1 Asa̱ ni na̱k gwisi tun aba̱ sa'i Biki Ɗakcitisi ɓo pi so. Yesu wo ta̱ yisi ɗe sa'i zakti dii atl gwas ta̱s pal to mal Aba ka pa̱li wi. Na̱k ɗe ta̱ lam mbala̱n jwas ɗe sa̱ ni ten dii atl wu, yek ta̱ mbokisi ang ten kangwe ta̱ lamsi wu.*13:1 Sogota lamsi hal yek la pakti

2 Ka̱ sa'i gwe Yesu suk mil lishti jwas nima ngukti ilga̱ nguki ga̱ ka̱ gas wu, a sheɗan te ka̱ mbadl ga̱ Yehuda Iskariyoti yen ga̱ Siman wi ɗe ta̱s ba̱l bi ga̱ Yesu. 3 A Yesu yisi ɗe Aba lak mas wul ka̱ ang gwasi, ta̱ yisi ɗe sut mal Nya ka̱n ta̱ yil suɗi a malti ka̱n ta pal to ka. 4 Yek Yesu tlinya yek ta̱ ndus luka̱l gwas ga̱ tu kaali ka, yek ta̱ kan tawul yek ta̱ hap te dlo ka. 5 Kaal ɗa̱ na̱k gwisi yek ta̱ shot ze ka̱ gali, yek ta̱ njeli polti asa̱n mil lishti jwasi, ata̱ na̱ma taasti ka na̱ tawul gwe ta̱ hap te dlo ka̱ wu.

6 Yek Yesu li mal Siman Biturus. Yek Biturus wulti ɗe, <<Bagaa, kik ka poli asa̱n ma?>>

7 Yek Yesu ballit ɗe, <<Na̱k ningo ka̱ yis ilgwe a na̱ma pa̱lti wu so, ama ka̱ kaali wo kaa yis gaami.>>

8 Yek Biturus wulti ɗe, <<Wowo, ami wo ka poli asa̱n so.>>

Yek Yesu ballit ɗe, <<To, ɗe kume a polik ka̱ sogo ki wo ilgon a mo sukki so.>>

9 Yek Biturus wulti ɗe, <<Bagaa ɗe nuk wu, asa̱n gi ka̱n ka poli ka tokte so ama poli suk ang suk gaa gi pak!>>

10 Yek Yesu ballit ɗe, <<Ma̱lgwe wutit ze wugo asa̱n gwas ka̱n ata̱ poli ka, dli gwas mbun wi. A yek ge kii wo sabta nikii ɗa, ama ba̱ ɗe mas jwaka̱n ka̱ so.>> 11 Ten ɗe Yesu yis ma̱lgwe a ba̱l bi gwas wu, yek laki yek ta̱ dla̱m ɗe ba̱ ɗe mas jwaka̱n ka̱n sabta nikii ɗa̱ sowu.

12 Ɗe ta̱ polisi asa̱n wugo, yek ta̱ kin luka̱l gwas lwisi, yek ta̱ pal ka̱ lu da̱mti gwasi yek da̱m atli. Yek ta̱ ngemsi ɗe, <<Ka̱a̱ yis gaa ga̱ ilgwe a pa̱likii gwa?>> 13 <<A ka̱a̱ mbe ɗe Ma̱n <Lishti> suk <Bagaa.> A gem ka̱n, ten ɗe na̱k gwisi ka̱n ni. 14 Tun na̱k ɗe ami ɗe Bagaa suk Ma̱n lishti gwaka̱n ama yek a polikii asa̱n wu, kii mago mbun ɗe ta̱k poli asa̱n yilkeni jwaka̱n. 15 A zikii lal wi, ten ɗe kii mago ta̱k pa̱li na̱k kangwe a pa̱likii wu. 16 Gem amik ka hwikii ge, zhel nal man baboo gwas so, a ba̱ yen shinti nal man ma̱n shinti gwas so. 17 Ninge ɗe ka̱a̱ yis wul jimi wu, kaa da̱m ɗe ma̱n albarka ɗe kume ka̱a̱ pa̱li wu.

18 <<Ba̱ ɗe ten mas jwaka̱n ka̱n a na̱ma ga̱ɓa so. Ten ɗe a yis ma̱jwe a botli wu. Gwisi wo ten ɗe ta̱ njika̱n ilgwe sa̱ lishi ka̱ ga̱ɓa ga̱ Nya ka̱n, ɗe, <Ma̱lgwe na̱ma ngukti wul gi wu tli gaa.>†13:18 YenZab 41:9

19 <<A nikii ma hwiti ga̱mi ka̱n tun ninge aba̱ ɓo pi so, ten ɗe kume ɗe sa'i pi wugo aka̱a̱ ba̱l gem ɗe Amik ɗe ti. 20 Gem amik ka hwikii ge, mas ma̱lgwe kan ma̱lgwe a shinti wu go ami ka̱n ta̱ kama̱nni, a ma̱lgwe kama̱n go, ma̱lgwe shina̱n wu ka̱n ma̱li kanti.>>

