5
Xuweni nuiwarimama
1 Xuweni nuiwarimama, 'Ixaheri matɨarieya. Xuweni 'Ixaheri pumatɨarieyatɨkai, peru xapatsie mɨpaɨ pɨkatiu'utsie kememɨte'ununuiwaxɨ memaka'utɨarietsie yu'ukiyari ti'uximayatsiriwame 'ɨyayatɨtɨ matɨa hamatɨa mukahuikɨ. Matɨari miemetɨtɨ heitserie kemɨrexeiyakai Kutse niwemama wahetsie pɨta pɨtiunakixɨ 'Ixaheri nu'aya.
2 Kaniyuritɨni Kura matsi waɨkawa mariwetɨ kanayani kememɨka'anekai 'iwamama, metsɨ mɨtiwa'aitɨa kanayani, peru matɨari miemetɨtɨ heitserie kemɨrexeiyani Kutse hetsie pɨta pɨtiunakixɨ. 3 Xuweni niwemama 'Ixaheri matɨarieya, mekanakɨne: Kanuki, Paru, Ketsiruni meta Karimi.
4 Kuheri nuiwarimama kememɨte'ununuiwaxɨ mekanihɨkɨtɨni: Tsemahiyaxi, Kuki, Tsimi, 5 Mikahiyaxi, Xehahiyaxi, Wahari 6 meta Wehera, mɨkɨ xuwenitsixi wa'ukiyari matɨa. 'Ikɨ 'imatɨrieka mieme kaneihana Tikɨrati-Piretsexi, ti'aitame 'Atsiriya kiekame.
7 'Ikɨ mekanakɨne Wehera maremama, kemɨre'uxa kememɨte'ununuiwaxɨ xapayaritsie: Keyeri manuyekatei matɨa, Tsakariyaxi 8 meta Wera 'Atsatsi nu'aya, Tsema nu'aya, Kuheri nu'aya. Wehera 'Aruhexi kiekame kanayani, kwieya 'akaniyeukaitɨni Newu paitɨ meta Wahari-Mekuni. 9 Tau manatineika hepatsie makumawe maye'atɨka paitɨ pɨye'atɨkatei kwieya 'Eupɨrate haa manuyekatsie, tewamama waɨkawa memuyutimɨirixɨkɨ Karaha kwieyaritsie. 10 Tsahuri ti'aitametɨkaku, xuwenitsixi 'akarenutsixi memɨwatakwinikɨ yamekateniuxata, hikɨ 'ana mekaniwara'iwa, 'ana mana mekanikuyaxe Karaha kwieyaritsie tau manatineika hepatsie.
Kahari nuiwarimama
11 'Ikɨ mekanihɨkɨtɨni Kahari nuiwarimama xuwenitsixi wa'aurie mekanitiyaxe Watsani kwieyaritsie meta Tsarikaha kwieyaritsie: 12 Kuheri Watsani kiekariyaritsie wa'ukiyari kanayani, hutarieka mieme Tsapani kanayani, manata Kanahi meta Tsapati. 13 Wa'iwamarixi, wa'ukiyarima waniwema, yunaitɨ me'atahutatɨ mekanakɨne: Mikaheri, Metsurani, Tsawa, Kurahi, Kakani, Tsiha meta 'Ewexi.
14 'Ikɨ mekanihɨkɨtɨni 'Awikahiri niwemama, mɨkɨta Kuri punu'ayatɨkai, mɨkɨta Karuha punu'ayatɨkai, mɨkɨta Karaha punu'ayatɨkai, mɨkɨta Mikaheri punu'ayatɨkai, mɨkɨta Ketsitsahi punu'ayatɨkai, mɨkɨta Yaru punu'ayatɨkai, mɨkɨta Wutsi punu'ayatɨkai. 15 Mɨkɨ 'iwamarixi muwanɨ'a 'Ahi pɨhɨkɨtɨkai, 'Awirieri nu'aya meta Kuni teukarieya. 16 Mɨkɨ Karaha mekanikuyaxe, Watsani kiekariyaritsie meta kiekari 'etsimɨyeyeu 'auriena mamanetɨkatsie, meta naime Tsaruni kwieyaritetsie mu'ɨxayatsie, kemɨyeukai naime. 17 Kememɨte'ununuiwaxɨ mɨkɨ mepaka'utsie kepauka Kutani mɨti'aitametɨkai Kura kwieyaritsie, meta Keruwuhani 'Ixaheri kwieyaritsie ti'aitame.
18 Xuweni, Kahari wanuiwarima meta Manatsexi nuiwarimama hixɨapa memɨ'axe wakuyaxima mekaniyupaɨmekaitɨni huta tewiyari heimana nauka miriyari heimana 'atahuta tsienituyari heimana haika tewiyari (44.760) teɨteri memɨyɨwawe, tepɨa yuhetsie nunuwame memu'ɨ meta 'ixipara, meyɨwawetɨ tupikɨ, kwinie meteheuyutakwiwawetɨ. 19 Mekaniwarutakwini 'akarenutsixi meta Ketuxi, Napitsi metatsiere Nurawi. 20 Kakaɨyari hetsie memɨtewiyakaikɨ, mekanitawawirieni mɨwaparewienikɨ meyukwitɨwetɨ, hikɨ Kakaɨyari kaniwaruparewieni memɨwara'iwakɨ 'akarenutsixi meta memɨwanɨkai. 21 Watewama mekateniyukapinitɨani huta tewiyari heimana tamamata miriyari (50.000) kameyutsixi, huta tsienituyari heimana huta tewiyari heimana tamamata miriyari (250.000) muxatsi, huta miriyari puxuri, meta teɨteri mekaniwarutiwiya xeitsienituyari miriyari (100.000) meyupaɨmeme, 22 mɨkɨ hipame yumɨireme mekaniwarukwini, Kakaɨyari wahamatɨa muyeikakaikɨ. Hikɨ mana mekanikuyaxe kepaukake memehapanie.
Hixɨata memɨ'axe Manatsexi nuiwarimama
23 Manatsexi nuiwarimama hixɨata memɨ'axe waniwema yumɨiretɨ mepakɨ meta manatsiere mekanikuyaxe, Watsani mɨrakutewatsie Wahari-Heximuni paitɨ me'u'atɨ, Tsenixi mɨrakutewatsie meta Heximuni yemuriyaritsie paitɨ. 24 Memɨwanɨ'akai mekanakɨne yutɨɨriyama wahetsiemieme 'Epexi, 'Itsi, 'Eriheri, 'Atsirieri, Keremiyaxi, Hurawiyaxi meta Yariheri. Mɨkɨ yunaitɨ kwinimieme memɨteheuyutakwiwawe mekanihɨkɨtɨkaitɨni, teɨteri memɨmariwa, yuxexuitɨ yutɨɨriyama mewanɨ'atɨ mepakɨ. 25 Peru 'axamekateniuyurieni yu'ukiyarima wakakaɨyari hɨxie, hipame kakaɨyarixi mewarayexeiyatɨ memakɨkɨ, Kakaɨyari teɨteri mɨwaruka'unakai wakakaɨyarixi. 26 'Ayumieme 'Ixaheri Kakaɨyarieya Puri pupitɨa, tatsɨari, Tikɨrati-Piretsexi, 'Atsiriyatsie ti'aitame, mɨkɨ kaniwarehapani Xuweni nuiwarimama, Kahari nuiwarimama meta Manatsexi nuiwarimama hixɨata memɨ'axe, kaniwarehapani Karaki paitɨ meta Kawuxi, Hara, meta Kutsani hatuxameyari 'aurie, hikɨ 'akuxi mana mekanekuteni.