1 Merikɨtsɨ mɨixa tukari 'anukayaku, hairieka wiyaritsie Yawé 'Eriyaxi mɨpaɨ katiniutahɨawe: «Kenemie 'Akawi hetsɨa, 'ari wiyeri nekananunɨ'amɨkɨ kwiepa». 2 Hikɨ 'Eriyaxi kanayeyani 'Akawi hetsɨa heyaka.

Mana Tsamariya kiekariyaritsie waɨkawa kanihaakaxatɨkaitɨni. 3 Mɨkɨ tukaritsie, 'Akawi xeime yuparewiwame mexeiyakai 'Awiriyaxi titewakame, kɨmana katiniutanɨ'ani, mɨkɨ paratsiyuyata pɨti'aitakai, metatsiere Yawé hetsiemieme yapɨtikamiekai mɨkɨ. 4 Ketsaweri Yawé niukametemama muwakwikaikɨ, 'Awiriyaxi xeitsienituyari pɨwaruti'awietakai huta terɨyarita, huta tewiyari heimana tamamata xeime terɨta, yaxeikɨa meyupaɨmemeta xeimeta, mɨkɨ pɨtiwamikwakai pɨwaharitɨakai meta. 5 'Akawi mɨpaɨ katinitahɨawe 'Awiriyaxi: «Naitsarie 'ikɨ kwieyaritsie kenekunieri haixa pekuwaunetɨ meta 'aki haa 'uhapaneme. Heiwatɨ muwa xaɨtsie 'ɨxa tehekaxeiya kawayutsixi muratsixi memayeyuyurinikɨ, mɨpaɨ memɨkakwinikɨ tatewama». 6 Hikɨ kwie hixɨata mekaniyu'inɨatsirieni mɨkɨtsie yuxexuitɨ memukunierekɨ. 'Akawi xeitapari kaneyani, 'Awiriyaxi meta xeitapari.

7 Hikɨ 'Awiriyaxi huyeta 'umietɨ 'Eriyaxi kananukunake. 'Awiriyaxi heitimaika, 'anakatutsireka kwiepa, mɨpaɨ katinita'iwawiya:

—'Eriyaxi neti'aitɨwame, ¿yurikɨ 'ekɨ petiyɨane?

8 'Eriyaxi mɨpaɨ katinita'eiya:

—Huu, ne nepɨhɨkɨ. Kenemie 'akutsiyari ketinetaxatɨa, kename 'ena ne'uyeika.

9 'Awiriyaxi mɨpaɨ katinita'iwawiya:

—¿Ke'axa kuta netiuyuri ne titayari penetiyetuani 'Akawi hetsɨa, mɨkɨ mɨnetsimienikɨ? 10 Yurikɨ mɨpaɨ nekanaineni Yawé hɨxie 'akakaɨyari, naitsarie nuiwarite watsata meta yunaime te'aitamete wahetsɨa neti'aitɨwame katiniutanɨ'ani 'ahekɨ. Hikɨ kemɨ'ane memɨkametsi'utaxei, yurikɨ puwaku'iwawiyakai yamemɨtiyuanikɨ kename mekametsi'ukaxei. 11 ¿Hikɨta 'ekɨ pemɨnetsinɨ'a kename nekereitaxatɨani neti'aitɨwame kename 'ekɨ 'ena pe'uyeika? 12 Ne kenetimate hakewa mɨmatsi'anuwitɨni Yawé 'iyarieya, xɨka mɨpaɨ nereitahɨawe 'Akawi kename 'ekɨ 'ena pe'uyeika, xɨkata mɨkɨ kamatsi'utaxeiya pɨnetsimieni. 'Ekɨ matsi mɨpaɨ ketinemaika ne nunutsiyari paitɨtɨ yanepɨtikamie Yawé hetsiemieme. 13 'Ekɨ xɨari mɨpaɨ pepɨkatitaxatɨariewe neti'aitɨwame, mɨpaɨ nepɨtiuyuri kepauka Ketsaweri mɨwakwinekai Yawé niukametemama, ne xeitsienituyari nepɨwaruti'awietaxɨ Yawé niukametemama, huta terɨyarita nepuwareuta'ɨnaxɨ, huta tewiyari heimana tamamata xeimeta, yaxeikɨata meyupaɨmeme xeimeta, ne nepɨtiwamikwa paa meta nepuwaharitɨa. 14 Hikɨta 'ekɨ pemɨnetsinɨ'a nemɨreitaxatɨanikɨ mɨkɨ nekutsiyari kename 'ekɨ 'ena pe'uyeika. Mɨkɨ matsi kanenemiemɨkɨ.

