Tũpa Ñehengagüer HEBREOS 1
ICUACHIAPRƗ HEBREO YUVƗRECOI VAHE UPE
HEBREOS
1
Guahɨr Jesucristo pɨpe Tũpa oyemboyecua yandeu
Aracahe suive setá yupagüer Tũpa omombehu uca yande ramoi eta upe oñehe mombehusar upe. Iyavei ambuae mbahe rupi oseca imombehu tuprɨ ãgua yuvɨreco chupe. Cũritei yandeu omoñehe uca Guahɨr. Chupe avei oyapo uca opacatu mbahe. Ahe mbahe sembiapo chupe nara ité. Ahe niha Vu Tũpa recocuer porañetesa secoi. Ẽgüe ehi eté, ahe Vu recocuer tuprɨ ité. Ahe opacatu mbahe omovɨracua oñehe pĩratasa pɨpe. Yande angaipagüer sui yande moatɨro pare oso, oguapɨ Vu acato cotɨ oĩ ɨvave cute.
Tũpa Rahɨr seco ɨvate catu Vu rembiguai ɨva pendar sui
Tũpa Rahɨr secoi ɨvate catu vahe Vu rembiguai ɨva pendar yuvɨrecoi vahe sui. Ahe vɨreco omborerecuasa ɨvate catu vahe ichui. Esepia, Tũpa aipo ndehi eté güembiguai upe:
“Nde che Rahɨr ereico; co pɨpe amondo nde recove ãgua” ndehi eté.
Iyavei:
“Che Tu aicora, ahe evocoiyase che rahɨr secoira” ndehi avei chupe.
Ichui rumo ombouse Guahɨr ñepei vahe co ɨvɨ pɨpe aipo ehi:
“Tomboetei opacatu che rembiguai yuvɨreco”
ehi. Evocoiyase güembiguai rese oñehe Tũpa aipo ehi icuachiaprɨ aracahendar pɨpe:
“Ayapo che rembiguai ɨvɨtu nungar, tata nungar avei cheu oporavɨquɨ vaherã” ehi.
Tahɨr rese ñehesa rumo aipo ehi icuachiaprɨ aracahendar pɨpe:
“Che Yar Tũpa, nde mborerecuasa rumo apɨrẽhɨ vaherã ité.
Ereporocuai nde reco ɨ̃vi tuprɨsa pɨpe yepi.
Mbahe ihɨ̃vi vahe raɨsusar ereico.
Iyavei mbahe naporai vahe raɨsuẽhɨsar.
Sese nde Yar Tũpa ité, nde poravo, omondo avei torɨvetesa ndeu ɨvate catu vahe opacatu nde mboetasa sui” ehi.
10 Iyavei aipo ehi iri:
“Nde, ore Yar, yɨpɨsuive eremovɨracua vahe ɨvɨ.
Nde ité avei ereyapo ɨva.
11 Opacatu co nde rembiapo opa vaherã tẽi,
inungar turucuar cuacua oyearo vahe opa.
Nde rumo apɨrẽhɨ vaherã ité ereico.
12 Ipare ereyapara inungar turucuar yapaprɨ iyavei eresecuñarora inungar oturucuar osecuñaro vahe.
¡Nde rumo ndereñecuñaroi chietera!
Iyavei nde recocuer ndopai vaherã ité” ehi.
13 Ndahei que ñepei ɨva pendar güembiguai upe Tũpa aipo ehi:
“Eguapɨ che acato cotɨ, ahese che amondora nde amotarẽhɨmbar nde povrɨve” ehi.
14 Esepia, opacatu Tũpa rembiguai espíritu yuvɨrecoi chupe oporavɨquɨ ãgua, icuaiprɨ avei ava ipɨ̃sɨropɨrã pɨ̃tɨvɨi ãgua.