1 Yela̱n ji lami jini, ba̱k nda̱ki mas ma̱jwe wule shishi ga̱ Nya nisi ɗa̱ wu so, a ma cinga̱la̱n shishisi ta̱k yisi ɗe tet mal Nya ka̱n ni paa. Pa̱li na̱k gwisi na̱k ɗe ma̱jwe asa̱ shel lal ɗe si wo ma̱n dla̱mti ga̱ɓa ga̱ Nya ka̱ɗe si wu, ɓalɗa wonti ten dii atli wu. 2 Kangwe kaa yis Shishi ga̱ Nya wuggu, mas ma̱lgwe wuli ɗe Almasihu Yesu tul na̱*4:2 Sogoka̱ dli ga̱ mbala̱n wu, wunda̱l ga̱ ma̱l gwisi wo Shishi ga̱ Nya ni ka̱ ti. 3 Ama mas ma̱lgwe wule Yesu tul na̱ dli ga̱ mbala̱n sowu, wunda̱l ga̱ ma̱l go Shishi ga̱ Nya ni ka̱ ti so. Shishi nget hwula̱n ga̱ Yesu ka̱n, shishi gwe sa̱ hwikii ɗe aya tul wu. A na̱k ninge go ɓalɗa ten dii atli.

4 Mil ji lami, kii wo mbala̱n ji Nya ka̱n aka̱a̱ man ngetl ji ma̱ju wi, na̱k ɗe ma̱lgwe ni gipkii wu man ngetl ga̱ ma̱lgwe ni ka̱ mbala̱n ji dii atl gee wu. 5 Si wo mbala̱n ji dii atl ka̱n yek laki asa̱ yen wul na̱ gwel yenti wul ji ma̱n dii atli, a ma̱n dii atli katisi ka̱ng. 6 Mi wo mbala̱n ji Nya ka̱n, a ma̱jwe yisti wu katini ka̱ng, ama mas ma̱lgwe ba̱ gwas ka̱ sowu ba̱ta katini ka̱ng so. Na̱ nu ka̱n ma yisa̱n ma̱jwe Shishi gem ga̱ Nya ni ka̱si tet ka̱ ma̱jwe shishi ga̱ gilla̱t mbala̱n ni ka̱si wu.

7 Yela̱n ji lami jini, ma̱ lama̱n yilkeni jina̱n. Lamti wo sut mal Nya ka̱n ni. Mas ma̱jwe lam yilkeni jwasa̱n go sa̱ ɓal ɗe mil ji Nya, asa̱ yisti wi. 8 Mas ma̱jwe lam yilkeni jwasa̱n sogo sa̱ yis Nya so, na̱k ɗe Nya wo lamti ka̱ɗe ti wu. 9 Kangwe Nya mbok ang ten wunda̱l ga̱ lamti gwas ka̱ dlo ga̱na̱n wuggu. Ta̱ lak Yen ɗe na̱m gwe niɗɗa̱ wu sut ten dii atli, kangwe mbala̱n a mbi mbadl gwe ba̱ a paki so tumalti wu. 10 Kangwe lamti ga̱ gem ni wuggu. Ba̱ ɗe mik lama̱n Nya so, ama tik lama̱nni yek ta lak Yen gwas sut ten dii atl ɗe sadaka ga̱ taasti da̱ska̱n pa̱lti byas wul jina̱n ka. 11 Yela̱n jini, na̱k ɗe Nya lama̱n i'e nu wu, ngetli ka̱n ma̱ lama̱n yilkeni jina̱n. 12 Ma̱lgon ɓo taɓa yenti ga̱ Nya so ama kume ma̱ lama̱n yilkeni jina̱n go, ta̱ ni ka̱ mbadl ga̱na̱n a lamti gwas njika̱n ka̱ mi wi.

13 Na̱ nu ka̱n ma̱ yisi ɗe ma̱ nima da̱mti suk Nya ata̱ ni ten mbadl jina̱n, na̱k ɗe ta̱ ba̱la̱nnii Shishi gwasi ta̱s da̱m sukmi wu. 14 A ma̱ yeni wi yek ma̱ dla̱mi mbala̱n ga̱ɓa dani ɗe, Nya Aba lak Yen gwasi ta̱s da̱m ɗe ma̱n kisti ga̱ mbala̱n ji dii atli. 15 Mas ma̱lgwe kan Yesu ɗe Yen ga̱ Nya go, Nya ni ka̱ mbadl ga̱ ma̱li a ma̱li nima da̱mti sukti pak. 16 Nuk laki yek ma̱ yisi ɗe Nya lama̱nni yek ma̱ nga̱sa̱n ten lamti gwisisi.

Nya wo lamti ka̱n. Mas ma̱lgwe nima da̱mti na̱ lamti ga̱ yilkeni jwas go ma̱li nima da̱mti suk Nya, a Nya ni ka̱ mbadl ga̱ ma̱li. 17 Kume lamti njika̱n ka̱ dlo ga̱na̱n wugo, ma mbi nda̱li gahwula̱n ten cin gwe Nya a kisi ga̱ɓa mbala̱n mas wu, na̱k ɗe ma̱ na̱mma da̱mti ten dii atli na̱k kangwe Yesu da̱m wu. 18 Wuda̱l ga̱ lamti ga̱mi wo ɓanti ni giɓi so. Lamti ga̱ gem wo a mbol ɓanti ka, na̱k ɗe mbala̱n ma̱n ɓanti wo nolti ga̱ Nya ka̱n ata̱ ɓantit wu. Nuk laki a ba̱ ma̱n ɓanti a njika̱n dli na̱ lamti ga̱ gem so. 19 Ama ma̱ na̱mma lamti ga̱ yilkeni jina̱n na̱k ɗe Nya ka̱ lak zhila lamti ga̱ mbala̱n wu. 20 Kume ma̱lgon wule, <<A lam Nya,>> ama yek ta̱ na̱ma nget hwulan ga̱ yilka gwas go, ma̱n shelti lal ka̱ɗe ma̱li. Ma̱lgwe nge hwulan ga̱ yilka gwas ɗe ta̱ na̱ma yenti gwas wu, a man lamti Nya ɗe ta̱ ɓo yenti so gwa? 21 Ilgwe Nya hwini go yek ɗe, mas ma̱lgwe lamti go ngetli ka̱n ta̱s lam yilkeni jwas pak.