15 'Eriyaxi mɨpaɨ kaniutayɨni:

—Yurikɨ mɨpaɨ nekanaineni Yawé Naimekɨmɨtɨrɨkaɨye hɨxie, kemɨ'ane nemɨti'uximayatsirie, mɨpaɨ nekametinahɨaweni hikɨ ne 'Akawi hetsɨa nekanimieni.

16 Hikɨ 'Awiriyaxi 'Akawi kanikuwauni, katinitaxatɨani 'Eriyaxi hepaɨtsita, hikɨ mɨkɨta kaneyani 'Eriyaxi kanikuwauni 17 hikɨ 'Akawi kepauka 'Eriyaxi muxei, mɨpaɨ katinitahɨawe:

—¿'Ekɨ petihɨkɨ pemɨwa'uximatɨa 'Ixaheri kwieyaritsie kiekatari?

18 'Eriyaxi mɨpaɨ katinita'eiya:

—Ne hawaikɨ nepɨkahɨkɨ 'Ixaheri kwieyaritsie kiekatari 'uximatɨarika nemɨwawiwirie. Kemɨ'ane 'uximatɨarika memɨwawiwirie 'ekɨ pekanihɨkɨtɨni meta 'a'iwama, Yawé 'aitsikaya xemuku'eirikɨ, Wahari kakaɨyarixiyari xemɨwarayexeiyakɨ pɨtari. 19 Hikɨ ketiniwarutaxatɨa teɨteri naitsarie 'Ixaheri kwieyaritsie kiekatari, memeyukuxeɨrienikɨ nehamatɨa Kaximeru hɨriyaritsie paitɨ nauka tsienituyari heimana huta tewiyari heimana tamamata Wahari niukametemama wahamatɨa, meta nauka tsienituyari 'Atserá niukametemama Ketsaweri mexayatsie memutiyaxike.

20 Hikɨ 'Akawi yunaime kaniwarutakwewieni 'ixaheritsixi meta kakaɨyarixi waniukametema Kaximeru hɨriyaritsie paitɨ. 21 'Eriyaxi mɨkɨ teɨteri wahɨxie kaninuani, mɨpaɨ katiniwarutahɨawe:

—¿Kepaukari 'aixɨa xepɨtiyuani xeime hɨkɨame xepanukuweiya? Xɨka Yawé yurikɨ Kakaɨyari hɨkɨtɨni, kaneuyeweka mɨkɨ xemayexeiyani, xɨkata Wahari yuri kakaɨyari hɨkɨtɨni mɨkɨ xekeneuweiyani.

'Ana teɨteri nixeiniuki 'atsimepɨka'utiyua. 22 Hikɨ 'ayumieme 'Eriyaxi tawarita mɨpaɨ kaniutayɨni:

—Ne xeikɨari nekaniyuhayewaneni Yawé niukameya, peru matsi, Wahari kaniwarexeiyani nauka tsienituyari heimana huta tewiyari heimana tamamata niukamete. 23 Yuhutame tuurutsixi xekeniwarahapani. Mɨkɨ xeime meke'anayexeiya, meke'itaxiteni kɨyexitsie mekeheyatsa waiyarieya peru meka'enutataiyatɨ. Neta xeime tuuru nepukuha'aritɨani neta kɨyexitsie nekaneyatsamɨkɨ waiyarieya, peru nepɨka'enuta'ɨriya. 24 Hikɨ mɨkɨ yukakaɨyari mekanitahɨawikuni, neta Yawé nekanitahɨawimɨkɨ. Kemɨ'ane tai makanɨ'ani mɨkɨ yuri Kakaɨyari kanihɨkɨtɨni.

