1 Tsamuheri 'akuxi yakɨ puyumaikai, kepauka Yawé mɨti'uximayatsiriekai 'Eri 'i'ɨwiyakaku, 'ana 'akuxi Yawé niukieya pɨkaheye'enieriwakai meta 'ana yuwaɨkawatɨ mɨpaɨ mepɨkatenenierekai.

2 'Eri kaheunieretɨ kanayeiximekaitɨni. Xeitukaritsie heiwa kaniuka'uxipiwekaitɨni mɨwayehupukaitsie yukiita, 3 Tsamuheri kanikutsukaitɨni tukita, tɨratu kakuniyari muyekatsie Yawé hetsiemieme, Kakaɨyari kɨxemeya 'akuxi pɨtatɨkatei. 4 Yawé Tsamuheri kaniutahɨawe, mɨkɨta mɨpaɨ katinita'eiya:

—'Uwa nepɨyeka.

5 Mɨkɨ 'unautsarɨmetɨ kaneyani 'Eri muwayekateitsie, mɨpaɨ katinitahɨawe:

—'Ena nepuwe, ¿titayari penerahiwiwa 'ekɨ?

'Eri mɨpaɨ katinita'eiya:

—Nematsi nepɨkamatsihahiwiwa, keneumieni kenekani.

Hikɨ Tsamuheri kaneyani yu'itaritsie.

6 Peru hutarieka Yawé kanitahɨawe:

—Tsamuheri.

Hikɨ mɨkɨ 'anukukeka kaneyani 'Eri muwayekateitsie mɨpaɨ katinitahɨawe:

—'Ena nepuwe, ¿titayari penerahɨawe 'ekɨ?

'Eri mɨpaɨ katinitahɨawe:

—Neuxei neniwe, ne nepɨkamatsihahɨawe. Kenemie kenekani.

7 Tsamuheri 'ana 'akuxi Yawé pɨka'eniewekai, hatsuaku yuniukikɨ pɨkatitahekɨatɨawekai.

8 Yawé hairieka Tsamuheri kaniutahɨawe, mɨkɨ 'anukukeka kaneyani 'Eri mɨwayekateitsie. Mɨpaɨ katinitahɨawe:

—'Ena nepuwe. ¿Ketitakɨ penereuyehɨatɨ penerahɨawe 'ekɨ?

Merikɨte 'Eri mɨpaɨ katinetimani, kename Yawé temaikɨ kɨhɨawekai.

9 'Eri mɨpaɨ katinitahɨawe:

—Kenemie kenekani, xɨka xewitɨ tawarita matsihahɨaweni mɨpaɨ ketinetahɨawi: “Yawé yakenetineutahɨawi, mati'uximayatsiriwame pɨmatsi'enie”.

Tsamuheri heyaka nekahuni yu'itaritsie. 10 Hikɨ Yawé tawarita 'ahurawa kanitahɨawe hekwamekɨ:

—Tsamuheri. Tsamuheri.

Tsamuheri mɨpaɨ katinita'eiya:

—Keneutaniu, mati'uximayatsiriwame pɨmatsi'enie.

11 Yawé mɨpaɨ katinitahɨawe:

—Neuxei, paye'axime 'Ixaheri kwieyaritsie kwinimieme tiraunarikɨ nemɨwatimariuta. 12 Mɨkɨ tukariyaritsie yanetiniyurimɨkɨ naime kenemutayɨ 'Eri yaxeikɨa tɨɨriyamama wahepaɨtsita. 13 Yanepɨtitahɨawixɨ niwemama 'axamemɨteyuriekaikɨ, wahetsie nepɨrahɨa yuheyemekɨ, mɨkɨ pɨtimaikai ke'axamemutiyuanekai nehepaɨtsita, mɨkɨ matsi 'aixɨa pɨkawaruyuri timaitɨ. 14 'Ayumieme mɨpaɨ nekanaineni nuiwarimama wahepaɨtsita: Nixeime mawarikɨ ni'imikierikɨ nepɨkatiwareuyehɨwirieni ke'axamemɨte'uyuri 'Eri niwemama.

15 Tsamuheri kaniukahuni, 'uxa'arieka ximeri 'itupari kaneuyepiexɨani Yawé tukita, pɨkayuwaɨriyakai 'Eri mɨtitaxatɨanikɨ kemɨtiunierekai. 16 'Ayumieme 'Eri kanita'inieni:

—Tsamuheri neniwe nemɨmatsinaki'erie.

Tsamuheri mɨpaɨ katinita'eiya:

—'Ena nepuwe.

17 'Eri mɨpaɨ katinita'iwawiya:

—¿Yawé kemeretahɨawixɨ 'aku? Nepɨmatsiwawirie pepɨkaneti'awitsirieka. Kakaɨyari 'axakematsi'uyurieni kematiukwinitɨani, xɨka xeiniukiyari pekanetsi'utaxatɨani naime kemɨmatiutahɨawixɨ.

18 Tsamuheri katinitaxatɨani naime, tixaɨ karanukanatɨ, 'ana 'Eri mɨpaɨ kaniutayɨni:

—Yawé mɨkɨ kanihɨkɨtɨni, yaketiɨyɨni kemɨtinake.

19 Tsamuheri mexi werekai Yawé hamatɨana puyeikakai, yatiniuyurieni naime kemɨrehɨawekai. 20 Naitsarie 'Ixaheri kwieyaritsie Rani mɨrakutewatsie meta Weritsewa paitɨ yamepɨtehetima Yawé yamɨtiuyurikɨ Tsamuheri niukame yuhetsiemieme mayeitɨakɨ. 21 Yawé yaxeikɨa Tsamuheri pɨtikuxaxatɨwakai Tsiru mɨrakutewatsie, mana Tsamuheri hetsɨa puyuhekɨatakai meta yuniuki pikuxaxatɨwakai.