Pa̱lti wul
Ndat zhila ga̱ɓa
Luka ka̱ lish ga̱ɓa ge, ta̱ lishi ɗe kopti kaal ga̱ ga̱ɓa ma̱n ta̱mti gwe ta̱ lishi cina ɗa̱ ga̱misi wu. Ba̱n gwe ta̱ lish ga̱ɓe giɓi ma̱lgon yisi so. Ta̱ lishi Tiyopolos ma̱n nalti, ma̱lgwe ta̱ lishit ta̱mi ga̱ɓa ten Yesu wu. Mbala̱n ɓa yeni go kaal ɗa̱ gin ɗe 63 kaal ɗa̱ ma̱shka̱n ga̱ Yesu ka̱n ta̱ lish ga̱ɓe, a naa mbala̱n wo sa̱ ɓa yeni go gin ɗe 70 kaal ɗa̱ ma̱shka̱n ga̱ Yesu ka̱n ta̱ pa̱l lishtisi.
Luka lak zhila lishti ga̱ɓa ten palti ga̱ Yesu to nya ka, na̱k kangwe lishti ta̱mi ga̱ɓa gwas ten Yesu paki na̱ dla̱mti ga̱ɓa dani wu. Yek dla̱m ga̱ɓa ten kangwe ma̱n kopti ji botli suk naa ma̱n kopti ɓa̱t njika̱nti ga̱ dla̱lla̱t ga̱ɓa gwe Yesu pa̱lisi wu a Wurshelima. Multi ɗe cutl Kaal ɗa̱ palti ga̱ Yesu to Nya ka. Ten cin motgaa daamti ɗakciti gwe asa̱ mbe ɗe Pentekos wu, yek Shishi ga̱ Nya susut tensi yek ta̱ ba̱lsi nda̱lti manti pa̱lti wul. Kaal ɗa̱ pa̱t na̱k gwisi yek ma̱n kopti ngusi mba̱ltidli ba̱le-ba̱le kan tet Wurshelima yek mbuki Samariya hal yek ngash dii atli (lu pulti 1:8).
Ka̱ ka̱ti gwe sa̱ nda lak zhila lishtisi ɗa̱ go, sa̱ ba̱l nda̱lti ga̱ɓa ten Biturus suk motgaa ma̱n kopti ji Wurshelima. A kan ten lu pulti 9 ta̱ ta̱le tu cina wo, sa̱ lish ga̱ɓa ten ma̱tlti dla̱mti ta̱mi ga̱ɓa ten Yesu ga̱ Bulus yen shinti ga̱ botli ka̱ atl ga̱ Roma suk la̱t gwas ka̱ lu kisti ga̱ɓa mal bal guu ga̱ atl ga̱ Roma.
Pa̱lti Wul ga̱ Ma̱n Kopti ji Botli wo dla̱mti ga̱ɓa ten lakti zhila da̱mti ga̱ motgaa ma̱n kopti suk wul jwe ngusi pa̱ti ɗe a lak motgaami ten wonta̱t ɗu ka̱n. Lishtisi ga̱ɓa ten cutgaa suk ten kangwe sa̱ cisi dlelngapcan wu. Yek dla̱m ga̱ɓa ten kangwe ga̱ɓa ngusi lakti ang suk ten nda̱lti pa̱lti wul ga̱ Shishi ga̱ Nya ka̱ da̱mti ga̱ motgaa ma̱n kopti yek ga̱ɓa ten da̱mti ga̱ ma̱ntisi gaa-gaa pak.