Yunaitɨ teɨteri yamekateniutanaki'erieni mɨpaɨ mɨtiyɨnikɨ.

25 Hikɨ mɨpaɨ katiniwarutahɨawe 'Eriyaxi Wahari niukametemama:

—Xeme xemɨyuwaɨkawakɨ, xeime tuuru xekenanayehanaka xeme meri xekeneutaxiteki. Hikɨ yukakaɨyari xekeneutahɨawi tai manɨ'anikɨ, peru xeme xepɨka'enutataiyani.

26 Wahari niukametemama xeime tuuru mekananayehana memɨ'atɨiriyarie mekanitixitexɨani, hikɨ yukakaɨyari mekanahɨawekaitɨni ximeri memutayua tuka kanayani mɨyame'utiyuanekaku.

Mawari taiyame memutawewi warita mehatsunatɨkɨkatɨ, mɨpaɨ meniutiyuanekaitɨni:

—Wahari 'aku, ketaneuta'eiya.

Peru nitixaɨtɨ pɨkatiu'enierie, nitixaɨtɨ pɨkatiwaruta'ei. 27 Tuka 'aye'aku 'Eriyaxi kaniwananaimakaitɨni, mɨpaɨ katiniwakɨhɨawekaitɨni:

—Karima matsi xekeneutihiwani, yurikɨ xɨari kanikakaɨyaritɨni, peru xɨari kaneyu'iyaritɨaka, yatɨni pɨre'uximayatane, yatɨni 'ateewa paitɨ kaneyeikani. Xɨari matsi pekutsu, xekenanutahɨtɨa.

28 Hikɨ matsi waɨkawa mekaniutihiwatɨkɨne, kememɨte'uhukai, nawaxakɨ mepɨyutixitekekai naitɨ mepeuxuxurekai xeikɨa. 29 Tuka kananukayani, mɨkɨ yaxeikɨa meniyɨakaitɨni memɨka'u'iyarini wahepaɨ, hikɨ kanaye'ani mawari taikai mieme hurayari. Peru nitixaɨtɨ pɨkatiu'enierie, nixewitɨ mɨkawaru'enikɨ nixewitɨ pɨkawaruta'ei.

30 Hikɨ 'Eriyaxi yunaime teɨteri mɨpaɨ katiniwarutahɨawe:

—'Ahurawa xekenakɨni.

Mɨkɨ 'ahurawa mekaniukɨne. Mawari taiyame Yawé hetsiemieme mu'unikaikɨ 'Eriyaxi 'aixɨa kaniyurieni. 31 Mɨkɨ tetexi kaniukuteɨxɨ tamamata heimana hutame, yuxexuime nuiwarite wahetsiemieme Kakuwu niwemama, mɨkɨ Yawé 'Ixaheri mɨtiterɨwaxɨ. 32 Mɨkɨ tetexikɨ mawari wewiwame kaniutawewieni Yawé hetsiemieme, waritanata kana'inetɨyani, tamamata heimana 'auxɨwime rituruyari reukanakeme hatsite. 33 Kɨyexi 'aixɨa katiniutuani, tuuru kaniutixitexɨani, waiyari kananuyatsatɨyani, 34 hikɨ mɨpaɨ kaniutayɨni:

—Xekeneutihɨniya naukame xarite hakɨ, xekeneutiyeuriexɨa mawari taiyariyari heima meta kɨyexitsie.

Hutariekata mɨpaɨ kaniutayɨni:

—Tawarita mɨpaɨ xeketeneuyuri.

Hikɨ mɨpaɨ mekateniuyurieni.

Hairieka mɨpaɨ katiniwaruta'aitɨani:

—Tawarita mɨpaɨ xeketeneuyuri.

Hairieka xarite mana mekaniutiyeuriexɨani. 35 Haa kaniuhapanekaitɨni mawari taiyame waritatsie, meta ma'inetɨyakaitsie kaniutahɨne.

