1 Hikɨ Rawiri waruta'iwawiyaka kuyaxi xeimiriyari meta kuyaxi xeitsienituyari memɨtewa'aitɨatɨka meta yunaitɨ memanuyetei, 2 mɨpaɨ katiniwarutahɨawe 'ixaheritsixi yunaime memɨyuxeɨriekai: «Xɨka 'aixɨa'aneni, xɨka Yawé takakaɨyari mɨpaɨ tinakeni, tepɨwata'inieni yunaime 'Ixaheri kwieyaritsie memɨtama, meta mawari wewiwamete metatsiere rewitsixi xexuime kiekaritetsie memeutitei, meketatsi'utinɨni 3 Kakaɨyari tɨratuya kakuniyari temɨkweiyukɨ temi'atɨanikɨ. Yurikɨ Tsahuri mɨti'aitakaitsiepaitɨtɨ tepɨkahe'eriwa».

4 Kemɨtiwarutahɨawixɨ yunaitɨ teɨteri pɨwarunakixɨ, hikɨ yunaitɨ yamekaniutiyuani mɨpaɨ mɨtiyɨnikɨ.

5 Hikɨ Rawiri yunaime kaniwarukuxeɨrieni 'ixaheritsixi, Tsikuxi 'Ekipitu kwieyari maka'atɨkatsie paitɨ meye'atɨkaime meta Rewu-Kamati paitɨ meye'atɨkaime, Kakaɨyari tɨratuya kakuniyari memɨkweiyukɨ Kiriati-Yeharini paitɨ mekatei. 6 Hikɨ Rawiri meta yunaitɨ 'ixaheritsixi mekanekɨne Wará paitɨ, Kiriati-Yeharini tɨtɨ Kura kwieyaritsie, mana memiyekwenikɨ Kakaɨyari tɨratuya kakuniyari, mɨkɨtsie Yawé mutahɨawarɨwa yuteɨtamete watsata mɨti'aita. 7 Tɨratu kakuniyari kaxeta hekwametsie mekanikateni, 'Awinarawi kie mekaneyekweni. 'Utsa meta 'Akihu kaxeta mekaniunɨ'aximekaitɨni. 8 Rawiri meta yunaitɨ 'ixaheritsixi Kakaɨyari hɨxie mekaniuhukaitɨni waɨkawa meyutemamawietɨ meta me'utikwitɨ, mete'ukayuitɨwatɨ, me'ukanariwiximetɨ, me'ukaitsawiximetɨ, meta kuxineta me'uhɨtsiximetɨ.

9 Kiruni kwieyatsie me'uyehutɨ, tɨriku matihenatsie, tuurutsixi kwietsanamete mekanekaxɨrieni, hikɨ 'Utsa yumamatekɨ tɨratu kakuniyari kaniutuika 'anatiwenikɨ. 10 Yawé kaniuyeha'ani 'Utsa hetsiemieme tɨratu kakuniyari mumayɨakɨ, 'ana kwitɨwa kanimieni.

11 'Ana Rawiri kaniuyeha'ani Yawé 'Utsa mumikɨ. 'Ayumieme mana Peretsi-'Utsa katiniuterɨwa, hikɨ 'akuxi mɨpaɨ pɨrakutewa. 12 'Ana Rawiri Kakaɨyari heumakatɨ mɨpaɨ kaniutayɨni: «Nepɨkahenukweniri Kakaɨyari tɨratuya kakuniyari». 13 'Ayumieme Rawiri yukiekaritsie pɨkaheitɨ, matsi mɨpaɨ katiniu'aita 'Uweri-'Erumi kie manukweiyanikɨ, Kahati kiekame hetsɨa. 14 Mɨpaɨ tiuyɨku Kakaɨyari tɨratuya kakuniyari 'Uweri-'Erumi kie kaniyuhayewa haika metseri, hikɨ 'ana Yawé 'Uweri-'Erumi tɨɨriyamama 'aixɨa kaniwayuriekaitɨni meta tita mɨrexeiyakai.