8
Jesús oyopoi cuatro mil cuimbahe
Ñepei arɨ pɨpe setá ava oyemboya iri Jesús rese yuvɨreco. Ndipoi rumo mbahe icaru ãgua. Sese oñehe güemimbohe eta upe aipo ehi:
—Iparaɨsu catu co ava yuvɨreco cheu. Esepia, mbosapɨ arɨ yuvɨrecoi yande pɨri, iyavei ndipoi eté mbahe semihura. Amondopase sẽtave sɨeporẽhɨ reseve, vɨrovɨapi-api tiẽtera tɨeporẽhɨ perɨ rupi yuvɨreco viña. Esepia, setami ava yugüeru amombrɨ sui —ehi.
Semibohe aipo ehi yuvɨreco chupe:
—¿Mara yahera vo ava tohu mbahe mondo cohave ava porẽhɨsave? —ehi.
Ahe oporandu:
—¿Mbovɨ vo pan pereco? —ehi.
—Orovɨreco siete pan —ehi semimbohe yuvɨreco chupe.
Evocoiyase, “Peguapɨ ɨvɨ harɨve” ehi ava rehɨi upe. Ahese oipɨsɨ siete pan, “Avɨye ndeu” ehi Tũpa upe. Ichui omboyaho-yaho pan imondo güemimbohe upe, semimbohe evocoiyase omondo ava rehɨi upe yuvɨreco. Iyavei vɨreco movɨro pirami yuvɨreco, sese avei, “Avɨye ndeu” ehi iri Tũpa upe. Ichui güemimbohe upe, “Pemboyaho-yaho ava upe” ehi. Opacatu ité ava ocaru vahe ihɨ̃taro yuvɨreco. Ipare rumo semimbohe omboapɨpo iri rane sumbɨrer siete ɨruova yuvɨreco. Ava rehɨi ocaru vahe retacuer cuatro mil tuprɨ. Ipare Jesús, “Avɨye, peso tuprɨ” ehi ava upe. 10 Ipare voi eté yuvɨraso güemimbohe eta reseve carite pɨpe Dalmanuta ɨvɨ rese.
Fariseo eta oporandu poromondɨisa rese yuvɨreco
11 Ipare fariseo eta oyepota Jesús ñehe poepɨ-epɨ ãgua yuvɨreco. Jesús recoãha ãgua, oporandu ɨva pendar poromondɨisa rese ‘¿Tũpa sui eté pĩha ou?’ oya yuvɨreco chupe. 12 Sese Jesús ipɨ̃tuhe pucu, aipo ehi:
—¡Mahera vo co ava oipota ɨva pendar poromondɨisa che recocuer cua ãgua yuvɨreco! Namboyecuai chietera rumo que ñepei evocoi nungar mbahe pẽu —ehi.
13 Ipare oseyapaño ava. Ichui yuvɨroha iri carite pɨpe, osasapa ɨpa yuvɨraso sovai.
Fariseo porombohesa inungar pan mboapeposa
14 Jesús remimbohe sesarai pan sui yuvɨreco, ñepeimi tẽi pan vɨraso güemihura yuvɨreco. 15 Evocoiyase Jesús aipo ehi:
—Peicua catu fariseo iyavei Herodes pan mboapeposa sui —ehi güemimbohe upe.
16 Aipo ehise, semimbohe: “Pan ndayaruise revo aipo ehi yandeu” ehi-ehi tẽi oyeupe yuvɨreco.
17 Ahe rumo oicua güemimbohe pɨhañemoñetasa, aipo ehi:
—¿Mahera, “Pan ndayarui” peye? ¿Ndapeicua vɨtei vo che rembiapo? ¿Yavai vɨte tie seroya ãgua pẽu? 18 Oime tẽi pe resa, ndapesepiai rumo; oime tẽi pe nambi, ndapesendui rumo mbahe. ¿Ndapeyemomahenduha iri vo 19 acoi amboyaho-yahose cinco pan sui ava cinco mil vahe tohu? ¿Mbovɨ ɨruova vo acoi sumbɨrer pemonuha iri? —ehi.
—Doce ɨruova —ehi yuvɨreco chupe.
20 —Iyavei acoi amboyaho-yahose siete pan sui ava cuatro mil vahe tohu, ¿mbovɨ ɨruova vo acoi pemonuha sumbɨrer no? —ehi.
—Siete ɨruova —ehi yuvɨreco chupe.
21 Ipare aipo ehi:
—¿Ndapesenducua vɨtei vo? —ehi güemimbohe upe.