1
Shishi gwe Nya wule ta shinti sut ɗu
1 Ma̱n nalti Tiyopolos, ka̱ lishti gwe a lishiki ga̱ cina go a hwik mas wul jwe Yesu pa̱li wu, suk ga̱ɓa jwe ta̱ mboki mbala̱n ang dani wu, 2 hal se gas gwe Nya kanti to nya ka̱wu. Ɗe ba̱ Nya ɓo kanti to nya ka̱ sogo, yek Yesu lak Shishi ga̱ Nya ta̱s hwi ga̱ɓa mil shinti jwasi jwe ta̱ botlsi wu. 3 Ta̱ ngusi tulti malsi kaal ɗa̱ ma̱shka̱n gwasi, ata̱ nisi ma mbokti ang ten gaa gwasi ta̱s yisi ɗe ta̱ tli ɗa̱ka̱ ma̱shka̱n ka wi. Multi gwas ɗe kutl ɗe wupsi ata̱ ni suksi, ata̱ nisi ma ga̱ɓa ten Nya ɗe guu wu. 4 Gas gon, a Yesu na̱ma ngukti*1:4 Yesu na̱ma ngukti Ka̱ lishti jon wo sa̱ lishi ɗe Yesu yi suksi wul suksi yek ta̱ wulsi ɗe, <<Da̱ma̱n a Wurshelima ta̱k ɓa̱ta̱n ilgwe Nya dla̱lli ga̱ɓa ɗe ta ba̱lkii wu gwe ta̱ dla̱mikii na̱ bi gwas wu. 5 Yohana wo na̱†1:5 SogoKa̱ ze ka̱n ta̱ pa̱li mbala̱n baptisma, ama njet ɗe Nya pa̱likii baptisma na̱ Shishi gwasi.>>
Nya kan Yesu to Nya ka
6 Sa̱ mogaa wugo yek mil shinti ji botli ngemti ɗe, <<Bagaa, ninge ka̱n ka laki a ma̱n Yisiraila mbi guu ga̱ gaa gwasa̱n ɗa?>>
7 Yek Yesu wulsi ɗe, <<Yisti gas gwe wul a pi go gwaka̱n ka̱ so, Nya bal kakshe na̱ ngus ka̱ yis cin jwe a wul pi wu.>> 8 Ama Nya a ba̱lkii nda̱lti na̱k ɗe ta shin Shishi gwas sut tenkii wu, apaa ka̱a̱ da̱m ɗe ma̱n dla̱mti ga̱ɓa gi mbala̱n ten wul jwe ka̱ yeni tena̱n wu a Wurshelima suk ka̱ atl ga̱ Yehudiya suk ga̱ Samariya mas, hal a ka̱ ngash dii atli mas.
9 Ta̱ dla̱m nu wugo yek Nya kanti to nya ka, yek kaluntu yitlat ka yek ba̱sa̱ po yenti dani so.
10 A sa̱ yima wutti gwel to Nya ka̱ nugo, yek gal mbala̱n ɗe lop jon ma̱n hwol luka̱l sak dla̱l malsi. 11 Yek mbala̱mi wul si ɗe, <<Ma̱n Galili, yek laki ɗe ka̱ na̱ma yenti lu to nya ka na̱n ye? Yesu ga̱n ɗe ta̱ zakki yek ta̱ to nya go, ta ya pal suɗi na̱k gwe ta̱ zigaa wu.>>
Sa̱ botl Matiyes ka̱ lal ga̱ Yehuda
12 Yek sa̱ pal tet Wurshelima, tet ɗa̱ ten tla̱da̱l gwe asa̱ mbe ɗe Tla̱da̱l Tlindi Zetun wu, gwe dlenta̱t gwas tet Wurshelima wo pa̱l tatlti dlo mil ɗe na̱m‡1:12 Yek ɗe 0.75 mil ɗe na̱m (na̱k mita ɗe 1,100) wu. 13 Sa̱ mbuki ka̱ ba̱n Wurshelima wu, yek sa̱ te ka̱ tlalbii gon ka̱ lu gwe asa̱ kul da̱m wu. Ma̱jwe ni ɗa ka̱li go sik ɗe, Biturus suk Yohana suk Yakubu suk Andarawus, Pilip suk Toma suk Bartilomi, suk Matiyu suk Yakubu yen ga̱ Halpa suk Siman ma̱lgwe asa̱ mbet ɗe ma̱n lamti mbala̱n ga̱ atl gwas wu, suk Yehuda yen ga̱ Yakubu. 14 Sa̱ mogaa mas jwasa̱n yek sa̱ ngusi ngemti Nya na̱ mbadl ɗe na̱m, suk modli jon suk Maryam ana ga̱ Yesu suk yilkeni ji Yesu.
