1 Ñepei arɨ pɨpe Jesús oyevɨ ou tecua Capernaum ve, ahese opacatu oyandu ñepei oɨve secoise yuvɨreco. 2 Cũriteimi voi eté setá ava oñemonuha yuvɨreco secosave. Sese ndipoi eté ava reique iri ãgua oɨ pɨpe oquendɨpɨ rupi. Ahe rumo omombehuño ité Vu Ñehengagüer. 3 Aheseve irungatu mbɨa vɨroyepota ndoguatai vahe yuvɨreco chupe. 4 Ahe rumo ndiyai seroique ãgua Jesús uve ava rehɨisave yuvɨreco. Sese vɨroyeupi oɨ harɨve seraso yuvɨreco. Aheve teca vɨrocua oɨ sui yuvɨreco; supi vɨroyɨ supa reseve imondo Jesús rovai tuprɨ yuvɨreco. 5 Ahe oicuase co mbɨa yuvɨrecoi vahe oyese yeroya, aipo ehi imbaheasɨ vahe upe:

—Che rahɨr, che ñero nde angaipa rese ndeu —ehi.

6 Moisés porocuaita rese oporombohe vahe rumo ipɨhañemoñeta aheve yuvɨnoi: 7 “¿Mahera co mbɨa aipo ehiño tẽi oñehe? Ahe oyemboɨvate ai tẽi vahe Tũpa ñehe nungar pɨpe tẽi oñehe. Tũpaño ité niha oicatu ava angaipa upe oñeroi ãgua” ehi. 8 Ahe rumo oicuaño ipɨhañemoñetasa, sese aipo ehi:

—¿Mahera vo pepɨhañemoñeta rai tẽi che rese? 9 ¿Uma rupi vo ñehesa ndayavaimi catu ndoguatai vahe upe: “Nde angaipa rese che ñero ndeu” hesa pĩha, anise: “Eñarapuha, esupi nde rupa, eguata” hesa tie? 10 Tapeicua ru che, Ava Rɨquehɨr, areco mborerecuasa co ɨvɨ pɨpe ava angaipa upe che ñero ãgua —ehi.

Evocoiyase aipo ehi imbaheasɨ vahe upe:

11 —Eñarapuha, esupi nde rupa, eso nde rẽtave —ehi.

12 Imbaheasɨ vahe aipo ihe ramoseve, oñarapuha, osupi vupagüer, osẽ oso ichui opacatu ava rembiepiave. Sese opacatu oyepɨhamondɨi yuvɨreco, omboetei Tũpa yuvɨreco aipo ehi:

—Yɨpɨsuive ndayasepiai vahe ité co nungar mbahe —ehi tẽi yuvɨreco.

13 Ipare Jesús oso iri ɨpa ɨvɨi. Aheve oporombohe oyese ava rehɨi yemboyase. 14 Ichui oguata vɨtese, osepia Leví, Alfeo rahɨr, guarepochi rerocuasave chinise, aipo ehi chupe:

—Erio che rupi —ehi.

Evocoiyase Leví opũha, oso voi supi.

15 Ipare ocaru Leví rẽtave güemimbohe reseve yuvɨreco, ava sui guarepochi rerocuasar iyavei ava yangaipa vahe pãhuve. Esepia, setá ava osaquɨcue moñaño ité yuvɨreco. 16 Evocoiyase Jesús ocaruse ipãhuve, fariseo eta, oporombohe vahe Moisés porocuaita rese avei oporandu semimbohe eta upe yuvɨreco:

—¿Mahera ru pe mbohesar ocaru ava guarepochi rerocuasar iyavei yangaipa guasu vahe pãhuve tẽi? —ehi.

17 Ahe rumo osenduse iñemoñetasa, aipo ehi chupe:

—Ava nimarai vahe ndosecai eté oporoposano vahe, imbaheasɨ vaheño rumo oseca yuvɨreco. Che ndayui ava seco tuprɨ vahe reca; che rumo ayu ava yangaipa guasu vahe reca —ehi.

18 Ñepei arɨ pɨpe Juan Oporoãpiramo vahe remimbohe oyecuacu yuvɨreco, fariseo eta avei oyecuacu yuvɨreco no. Evocoiyase movɨro mbɨa ipãhu pendar yuvɨraso, oporandu Jesús upe:

—¿Mahera ru nde remimbohe ndoyecuacui eté yuvɨreco? Esepia, Juan remimbohe iyavei fariseo eta oyecuacu yuvɨreco yepi —ehi yuvɨreco chupe.

19 Evocoiyase omboyevɨ ahe ava upe:

—¡Ndiyai eté ichohoprɨ mendasave iyecuacu ãgua imer oicove vɨtese ipãhuve! 20 Oimera rumo arɨ imer reraso ãgua ichui curi, ahese ramo oyecuacura yuvɨreco cute —ehi.

21 “Ndiyai yayapete turucuar cuacua turucuar ipɨasu vahe pɨpe. Esepia niha, ipɨasu vahe oichohó turucuar cuacua imondoro iri ãgua, ichorosa evocoiyase tuvicha catu-catuño ité. 22 Iyavei uva rɨcuer ipɨasu vahe ndiyai iñasa mbahe pirer cuacua pɨpe. Esepia, uva rɨcuer ipɨasu vahe osose mbahe pirer cuacua vahe pɨpe, ombopuñora, uva rɨcuer evocoiyase ocañɨpa tẽira, iyavei mbahe pirer ocañɨ tẽi aveira. Sese uva rɨcuer ipɨasu vahe ñoñasara mbahe pirer ipɨasu vahe pɨpe yepi” ehi.

23 Ñepei mbɨtuhusa arɨ pɨpe, Jesús oguata güemimbohe rese trigo pãhu rupi fariseo rembiepiave yuvɨreco. Ahese semimbohe oipoho-poho sãhɨi yuvɨreco. 24 Evocoiyase fariseo aipo ehi:

—¡Mahera nde remimbohe mbɨtuhusa arɨ pɨpe oporavɨquɨño yuvɨreco! —ehi yuvɨreco chupe.

25 Ahe rumo aipo ehi:

—Peyeroquɨ niha icuachiaprɨ aracahendar pɨpe mborerecuar guasu David rembiapogüer rese acoi ndasɨepoise ondugüer reseve yuvɨreco aracahe. 26 Pahi rerecuar ɨvate catu vahe Abiatar serer vahe recose, ahese David oique Tũpa rẽta pɨpe pan imboeteiprɨ Tũpa upendar reca ondugüer reseve yuvɨrohu ãgua. Ahe chupe acoi ndipotasai ihu ãgua yuvɨreco viña; judío pahi yuvɨrecoi vahe upeño ité niha ipotasa ihu ãgua yepi. Ahe rumo ohuño, omondo avei ava oyeupindar tohu aracahe —ehi.

27 Iyavei aipo ehi:

—Mbɨtuhusa arɨ yaposa ava upe nara, ndahei ava yaposa mbɨtuhusa arɨ upe nara. 28 Sese Ava Rɨquehɨr mbɨtuhusa arɨ rerecuar secoi —ehi Jesús fariseo upe.