36 Kepauka maye'a mawari taikai mieme hurayari, Kakaɨyari niukameya 'Eriyaxi xeikeyari yekeka mɨpaɨ katiniuyunenewieni: «Yawé, 'Apɨrahami Kakaɨyarieya meta 'Itsahaki metatsiere 'Ixaheri, hikɨ 'ena yunaitɨ mɨpaɨ meketehetimani 'ekɨ Kakaɨyari pemɨhɨkɨ 'Ixaheri kwieyaritsie, meta kename ne neti'a'uximayatsiriwame nehɨkɨ, meta meketehetimani 'ikɨ mɨya nemɨtiyuriene yapeneti'aitɨakaku xeikɨa netiyuriene. 37 Yawé keneneuta'eiya, 'ikɨ teɨteri yamemɨtehetimanikɨ, kename Yawé, Kakaɨyari pehɨkɨ, meta pemɨwa'inie 'ahetsie yuri memɨte'eriekakɨ».

38 'Ana kwitɨwa Yawé tai muyuawitsie mieme kaneyenɨ'ani, mɨkɨ wai mawari taiyariyari hetsiemieme kaniutitaiya, kɨyexi naime, tetexi, meta kwie, 'atsita haa kanakuwatsiɨxa ma'inierietɨkata mɨyemakai. 39 Kepauka teɨteri yunaitɨ mɨpaɨ memɨte'unenierixɨ, mekaniukatunuma'uni, mɨpaɨ mekaniutiyuani: «Yawé Kakaɨyari kanihɨkɨtɨni, yemekɨ yuri Kakaɨyari».

40 Hikɨ 'ana 'Eriyaxi mɨpaɨ katiniuta'aita:

—Xekeniwaretiwiya Wahari niukametemama, nixewitɨ pɨkaheyuta'unani.

Kepauka memɨwarutiwi, 'Eriyaxi katiniuta'aita Kitsuni 'akiyaritsie memanuhapanienikɨ, muwa kaniwarukwini. 41 Hikɨ 'Eriyaxi 'Akawi mɨpaɨ katiniutahɨawe:

—Keneumieni, ketinekwaka, kene'ieka, 'ari wiyeri muwa kanayuaximeni tɨrɨkaɨyetɨ waɨkawa.

42 'Akawi kaneyani mɨrekwakakɨ me'iekakɨ, peru 'Eriyaxi Kaximeru hɨriyaritsie kaneutiyune, mana kananakatutsire kwiepa, yuhɨxie 'utitunutɨ katiniuyerɨni.

43 Hikɨ tiyu'uximayatame mɨpaɨ katiniutahɨawe:

—Kenemie haramaratsie keneukanieri.

'Iparewiwameya heyaka heukaniereka mɨpaɨ kaniutayɨni:

—Nitixaɨtɨ nepɨkatixeiya.

'Eriyaxi mɨkɨ 'atahutamexɨa kaniutanɨ'ani mana meukanenierenikɨ, 44 'atahutarieka ti'uximayatameya mɨpaɨ katinitaxatɨani:

—Haramaratsie 'atineka hai mana kanatimieni. 'Etsikanipeni mamá hepaɨ.

Hikɨ 'ayumieme 'Eriyaxi mɨpaɨ katinitahɨawe:

—Kenemie 'Akawi mɨpaɨ ketinetahɨawi: “Kaxeta keneukuha'aritɨaka kenanutiyerɨka kenemieri, wiyeri nɨka metsi'ukunuitɨani”.

45 Haiwitɨrikɨ muyuawitsie kaniukɨyɨre, hikɨ waɨkawa kaniuku'eka, kaniukawiye tɨrɨkaɨyetɨ. Peru 'Akawi kaneyani kaxetatsie Ketsireri 'erietɨ. 46 Hikɨ Yawé tɨrukariyaya kaninuani 'Eriyaxi hetsie, yuhɨiyamekɨ 'anayuhɨaka kaniutanautsa, Ketsireri paitɨ kaniuta'ani 'Akawi 'akuxi kata'awekaku.