15 Yilkeni ma̱n kopti jwe ni ka̱li ka̱ multi jwisi go, wonta̱t jwasa̱n la zamba̱l ɗe na̱m na̱ kutl ɗe lop. Yek Biturus tlinya ka̱ dlo gwasa̱n 16 yek ta̱ wuli ɗe, <<Yilkeni jini, ga̱ɓa ga̱ Nya gwe Shishi ga̱ Nya dla̱m tumal Dauda guu gwe ta̱ dla̱m ten Yehuda ma̱lgwe tulli ma̱n dopti ga̱ Yesu wu ka̱ da̱m wi ɗe gem. 17 Ti Yehude wo gon ga̱na̱n ka̱n ata̱ nima pa̱lti wul Nya sukmi.>> 18 Yehudasi wul lu na̱ wulpi gwe ta̱ mbi ten pa̱lti byas wul gwas wu. Ka lusi ka̱n ta̱ lak nda na̱ gaa, yek tuk gwas mbutl ka, yek ɓot gwas yil deɓa̱l. 19 Mas ma̱n Wurshelima kumi na̱k gwisi, yek sa̱ mbe lusi na̱ bi gwasa̱n ɗe, <<Akeldama,>> yek ɗe <<Lu hwulan.>>
20 Yek Biturus wuli ɗe, <<Ni ga̱ lishi ka̱ Zabura ɗe,
<< <Ha̱n ta̱ lu da̱mti gwas da̱m ɗe koo boo
Ba̱ ma̱lgon te giɓi so,>§1:20 Yen Zab 69:25.
a, <Hwe ta̱ ma̱lgon da̱m ka̱ gobdlan bacina gwasi.>
21 <<Yek laki ɗe ngetli ka̱n ta̱n botla̱n mbala̱n ɗe na̱m ka̱ ma̱jwe ni sukmi, ka̱ mas pa̱lti wul gwe Bagaa Yesu pa̱li ka̱ dlo ga̱na̱n wu. 22 Ma̱lgwe ma botla̱nti go ngetli ka̱n ta̱s ni ɗe ma̱lgwe ni sukmi ndati tet ten ga̱ɓa ga̱ Yohana ten bi baptisma, hal se gasi gwe Nya kan Yesu to nya ka̱wu. Ma̱lgwisi ka hwi ga̱ɓa mbala̱n ten kangwe ma̱ yen Yesu tli ɗa̱ka̱ ma̱shka̱n ka wu sukmi.>>
23 Yek sa̱ ba̱l shin ga̱ mbala̱n ɗe lop, ka̱ Yusupu gwe asa̱ mbet ɗe Barsabas wu, ti ka̱n asa̱ po mbet ɗe Justus pak, suk Matiyes. 24 Yek sa̱ ngem Nya ɗe, <<Bagaa, ki ɗe ka̱ yis mbadl ga̱ mbala̱n mas wu, mboki ni ang ten ma̱lgwe ka̱ botli wu ka̱ ma̱jin, 25 ma̱lgwe a da̱m ɗe yen shinti ga̱ botli gwa ka̱lal ga̱ Yehuda ma̱lgwe zak ni yek ta̱ li ka̱ lu gwe ndalti mani wu.>> 26 Yek sa̱ pa̱l botlti yek nda ten Matiyes, yek ta̱ mba̱ldli ten mil shinti ji botli ɗe kutl cet na̱m ju.