yande ñehe rese yuvɨreco. Acoi ndahei vahe Tũpa rahɨr, ahe yande ñehe ndosendu potai yuvɨreco. Sese yande yaicuara vɨreco vahe Espíritu supi eté vahe, yaicua aveira vɨreco vahe espíritu oporombopa tẽi vahe.

7 Che rɨvɨreta, che rembiaɨsu, yayeaɨsu ñepei-pei. Esepia, yeaɨsusa Tũpa suindar. Opacatu osaɨsu vahe ava, ahe Tũpa rahɨr, oicua ité avei Tũpa yuvɨreco. 8 Acoi ndosaɨsui vahe ava, ahe ndoicuai Tũpa yuvɨreco. Esepia, Tũpa yeaɨsusa secoi. 9 Ẽgüe ehi omboyecua oporoaɨsusa yandeu. Ahe niha, ombou Guahɨr ñepei vahe co ɨvɨ pɨpe ichui yande recove ãgua. 10 Ndahei yande rane yasaɨsu Tũpa. Ahe rane rumo yande raɨsu iyavei ombou Guahɨr imano ãgua yande angaipa repɨrã. Ahe niha poroaɨsusa supi eté vahe.

11 Che rɨvɨreta, che rembiaɨsu, ẽgüe ehi Tũpa yande raɨsu. Evocoiyase ẽgüe yahe aveira yande yayeaɨsu ñepei-pei yepi. 12 Ndipoi eté ava osepia vahe Tũpa. Yayeaɨsuse rumo, Tũpa secoi yande rese. Iporoaɨsusa evocoiyase oime ité yande rese. 13 Ahe ombou oEspíritu yandeu; ipɨpe sui yaicua sese yande reco iyavei yaicua ahe secoise yande rese. 14 Iyavei orosepia vahe, oromombehu: yande Ru ombou Guahɨr ava ɨvɨ pɨpendar pɨ̃sɨro ãgua. 15 Acoi ava “Jesús niha Tũpa Rahɨr” ehi vahe, ahe secoi eté Tũpa rese; Tũpa evocoiyase secoi sese.

16 Ẽgüe yahe icua, seroya tuprɨ ãgua co Tũpa yande raɨsusa. Ahe niha yeaɨsusa. Acoi vɨreco vahe oporoaɨsusa, yuvɨrecoi avei sese; ahe avei secoi sese. 17 Ẽgüe yahe Tũpa poroaɨsusa mboavɨye tuprɨ ichui yande sɨquɨyeẽhɨ ãgua acoi oyepotase arɨ cañɨ yandeu. Esepia, yande yaico co ɨvɨ pɨpe inungar Jesucristo. 18 Yasaɨsu tuprɨ itese Tũpa, ndipoi chira sɨquɨyesa yandeu. Ẽgüe yahese, opara sɨquɨyesa yande sui. Esepia, cañɨsa sui oime sɨquɨyesa yandeu. Sese acoi ava osɨquɨye ai vahe, ndoporoaɨsu tuprɨi eté.

19 Yɨpɨndar Tũpa yande raɨsu. Sese cũritei yande avei yasaɨsu Tũpa. 20 Amove ava aipo ehi tẽi: “Che asaɨsu Tũpa” ehi. Ahe ramoseve rumo vɨroɨ̃ro omboetasa Tũpa reroyasar. Evocoiyase ahe semira tẽi vahe. Esepia, acoi ndosaɨsui vahe omboetasa Tũpa reroyasar sepiase, ndoicatui Tũpa ndayasepiai vahe raɨsu ãgua. 21 Jesucristo ombou co porocuaita yandeu: acoi osaɨsu vahe Tũpa, tosaɨsu avei omboetasa seroyasar yuvɨreco.