Jesús ombogüera ava ndasesapɨsoi vahe tecua Betsaida ve
22 Oyepotase Jesús tecua Betsaida ve, ahe ramoseve voi ogüeru ndasesapɨsoi vahe yuvɨreco chupe ‘epocomi tẽi sese’ oya yuvɨreco. 23 Evocoiyase oipopɨsɨ ndasesapɨsoi vahe seraso co cotɨmi tecua sui. Aheve omondo güendɨ sesa rese, omondo avei opo iharɨve. Ipare oporandu chupe: “¿Eresepia vo mbahe?” ehi. 24 Ndasesapɨsoi vahe omahese, aipo ehi:
—Asepia ava inungar ɨvɨra oguata vahe yuvɨreco —ehi.
25 Evocoiyase omondo iri opo sesa rese. Ipare co mbɨa omahe tuprɨ ité cute, ocuera ité, opacatu mbahe osepia tuprɨ. 26 Ichui Jesús omondo sẽtave aipo ehi chupe:
—Ereyevɨ iri eme tecuave —ehi.
Pedro oicua uca Jesús Tũpa Rembiporavo seco rese
27 Ipare yuvɨraso Jesús güemimbohe reseve ɨvɨ Galilea sui tecua Cesarea cotɨ, Filipo ɨvɨ rese. Perɨ rupi oporandu güemimbohe upe:
—¿Mara ehi vo ava oñehe yuvɨreco che rese? —ehi.
28 Semimbohe evocoiyase omboyevɨ yuvɨreco chupe:
—Amove ava, “Juan Oporoãpiramo vahe” ehi yuvɨreco ndeu; ambuae evocoiyase, “Elías” ehi; ambuae, “Tũpa ñehe mombehusar mboetasa” ehi yuvɨreco ndeu —ehi.
29 Evocoiyase oporandu iri güemimbohe upe:
—Pe no, ¿ava, “Co secoi” peye ru pe cheu no? —ehi.
Pedro evocoiyase aipo ehi chupe:
—Nde niha Tũpa Rembiporavo Poropɨ̃sɨrosar ereico —ehi.
30 Jesús rumo, “Pemombehui rene que ñepei ava upe” ehi.
Jesús omombehu omano ãgua
31 Evocoiyase Jesús omboɨpɨ oporombohe: “Che, Ava Rɨquehɨr, che paraɨsu itera, iyavei opacatu judío rerecuareta, pahi rerecuar ɨvate catu vahe iyavei Moisés porocuaita rese oporombohe vahe remiamotarẽhɨ aicora. Ahe avei che yuca ucara yuvɨreco. Acuerayevɨra rumo mbosapɨ arɨ rupi” ehi. 32 Ahe omboyecua tuprɨ ité chupe. Evocoiyase Pedro vɨraso co cotɨmi chupe oñehengata ãgua. 33 Oyemboyere rumo, omahe güemimbohe eta rese, oñehengata Pedro upe aipo ehi:
—¡Esɨrɨ che sui, Caruguar! Esepia, nde nandepɨhañemoñetai mbahe Tũpa upendar rese; ava nungar tẽi nde pɨhañemoñeta eico —ehi.
34 Evocoiyase Jesús, “Perio” ehi güemimbohe upe, iyavei ambuae ava upe aipo ehi:
—Acoi ava oguata pota vahe che rupi, topoi mbahe güemimbotar tẽi aposa sui, iyavei inungar-ra curusu rese ovosɨira viña, toyemoingatu voi che recocuer rese oparaɨsu ãgua iyavei toguata tuprɨ che rupi. 35 Esepia, acoi ava güetecuer tẽi raɨsupar, ocañɨ tẽi etera. Acoi ava omocañɨ tẽi vahe rumo güetecuer che recocuer rese, ñehesa ñepɨsɨrosa sui avei, ahe oñepɨsɨrora. 36 ¿Avɨye ai angahu pĩha ava upe opacatu mbahe ɨvɨ pɨpendar pɨsɨ ãgua tẽi, ahe ae tẽi omocañɨ güecocuer yuvɨreco viña? 37 ¿Mbovɨ pĩha omondora ava güecocuer repɨrã viña? 38 Esepia, acoi ava yuvɨnochi ai vahe che sui iyavei che ñehengagüer sui ava angaipa viyar ndaseco tuprɨi vahe rovai, che avei, Ava Rɨquehɨr, ẽgüe ahera acoi ayevɨse che Ru reco pĩrata porañetesa pɨpe, sembiguai rehɨi ɨva pendar maranehɨ reseve curi —ehi.