21 Ɗe Yesu dla̱m ga̱ɓa ga̱mi wugo yek ili hwotti ka̱ mbadl i'e. Yek ta̱ dla̱m ten dii ɗe, <<Gem amik ka hwikii ge, gon gwaka̱n a ba̱l bi gini.>>

22 Yek mil lishtisi ngusi yenti ga̱ yilkeni jwasa̱n ka shu gwel, ten ɗe sa̱ yis yen lishti gwe ta̱ na̱ma ga̱ɓa tenti so. 23 A gon ka̱ mil lishtisi, yen lishti gwe Yesu lamti i'e ni na̱ zhila njaa malti. 24 Yek Siman Biturus hwit ga̱ɓa ga̱ pa̱li na̱ ang ɗe, <<Ngemti, wok ta̱ na̱ma ga̱ɓa tenti wo.>>

25 Yek yen lishti gwisi ɗam te ka yek ta̱ nga̱sti ten ngetl ga̱ Yesu, yek ta̱ ngemti ɗe, <<Bagaa, wok ɗe ti wo?>>

26 Yek Yesu ballit ɗe, <<Ba njop nak burodi ka̱ gali, a ma̱lgwe a ba̱lti go tik ɗe ma̱li.>> Ɗe Yesu kan nak burodisi yek njop ka̱ gali wugo yek ta̱ ba̱l Yehuda Iskariyoti yen ga̱ Siman. 27 Yehuda na̱ma kanti burodisi, yek Sheɗan te ka̱ti.

Yek Yesu wulti ɗe, <<Ilgwisi ɗe ka pa̱li wu, se ta̱k pa̱li ba̱le-ba̱le.>> 28 Ama yek ba̱ ma̱lgon yis ilgwe laki yek Yesu dla̱mit ga̱ɓa gwisi ka̱ ma̱jwe sa̱ na̱ma ngukti wuli wu so. 29 Na̱k ɗe Yehudasi ka̱ ɗe ma̱n ngipti wulpi gwasa̱n wu, yek jon ka̱ mil lishtisi da̱m gwa gwe Yesu nit ma hwiti ɗe ta̱s wul ilgwe sa̱ lami ɗe ga̱ biki wu ka̱n, sogo ɗe ta̱s ba̱l ilgon ma̱n la̱shi wul. 30 Ta̱ na̱ma kanti nak burodisi yek ta yili. Ka̱ sa'i gwisi wo a gas ka̱ ɓali.

31 Ɗe Yehuda zigaa wugo yek Yesu dla̱m ɗe, <<Ninge ka̱n sa̱ nalli Yen ga̱ Mbala̱n, yek sa̱ nalli Nya tumalti pak. 32 Ɗe kume Nya mbi nalti tumalti wugo,‡13:32 ka̱ lishti jon ji cina wonti wo sa̱ lishi Ɗe kume Nya mbi nalti tumalti goso to, apaa Nya gaa gwas ba̱l Yeni nalti a Yeni mbi nalti ba̱le-ba̱le.

33 <<Mil jini, da̱mti gi sukkii wo ga̱ nak njet sa'i ka̱ ɓali. Na̱k gwe a hwi ma̱n Yehuda ɗe, lu gwe ba li go kaa man la̱t sowu, na̱k gwisi ka̱n a nikii ma dla̱mti ninge ɗe, kaa ngo lu gwe ani wu.

34 <<Pyal mba̱t ga̱ɓa ka̱n a nikii ma ba̱lti ɗe lama̱n yilkeni jwaka̱n. Na̱k kangwe a lamkii wu, na̱k gwisi ka̱n kii mago lama̱n yilkeni jwaka̱n. 35 Tu ten na̱k gwisi ka̱n mas mbala̱n a yisi ɗe, kii wo mil lishti ji ka̱n, ɗe kume ka̱a̱ lam yilkeni jwaka̱n wu.>>

36 Yek Siman Biturus ngemti ɗe, <<Bagaa a ako ka̱n ka li ko?>>

Yek Yesu ballit ɗe, <<Lu gwe ba li go ka man kop gi na̱k ninge so, ama ka̱ kaali wo ka koɓa̱nni.>>

37 Yek Biturus ngemti ɗe, <<Bagaa, Yek laki ɗe ba man kopti gwa ninge so ye? Ai, ba ba̱la̱n mbadl gini ten bi gwa.>>

38 Yek Yesu ballit ɗe, <<Ase ka ba̱la̱n mbadl gwa ten bi gi nwa? Gem amik ka hwik ge, ka nge yisti gini asa̱mi ɗe mekan aba̱ gunda kol ɓo lak yal so!